YOHANE 15

Mzabibu na matambi awo

1“Mi nimi mzabibu wa idi, na Vava wangu niye mwimi. 2Kila itambi leho hemi lesigera, elivusha, na kila itambi legera eliharehia, nesa lizike kugera. 3Unywi mwakenja kuzera vuntu vwa kila kiteto nemuvwirire. 4Ikaeni hemi, nami he unywi. Sa vuntu itambi lesiveiwa kugera lo ijenye, lekisaikaa he mzabibu; na unywi nirehuvo, mwekisaikaa hemi. 5Mi ni mzabibu; unywi mu matambi; ye eikaa hemi nami heye, uo egerisha; ambu mi nesina na unywi hesina cho mweidima kuronga. 6Mntu ekisaikaa hemi, etaghwa na nze sa itambi, anyaruke; vantu vaavunganye vaataghe hena moto, atikimire. 7Unywi mwekiikaa hemi, na viteto vyangu vyekiikaa he unywi, ombani chochose mweenda, na unywi muneketiwa. 8Huvo Vava wangu ekazwa, kila mwegerisha; na unywi muneoka varateri vangu.

9Sa vuntu Vava enukundie mi, nami nemukundie unywi, ikaeni he lukundo lwangu. 10Mwekigurisha maazero angu muneikaa he lukundo lwangu; sa vuntu mi negurishe maazero a Vava wangu na kuikaa he lukundo lwakwe. 11Ivyo nemuvwirire, nesa kuizihirwa kwangu kuikae he unywi, na kuizihirwa kwenyu kukoloshwe. 12Iazero langu ni ili: Mukundane, sa vuntu mi nemukundie unywi. 13Tehena ena lukundo lubaha kuvecha ulu, lwa mntu kuinkija kuho kwakwe vuntu vwa vambwie vakwe. 14Unywi mwaoka vambwie vangu, mwekironga vila nemuazere. 15Sikamuitange kangi vazoro; ambu mzoro temanyije cho mzima wakwe eketa; mira unywi nemuitange vambwie; kila vyose nevisikie he Vava wangu navimuvwirira. 16Si unywi mwenisaghure mi, mira nimi nemusaghure unywi; nami nikamuvika mutonge muzegera ntunda; kangi ntunda jenyu jiidime kuikaa; nesa vyose mwenemwomba Vava he izina langu amuinke. 17Ivyo nimuazera unywi, nesa muidime kukundana.

Si ii na Mpeho wa idi

18“Kakicha si ii yekimuvihiwa, manyeni iti yerongenivihiwa mi yesinamuvihiwa unywi. 19Nanga mweki va si ii, si ii yekikunda vala e vayo; mira kila unywi mwe si va si ii, mira mi nemusaghure he si ii, heicho si ii imuvihiwa. 20Kumbukani kila kiteto nemuvwirire: Mzoro si m’baha kumvecha mzima wakwe. Ukinakiche venirierieshe mi, venemurieriesha na unywi. Kakicha vekigurishe kiteto changu, hata chenyu venekigurisha. 21Mira venemuketia ivyo vyose vuntu vwa izina langu, ambu tevemmanyije ula enitumie. 22Nanga nesekizie na kuteta navo, vesekiketa mabanu; mira iki tevena cha kukukania he mabanu avo. 23Ula enivihiwa mi emvihiwa Vava wangu. 24Kakicha sekirongie hevo ndima yesinarongwa rini ni mntu, vesekiketa mabanu; mira iki vatuvona mi ne Vava wangu, na kutuvihiwa. 25Mira ni iti kikoloke kila kiteto cheandikwe he myomo yavo: ‘Venivihiwe sutwa.’ 26Mira aho uo Mraghenja ekineza, nenemtuma kufuma he Vava, uo Mpeho wa idi efuma he Vava, Ye enenitetia vuonwa. 27Na unywi murateta vuonwa, ambu too kivoko mwerena nami.

Currently Selected:

YOHANE 15: CHSUNT67

Highlight

Copy