YOHANE 19

Pilato emwinkija Yesu he Vayuda

(Mat. 27:15-31; Mrk. 15:6-20; Luk. 23:13-25)

1Niho Pilato akamghuha Yesu, akam’bigha viboko. 2Na vasikari vakalusa ngata ya mivwa, vakamgera he mtwi, vakamdoka suke nkundu. 3Vakamswia vekiti, “Tukukezya mfumwa wa Vayuda!” Vakam’bigha maluhi. 4Nyuma Pilato akafuma wa na nze, akavati, “Uu mntu namfunya na aha nze he unywi, nesa muidime kumanya iti sivonie nzune yoyose heye.” 5Niho Yesu akafuma na nze, edokie ila ngata ya mivwa na ila suke nkundu. Pilato akavati, “Rerehani uu mntu!” 6Niho vala vabaha va vatasi na vandima vavo vekinamvone vakalonzisha vakati, “Mvambe he msalaba! Mvambe he msalaba!” Pilato akati, “Mghuheni ra engaunywi, muremvamba; ambu mi sivonie nzune yoyose heye.” 7Vayuda vakamgharusha, “Uswi tuna kiziomo, na he icho koziomo kimtara afwe, kila akughosha Mwana wa Mrungu.”

8Niho Pilato ekinasikie icho kiteto akazika foleka. 9Akaingia wa he nyumba ya masa, akamti Yesu, “We ufuma hio?” Mira Yesu tegharushe kini. 10Niho Pilato akamti, “Tuteta nami? Tumanyije iti mi nina nzinya ya kukuchungua, kangi nina nzinya ya kukuvamba he msalaba?” 11Yesu akamgharusha, “We wesekiketa nzinya yoyose hemi, kakicha wesekiinkiwe kufuma uko wanga; hena icho ula eniimkije he mikono yako ena ibanu ibaha kukela.” 12Kuvokia aho Pilato akaenda kumchungua; mira Vayuda vakalonzisha vekiti, “Waramchunguia uu we tu mmbwie wa Kaisari; ye ekuosha mfumwa ni mnzo wakwe Kaisari.” 13Niho Pilato ekinaasikie ivyo viteto, akamfunya Yesu na nze, akaikaa si he kichumbi cha lahia, hantu heitangwa Hekokonterwe mabwe, kana he Kiebrania Gabatha. 14Naho neki kuringanya Pasaka, neki sa saa mtandatu. Akavati Vayuda, “Rereha, mfumwa wenyu!” 15Niho vala vakalonza, “Mvushe! Mvushe! Mvambe he msalaba!” Pilato akavati, H’ii! Nimvambe mfumwa wenyu?” Vabaha va vatasi vakamgharusha, “Uswi tetuna mfumwa esire Kaisari.”

Yesu evambwa he msalaba

(Mat. 27:32-44; Mrk. 15:21-32; Luk. 23:26-43)

16Niho emwinkija he mikono yavo nesa avambwe he msalaba; navo vakamghuha Yesu. 17Akafuma etikie msalaba wakwe, mhaka hantu heitangwa he mtwi, kana kiebrania Golgota. 18Uko vakamvamba he msalaba, na vangi veri hamwe naye, mmwe kunu na mmwe kunu ne Yesu eho ghati. 19Pilato naye akaandika kimanyisho akakivika wanga he masalaba, cheandikwe: “YESU MNAZARETI, MFUMWA WA VAYUDA.” 20Icho kimanyisho Vayuda vajinki vakakisoma; ambu hala hantu Yesu evambiwe he msalaba neki hafuhi na muzi; nacho chekiandikwe he Kiebrania na Kiroma na Kigiriki. 21Niho vabaha va vatasi wa Vayuda vakamti Pilato, “Usiandike: ‘Mfumwa wa Vayuda;’ mira iti ula ekitie, ‘Mi ni mfumwa wa Vayuda.’” 22Pilato akagharusha, “Cho neandike naandika.”

