YOHANE 14

Nzia ya hakwe Vava

1Ngoro jenyu jisile vwasi; mwemwitikije Mrungu, niitikijani nami. 2He nyumba ya Vava wangu hena ha kuikaa hajinki; kakicha se huvo, nekimuvwira; ambu nitonga kumuringanyija hantu. 3Igheri nekinetonga kumuringanyija hantu, nineza wa nimughuhie na hangu; nesa hantu mi neho, na unywi muhaikae. 4Na hantu mi netonga mwemanyije nzia.” 5Toma akamti, “Mfumwa, uswi tetumanyije tetumanyije hantu wetonga; tunemanya ze nzia? 6Yesu akamti, “Nimi nzia, na idi, na nkalamo; mntu tekaze he Vava ekisavechija hemi. 7Kakicha mwekinimanyije mi, ne Vava mwekirammanya; kuvokia iki mwemmanyije kangi mwamvona.” 8Filipo akamti, “Mfumwa, mtuvonyeshe Vava, kitukoloka.” 9Yesu akamti, “Filipo, mi neikae hamwe na unywi ii misi yose, we usinimanye? Enivonie mi amvona Vava; iki we uti ze: ‘Utuvonyeshe Vava?’ 10Tuitikija iti mi niho he Vava, Vava naye eho hemi? Ivi viteto nemuvwira mi siviteta he mburi yangu; mira Vava eho hemi eronga ndima yakwe. 11Muniitikije iti mi niho he Vava, ne Vava eho hemi; kakicha temuitikija huvo, itikijani ra vuntu vwa ndima njenye. 12Kididi, kididi, nimutio, Ye eniitikija mi, ndima jo mi nejironga, ye naye enejironga; yee! na mbaha kukela ijo enejironga, ambu mi nitonga ha Vava. 13Na unywi chochose mweomba he izina langu, ninekironga, nesa Vava akazwe he Mwana. 14Mwekiomba kintu cho chose he izina langu, nineronga.

Kiravo cha Mpeho Wedi

15“Mwekininikunda munegurisha maazero angu. 16Nami ninemwomba Vava, naye enemuinka Mraghenja ungi, nesa aikae na unywi kae na kae; 17niye Mpeho wa idi; eye si ii yesiidima kumghuhia, kila yesimvona, neri yesimmanyije, mira unywi mwemmanyije, ambu etue henyu; naye enekaa he unywi. 18Sikamushighe vakiva; niza henyu. 19Heshele kakenda kadori si ii yesikanivone kangi; mira unywi munivona. Na kila mi neho moo, na unywi muneketa moo. 20Msi ula unywi munemanya iti mi niho he Vava wangu, na unywi hemi, nami he unywi. 21Ula ena na maazero angu, na kuagura, uuo niye enikundie; kangi ula enikundie, enekundwa ni Vava wangu; mi nami ninemkunda na kukufunyirija heye.” 22Yuda (si ula Iskarioti) akamti, “Mfumwa, cheikee ze iti uenda kukufunyirija he uswi, neri si he si ii?” 23Yesu akagharusha, akamti, “Mntu ekinikunda enegurisha kiteto changu; Vava wangu naye enemkunda; na uswi tuneza heye na Kuhareha kikalo heye. 24Mntu esinikundie, ye tegurisha viteto vyangu; na icho kiteto mwekisikia si changu; mira ni chakwe Vava eye enitumie.

25“Ivyo nivyo nekimuvwirire marongo ala neho henyu. 26Mira uo Mraghenja, uo Mpeho Wedi, eye Vava enemtuma he izina langu, enemucheja vyose, na kumukumbusha vyose nemuvwirire. 27Mporere nimushighia; mporere yangu nimuinka; vuntu mi nemuinka, sivwo vuntu si ii yeinkija. Ngoro jenyu jisile vwasi, neri musifoleke. 28Mwesikie iti mi nekimuvwirire; ‘Nitonga, kangi niza henyu; nanga mwenikundie, mwekiizihirwa ambu nitonga hakwe Vava; ambu Vava ni m’baha kunikela mi. 29Iki narongamuvwira vyesinaoka, nesa vyekiraoka muidime kuitikija. 30Mi sikatete kangi na unywi viteto vijinki, ambu m’baha wa si ii ezie, neri tena kintu hemi. 31Mira si ii imanye iti nemkundie Vava; na sa vuntu Vava eniazere, nivwo vuntu neronga. Vukani tutonge.

Currently Selected:

YOHANE 14: CHSUNT67

Highlight

Copy