NDIMA JA NTUME 6

Kusaghurwa kwa vala mfungate

1Niho misi ila itaro la varateri lekiongejika, hakaketa madughunyiko a Vayuda va Kigriki he Vaebrania, kila vache vavo vefwiiwe ni vome, veivawa he kutukikiwa kila msi. 2Vala ikumi na veri vakaitanga luvungano lwa varateri, vakati, “Tekiiziha uswi twekishigha kiteto cha Mrungu na kuhirira kijo. 3Heicho vandughu, saghurani vantu mfungate he unywi vena nguma yedi, veizue ni Mpeho Wedi, vena kiugho, nesa tuvavike he iyo ndima. 4Na uswi tuzike ikaa he kuomba na kuhirira icho kiteto ngwa.” 5Iyo mburi ikaizihija luvungano lwose; vakamsaghura Stefano, mntu eizue mwitikijo na Mpeho Wedi, ne Filipo ne Prokoro, ne Nikanori ne Timoni, Parmena ne Nikolao egharukie Kiyuda wa Antiokia; 6evo vevavikie mozya he ntume, vekinaombe vakavavikia mikono.

7Kiteto cha Mrungu kikagisha hantu hose, na itaro la varateri likazikaneta haiwa uko Yerusalemu, hata vatasi vajinki vakagurisha uo mwitikijo.

Stefano eomanywa

8Stefano naye ekiizua mbonea na nzinya, ekironga vimako na maluvengo mabaha he vantu. 9Mira hakavuka vantu kumwe va sinagogi yeitangwa ya Vekombolwe, na ya Vakirene na ya Vaaleksandria, na ya vala vefuma Kilikia na Asia, vakakanana ne Stefano; 10mira teveidime kuvota kiugho chakwe na ula Mpeho eteta naye. 11Niho vakasembeka vantu vetie, “Twemsikie uu ekiteta viteto vya kumfalaja Mose na Mrungu.” 12Vakasoseja vantu na vaghosi na vaandiki; vakamjinkia, vakamgura, vakamtonja he chila. 13Vakavika vaonwa va mongo, veti, “Uu mntu teshigha kuteta viteto vya kuberesha aha hantu hezerire na myomongwa; 14ambu twemsikie ekiti, Uo Yesu wa Nazareti, enekonda aha hantu na kugharusha viziomo tweinkiwe ni Mose.” 15Vantu vose veho he chila vakamtunkulila meso, vakavona vusho vwakwe vweikee sa vwa malaika.

Currently Selected:

NDIMA JA NTUME 6: CHSUNT67

Highlight

Copy