23Vala vasikari vekinamvambe Yesu he msalaba, vakaghava suke jakwe, vakajighava mafungu mane, kila msikari na ifungu lakwe; na ila nkanzu. Ila nkanzu teitechumwa, mira yetelukwa yose pere kufuma wanga. 24Niho vakavwirana, “Tusiibaje, mira tuishotie manga iti ioke yakwe ni, lila iandiko likoloke, leti:

“Veghavie suke jangu,

Na nkanzu yangu vakaishotia manga.” Huvo nivwo vuntu vala vasikari veketie.

25Na hala he msalaba wakwe Yesu hekiimuke mlala wavo, na mjinawe mlala wavo, Maria wakwe Kileopa, ne Maria Magdalena. 26Niho Yesu ekinamvone mlala wavo na ula mrateri emkundie eimuke hafuhi, akamti, mlala wavo, “Mcheku, rereha mwanao.” 27Ekikenja akamti, ula mrateri, “Rereha mlala wenyu.” Kuvokia saa ila ula mrateri akamghuha na he nyumba yakwe.

Kufwa kwakwe Yesu

(Mat. 27:45-56; Mrk. 15:33-41; Luk. 23:44-49)

28Nyuma ya ivyo Yesu, ekimanya iti vyose vyakenja kufumana nesa maandiko akoloshwe, akati, “Nasikia nkiru.” 29Hala hekina sangu yeizue mpombe yekararata; vakagera mafuri eizue mpombe yekararata; he lukombo lwa mjungu, vakamtwaia he momo. 30Yesu ekikenja kubwita ila mpombe yekararata, akati, “Chakoloka.” Akagonyoa mtwi, akachika moo.

Vebawa maghu, na Yesu ejikwa

(Mat. 27:57-61; Mrk. 15:42-47; Luk. 23:50-56)

31Niho Vayuda, he mburi ya kuringanyija, nesa vimba visikae wanga he msalaba msi wa sabato, (ambu ila sabato neki ya msi m’baha,) vakamwomba Pilato maghu avo abawe, nesa vavushwe. 32Vasikari vakatonga, vakabaa ula wa kuvoka maghu, na wa keri eye evambiwe he msalaba hamwe naye. 33Mira vekinamswie Yesu vekivona iti akenja kufwa, tevem’baie maghu; 34mira mmwe wa vala vasikari akamsoma na ichumo he lubavu, hala indi hakafuma sakame na mpombe. 35Ula evivonie evitetia vuonwa na vuonwa vwakwe ni vwa idi; naye emanyije iti eteta idi nesa na unywi muidime kuitikija. 36Ambu ivyo vyerongike nesa iandiko likoloke:

“Tehena ivindi lakwe lenebawa.” 37Kangi iandiko lingi liti:

“Venemrereha ula vemsomie.”

38Igheri nyuma ya ivyo Yosefu wa Arimatia, naye neki mrateri wakwe Yesu (mira kwa mpiso he kuvafoleka Vayuda) akamsemba Pilato amkundije nesa avushe kimba chakwe Yesu. Pilato akamkundija. Niho akatonga akavusha kimba chakwe. 39Nikodemo naye akatonga, (ni ula ekitongie hakwe na kio) akaete msankanyo wa manemane na udi, ekoloka ratili ighana. 40Niho vakaghuha kimba chakwe Yesu, vakakichunga na shanda ya suke nyewa hamwe na vila vintu vyepupuntika sa vuntu e kiziomo cha kujika he Vayuda. 41Hala hantu ekivambiiwe hekina mghunda; ndeni he ula mghunda hekina mbira shaa, yesinajikwa mntu neri mmwe. 42Aho niho he vuntu vwa mringanyijo wa Vayuda vakamjika Yesu aho; ambu ila yekijo hafuhi.

Currently Selected:

YOHANE 19: CHSUNT67

Highlight

Copy