YOHANE 20

Kuvuka he vefwie kwakwe Yesu

(Mat. 28:1-10; Mrk. 16:1-8; Luk. 24:1-12)

1He msi wa kuvoka juma, Maria Magdalena akatonga he mbira chaheyavo kere, hecheri na kija; akavona lila ibwe lavushwa he mbira. 2Niho akasara, akafika hakwe Simoni Petro na ula mrateri ungi eye ekikundiwe ni Yesu, akavati, “Vamvusha Mfumwa he mbira, neri tetumanya hantu vemvikie.” 3Niho Petro akavuka hamwe na ula mrateri ungi, vakatonga he mbira. 4Vakadindika vose veri; ula mrateri ungi akadindika kumkela Petro, akarongafika he mbira. 5Akakodeka akasungia, akavona vila vitambaa vya shanda hala si; mira teingie. 6Niho Simoni Petro naye eza ekimratera, akaingia ndeni he mbira; akarereha vitambaa vuntu vyeho hala si; 7na ila mhaluma wekiho he mtwi wakwe; teuho hamwe na vila vitambaa, wevunguluswe ukavikwa kihawo. 8Niho ula mrateri ungi naye akaingia, eye erongefika he mbira, akavona na kuitikija. 9Ambu tevekinajuvukiwa ni iandiko, iti kimtara kuvuka he vefwie. 10Niho vala varateri vakatonga kangi na kaa havo.

Yesu ekufunyirija he Maria Magdalena

(Mrk. 16:9-11)

11Mira Maria ekireimuka nze hafuhi na mbira, ekiia. Aho ekiraia huvo, akakodeka akasungia na hala ndeni he mbira. 12Akavona vamalaika veri, vena suke nyewa, veikae si, mmwe he mtwi, mmwe he maghu hala hantu kimba chakwe Yesu chekiyejwe. 13Navo vakamti, “Mcheku uiani?” Akavati, “Nikila vamvusha Mfumwa wangu, neri mi simanyije hantu vemvikie.” 14Naye ekikenja kuteta huvo, akagharuka nyuma, akamvona Yesu eimuke, asimanye iti ni Yesu. 15Yesu akamti, “Mcheku, uiani? Umwenda ani?” Naye akadunganya iti we ni mrinji wa mghunda, akamti, “Mfumwa, kakicha niwe wemghuhie nivwira hantu wemvikie, nami ninemvusha.” 16Yesu akamti, “Maria!” Ye akagharuka, akamtetia kwa Kiebrania, “Raboni!” (ni kuti, “Mcheji wangu.”) 17Yesu akamti, “Usinigure; ambu sinakwea kutonga he Vava. Mira tonga he vandughu vangu, urevavwira, Nikwea kutonga he Vava wangu naye ni Mrungu wenyu.” 18Maria Magdalena akatonga, akavaukulila varateri mburi kuti, Namvona Mfumwa, na iti enivwirire huvo.

Yesu ekufunyirija he varateri vakwe

(Mat. 28:16-20; Mrk. 16:14-18; Luk. 24:36-49)

19Heoka chahemagheri msi ula wa kuvoka juma, hala hantu varateri vekiho, malighwi efingiwe he kufoleka Vayuda; Yesu akaza, akaimuka aho ghati, akavati, “Mporere imuikaie.” 20Naye ekinatete huvo akavavonyesha maghanza akwe, na kivaju chakwe. Niho vala vakaizihirwa vekinamvone Mfumwa. 21Niho Yesu akavati kangi, “Mporere imuikaie; sa vuntu Vava enitumie mi, nami nimutuma unywi.” 22Naye ekikenja kuteta huvo akavafuta, akavati, “Ghuhani Mpeho Wedi. 23Vala mwenevavushija mabanu, vavushijwa; na vala mwenevachungia mabanu, vachungiwa.”

Yesu ekufunyirija he Toma

24Mira mmwe wa vala ikumi na veri, Toma, eitangwa Mmaza, tekiwaho hamwe navo aho Yesu ekiza. 25Niho varateri vangi vakamti, “Twamvona Mfumwa.” Akavati, “Mi nekisavona he maghanza akwe nkovu ja misumari, na kugera kichaa changu hantu ha misumari, kangi na kuvika mkono wangu he kivaju chakwe, mi sikaitikije neri.”

26Niho misi mnane yekivecha, varateri vakwe vekiho he nyumba kangi, ne Toma eki hamwe navo. Yesu akaza, maluvwi efingiwe, akaimuka aho ghati, akati, “Mporere imuikaie.” 27Ekikenja akamti Toma, “Ete kichaa chako aha; urerehe maghanza angu; kangi ete mkono wako ugure kivaju changu; neri usioke esiitikija, mira mraitikija.” 28Toma akagharusha, akamti, “Mfumwa wangu na Mrungu wangu!” 29Yesu akamti, “Kila wanivona, waitikija; varela vwedi ni vala veitikija vesinavona.”

Cheshigha ii Mburi Yedi yekiandikwa

30Hena maluvengo angi mangi Yesu earongie mozya he varateri vakwe, esiandikwe he iki kitabu. 31Mira aa eandikwe nesa muidime kuitikija iti Yesu niye Kristo, Mwana wa Mrungu. Na he uko kuitikija, mukete nkalamo he izina lakwe.

Currently Selected:

YOHANE 20: CHSUNT67

Highlight

Copy