YOHANE 18

Yesu egurwa

(Mat. 26:47-56; Mrk. 14:43-50; Luk. 22:47-53)

1Ekikenja kuteta ivyo, Yesu akafuma hamwe na varateri vakwe, akatonga sela ila ya kaanda ka Kedroni, hantu hekina mghunda; akaingia ye hamwe na varateri vakwe. 2Ne Yuda ula ekienda kumrengeha, ekiremanya hala hantu; ambu Yesu ekitonga uko kantu kajinki hamwe na varateri vakwe. 3Niho Yuda ekinakenje kughuha ihindo la vasikari, na vandima vefuma he vabaha va vatasi na Vafarisayo, akatonga uko na taa na mighaa na mata. 4Niho Yesu kila emanyije vyose vyenemzia, akafumirira, akavati, “Mumwenda ani?” 5Vo vakagharusha, “Ni Yesu Mnazareti.” Yesu akavati, “Nimi.” Ne Yuda ula mrengehe ekireimuka navo. 6Niho ekinavati, “Nimi,” vakahunduka na nyuma, vakagwa hala si. 7Niho akavavwija kangi, “Mumwenda ani?” Vakati, “Yesu Mnazareti.” 8Yesu akagharusha, “Nakenja kumuvwira iti nimi; kakicha nimi mwenienda, vashigheni ava vatonge.” 9Nesa kikoloke kila kiteto etetie, “Vala weninkie tehena neri mmwe wavo nemteshije.” 10Simoni Petro ekina na mhandwi, akaujuta, akamtema mzoro wa mtasi m’baha, akamchwa isikio la kume. Na ula mzoro izina lakwe niye Malko. 11Niho Yesu akamti Petro, “Hundua mhandwi he mboni jawo; hama kikombe Vava enikie nisikinwie?”

12Niho vala vasikari na ula akida m’baha wavo na vandima va Vayyuda vakamgura Yesu, vakamchunga. 13Vakarongamtonja hakwe Ana; ambu neki mkwewe Kayafa, ula eki mtasi m’baha ula mwaka. 14Ne Kayafa niye ula ekivavwirire Vayuda ila mburi iti kimtara mntu mmwe afwe vuntu vwa vantu.

Petro emkana Yesu na mtasi m’baha emhereja

(Mat. 26:59-75; Mrk. 14:54-72; Luk. 22:55-71)

15Simoni Petro na mrateri ungi vakamratera Yesu, na ula mrateri ekimanyike he mtasi m’baha, akaingia hamwe ne Yesu he ula ua wa mtasi m’baha. 16Mira Petro akareimuka nze he mvera. Niho ula mrateri ungi emanyike he mtasi m’baha akafuma, akateta na mzeghoja mvera, akamwingija Petro. 17Niho ula mgitu eki mzaghoja mvera, akamti Petro, “We nawe o h’ii! tu mmwe wa varateri va uu mntu? Naye akati, “Esimi.” 18Na vala vazoro, na vandima vekiimuke, vekifutie moto wa makaa; ambu hekina mpeho; vekiho veota moto. Petro naye ekiho hamwe navo, ekiota moto.

19Niho mtasi m’baha akamvwija Yesu mburi ja varateri vakwe, na mburi ja michejire yakwe. 20Yesu akamgharusha, “Mi netetie boo na si ii, misi yose nechejije he sinagogi na he nyumba ya mtaso, hantu Vayuda vose vevungania; neri sitetie kiteto chochose kwa mpiso. 21Hanini wekinivwija mi? Vavwije vala vesikie iti nevavwire kini; vo vemanyije cho netetie.” 22Ekinatete huvo mndima mmwe ekiimuke hafuhi akam’bigha Yesu luhi, ekiti, “Nivwo vuntu wemgharusha mtasi m’baha huvo?” 23Yesu akamgharusha, “Kakicha netetie uvivi konesha icho kivivi; mira kakicha netetie nezo, unibighiani?” 24Niho Ana akamtonja erechungwa hakwe Kayafa, eye mtasi m’baha.

25Na Simoni Petro ekireimuka uko nze ekiota moto. Niho vakamti, “We nawe h’ii! tu mmwe wa varateri vakwe?” Naye akakana, akati, “Esimi.” 26Mzoro mmwe wa mtasi m’baha naye e mndughu wa ula etemiwe isikio ni Petro, akati, “H’ii! siwe nekuvonie kula he mghunda mwena naye?” 27Niho Petro akakana kangi, hala indi nkuruvi ikaamba.

Yesu mozya hakwe Pilato

(Mat. 27:1-2, 11-14; Mrk. 15:1-5; Luk. 23:1-5)

28Vekikenja vakamfunya Yesu hakwe Kayafa vakamtonja he nyumba ya masa, naho nekire chaheyavo kere; mira vo venye teveingie he nyumba ya masa, vasirekujiraja, nesa vaveiwe kula Pasaka. 29Niho Pilato akafuma na nze hevo, akati, “Ni masa ani mwemlaha uu mntu?” 30Vakagharusha, vakamti, “Kakicha uu esekirahira vivivi, twesekimwete hako.” 31Niho Pilato akavati, “Herikoni! mghuheni engaunywi, mremlaha kwa viziomo vyenyu!” Vayuda vakamti, “Uswi tetuchuguwe kukoma mntu.” 32Nesa kila kiteto Yesu etetie kikoloke, ekivonyesha ni mifwire ani enefwa.

33Niho Pilato akaingia kangi he nyumba ya masa, akamwitanga Yesu, akamti, “H’ii! We u mfumwa wa Vayuda?” 34Yesu akagharusha, “Uteta huvo we mwenye, kana ni vantu vangi vekuvwirire mburi jangu?” 35Pilato akagharusha, “Oo, Mi ni Myuda? Mbari yako na vabaha va vatasi nivo vekuetie hangu. Weketie ni?” 36Yesu akagharusha, “Vufumwa vwangu si vwa aha si. Nanga vufumwa vwangu neki vwa aha he si ii, vabwange vangu vekiniomania nesa nisizegerwa he mikono ya Vayuda. Mira vufumwa vwangu si vwa aha.” 37Niho Pilato akamti, “Mira ho u mfumwa e?” Yesu akagharusha, “We wati iti mi ni mfumwa. Mi nemoghiwe he vuntu vwa ivyo, na he vuntu vwa ivyo mi nezie he si ii, nesa nitetie idi vuonwa. Na ula ena iyo idi esikia izii langu.” 38Pilato akamti, “Idi ni kini?” Naye ekinatete icho kiteto akafuma wa na he Vayuda, akavati, “Mi sivwene nzune heye neri mwe. 39Mira hena kiziomo chenyu iti mi nimuchunguie mntu mmwezu he igheri la Pasaka; h’ii, mukunda nimuchunguie mfumwa wa Vayuda?” 40Niho vakalonza kangi, vakati, “Uo hai, mira Baraba.” Ula Baraba naye neki mkibonda.

Currently Selected:

YOHANE 18: CHSUNT67

Highlight

Copy