YOHANE 21
21
Yesu ekufunyirija he varateri vakwe he bahari ya Tiberia
1Nyuma ya ivyo, Yesu akakufunyirija kangi he varateri vakwe, he bahari ya Tiberia; naye ekufunyirije huvu: 2Simoni Petro ne Toma eitangwa Mmaza, ne Natanaeli wa Kana ya Galilaya, na vana Zebedayo, na vangi veri he varateri vakwe, vekiho hamwe. 3Simoni Petro akavati, “Nitonga kuloa samaki.” Navo vakamti, “Na uswi tunetonga nawe.” Niho vakavuka, vakakwea he ngilawa; mira kio kila tevevonie kintu. 4Chaheyavo hekicha, Yesu ekiimuke mbaimbai he bahari, mira varateri vakwe tevekimanyije iti ni Yesu. 5Niho Yesu akavati, “Vanangu, muna mbogha?” Vakagharusha, “Hai!” 6Akavati, “Gerani lwavu mondo wa kume wa ngilawa, munevona.” Niho vakagera; neri vasiidime kulujuta kangi vuntu vwa samaki nyingi. 7Niho ula mrateri ekikundiwe ni Yesu akamti Petro, “Ni Mfumwa! Simoni Petro naye ekinasikie iti ni Mfumwa, akadoka suke yakwe, (ambu ekiho kituhu) akajinka na he bahari. 8Mira vala varateri vangi vakaza na ngilawa, ambu tevekiho hae na isanga ijomu, hekishele sa mikono maghana meri; vekijuta lula lwavu lwena samaki. 9Vekinasee mbaimbai he bahari, vakavona moto wa makaa, wanga hewo hevikiwe samaki na mkate. 10Yesu akavati, “Eteni aha kumwe he jila samaki mwejiloie iki huvu.” 11Niho Simoni Petro akakwea he ngilawa, akajuta lwavu na mbaimbai, lweizue samaki mbaha ighana na makumi masano na mtandatu; nziaho nekitenyingi huvo, lwavu telubajike. 12Yesu akavati, “Nzoni muvushe momo.” Neri tehena mntu he vala varateri eidime kuvwija, “Niwe ani?” Ambu vamanya iti ni Mfumwa. 13Yesu akatonga kaghuha mkate akavainka, na samaki nire huvo. 14Ako ni kantu ka katatu Yesu kuvoneka he varateri vakwe, ekinavuke he vefwie.
Yesu emshighia Petro momo wakwe
15Vekinakenje kula, Yesu akamti Simoni Petro, “H’ii! Simoni mwana Yohane, we wenikundie kukela ava?” Akamti, “Yee Mfumwa, we wemanyije iti nekukundie.” Akamti, “Rera vana ng’onji vangu.” 16Akamti ka keri, “Simoni mwana Yohane, wenikundie?” Akamti, “Yee Mfumwa, we wemanyije iti nekukundie. Akamti, “Risha magonji angu.” 17Akamti ka katatu, “Simoni mwana Yohane, wenikundie?” Petro akasononoya, kila emvwirire kantu katatu, “Wenikundie?” Akamti, “Mfumwa, umanya vyose, wemanyije iti nekukundie. Yesu akamti, “Rera magonji angu. 18Kididi, kididi, nikutio, Igheri lila we m’bwange weki kudoka mwenye na kutonga hantu wekunda; mira aho wekinekua, uneronga mikono yako, na ungi enekuchunga na kukutika hantu wesihaenda.” 19Etetie icho kiteto kwa kuvonyesha iti ni mifwire ani enemkaza nayo Mrungu. Naye ekikenja kuteta ivyo akamti, “Nitatera!” 20Petro akagharuka, akamvona ula mrateri ekundiwe ni Yesu ekiza nyuma, niye ula ekiighamie he mpafu yakwe igheri la kula kijo cha chahemagheri, ekiti, “Mfumwa, ni ani ekurengeha?” 21Niho Petro ekimvona uu, akamti Yesu, “Mfumwa, uu naye h’ii?” 22Yesu akamti, “Kakicha nienda uu aikae mhaka nekiza, kikutara ni we? We niratera mi.” 23Icho kiteto kikagisha he vandughu iti ula mrateri tekafwe. Mira Yesu temvwirire iti tekafwe; esire iti, “Kakicha nienda uu aikae mhaka nekiza, kikutara ni we?”
Msirikijo
24Uu niye mrateri evitetia ivyo vuonwa, kangi niye eandike ivyo, na uswi twemanyije iti vuonwa vwakwe ni vwa idi.
25Hena na vintu vingi vijinki Yesu evirongie; navyo nanga vyekiteandikwa kimwe kimwe, niti si ii yesekiringania vila vitabu vyekiandikwa
Currently Selected:
YOHANE 21: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
