YOHANE 16

1“Viteto ivyo nemuvwirire, nesa musirevihiwa. 2Venemuchwia nzighi he sinagogi; yee, saa iza, eyo kila mntu emukoma enedunganya iti emtasa Mrungu. 3Na ivyo venemuketia, kila vesimmanyije Vava neri mi. 4Mira namuvwira ivyo, nesa aho iyo saa yekifika, muvikumbuke iti mi nekimuvwirire. Semuvwirire ivyo too kuvoka, ambu nekiho hamwe na unywi. 5Mira iki mi nitonga ha ula enitumie, neri tehena mmwe wenyu enivwija, ‘Utonga hio?’ 6Mira kila namuvwira huvo, ngoro jenyu jaizua kushinirwa. 7Mira mi nimuvwira echo cha idi; ni chedi he unywi, mi nivuke; ambu mi nekisavuka, uo Mraghenja tekaze he unywi; mira mi nekitonga ninemtuma he unywi. 8Naye ekikenja kuza, uo enekonesha si ii he mburi ya mabanu, na kitea, na mlaho 9He mburi ya mabanu, kila vesiniitikija mi; 10he mburi ya kitea, kila mi netonga he Vava, neri temunivona kangi; 11he mburi ya mlaho, ambu ula m’baha wa si ii akenja kuchwiiwa. 12Nirena vijinki vya kumuvwira, mira temukaviidime iki. 13Mira ye ekiza uo Mpeho wa idi, enemutonja amuingije he idi yose; ambu tekatete vyakwe mwenye, mira vyose enesikia eneviteta, enemumanyisha hata mburi ja vintu vyeneza. 14Ye enenikaza mi; ambu eneghuha he vila e vyangu amwukulile. 15Na vyose Vava ena navyo ni vyangu; nicho chashigha nekiti, eneghuha he vila e vyangu, amwukulile.

Kuaghanya

16“Kakenda kadori temukanivone waa; na kangi kakenda kadori munenivona.” 17Niho kumwe he varateri vakwe vakatiana, “Ni kiteto ani icho eti, ‘Kakenda kadori temukanivone,’ na ‘kangi kakenda kadori munenivona?’ na icho, ‘Ambu nitonga ha Vava?’” 18Niho vakati, “Ni kiteto ani eteta, icho: ‘Kakenda kadori?’ Tetumanya cho eteta.” 19Yesu akamanya iti veenda kumvwija, akavati, “Icho nicho mwevwijana, iti netetie: ‘Kakenda kadori temukanivone, na kangi kakenda kadori munenivona?’ 20Kididi, kididi, nimutio, Unywi muneia na kuwela, mira si ii ineizihirwa; unywi munesononoya, mira lusoyoyo lwenyu lunegharuka luoke kuizihirwa. 21Mche ekichunguka, ena kushinirwa ambu saa yakwe yafika; mira ekinachunguka, tekumbuka kangi vula vwasi vuntu vwa kuizihirwa, iti hamoghwa mntu he si ii. 22Huvo unywi iki muna kushinirwa; mira mi ninemuvona wa, na ngoro jenyu jeneizihirwa, na kuizihirwa kwenyu tehena enemughumba. 23Kangi uo msi temukanivwije kintu neri kimwe. Kididi, kididi, nimutio, Mwekiomba Vava kintu chochose he izina langu enemuinka. 24Mhaka iki temunaomba kintu he izina langu; ombani na unywi munevona; kuizihirwa kwenyu kukoloke.

25Ivyo nevitetie na unywi kwa visoma; saa iza nesikareteta wa na unywi kwa visoma, mira ninemuinka boo mburi jakwe Vava. 26Msi uo muneomba he izina langu; neri simuti mi ninemuombia he Vava; 27ambu Vava mwenye emukundie kila unywi mwanikunda mi, na kuitikija iti mi nefumie he Vava. 28Nefumie he Vava, nami nikaza aha he si ii; kangi nishigha si ii nitonge he Vava.”

29Aho varateri vakwe vakati, “Rereha, iki uteta boo, neri tuteta kivisoma. 30Iki twamanya iti we wemanyije vinti vyose, neri tuenda mntu akuvwije; heicho tuitikija iti wefumie he Mrungu.” 31Yesu akagharusha, “H’ii! Iki mwaitikija? 32Rereha, saa yezie, yee, yakenja kuza, niho mwezarika kila mmwe kihakwe, munishighe mi mwenye; mira siho mwenye, ambu Vava eho hamwe nami. 33Nemuvwirire ivyo nesa mukete mporere hemi. Aha he si ii muna vwasi, mira dindwani ni ngoro; mi navota si ii.”

Currently Selected:

YOHANE 16: CHSUNT67

Highlight

Copy