NDIMA JA NTUME 7

Stefano ebirikira

1Mtasi m’baha akati, “Ijo mburi nirevwo vuntu jeikee?” 2Naye akati “Vandughu na vazima vangu, sikijani! Mrungu mwenye ngazo emfumiie mzima wetu Abrahamu hala eho Mesopotamia, esinatua Harani, 3akamti, ‘Fuma he isanga lako na he ndughu jako, utonge he isanga nenekuvonya.’ 4Niho efuma he isanga la Vakalidayo, akatua Harani. Vavee ekinafwe, Mrungu akamsamija kufuma uko mhaka he ili isanga mwetue iki. 5Neri temuinkie vupali helo neri sa kiringanyo cha ivato, mira akamravia kulimunka, lioke isanga lakwe na lukolo lwakwe lweneza, nziaho tena mwana. 6Mrungu akati huvu iti, mbari yakwe ineoka ngeni he isanga la vantu vangi, navo venevaghosha vazoro vavo, na kuvarisha vwasi miaka maghana mane. 7Mira iyo mbari yenevaghosha vazoro nineilaha, nivwo vuntu Mrungu etetie; na nyuma ya aho venehafuma, navo venenitasia aha. 8Akamunka kiaghano cha kitavani; niho Abrahamu akammogha Isaki, akamtavana msi wa kanane. Isaki akammogha Yakobo, Yakobo akavamogha vala ikumi na veri, evo vaku vetu.

9“Vala vaku vetu vekimsikia Yosefu lwiso, vakamtagha noko Misri. Mrungu akaikaa hamwe naye; 10akamkija he mavwasi akwe ose, akamunka kukundika na kuteta kiugho he Farao mfumwa wa Misri; naye akamghosha aoke mratetia isanga la Misri na kaa yakwe yose. 11Hakaketa nzota he isanga lose la Misri na la Kanani, na vwasi vubaha, neri vazima vetu tevevonie kijo chevafika. 12Mira Yakobo ekisikia iti uko Misri hena ngano, akavatuma vazima vetu ka kuvoka. 13Na ntambo ya keri Yosefu akakumanyisha he vajinawe, vandughu vakwe Yosefu vakamanyika he Farao. 14Yosefu akatuma kumwonja vavee eye Yakobo na vandughu vakwe vose, vantu makumi mfungate na vasano. 15Niho Yakobo akasea noko Misri, akafwia ho ye na vaku vetu. 16Vakatikwa noko Sikemu, vakajikwa he ila mbira Abrahamu eizorire na fedha he vana Hemori uko Sikemu.

17“Niho igheri la kila kiravo Mrungu emraviie Abrahamu lekizengelela, vala vantu vakaneta mno na kuongejika uko Misri, 18niho uko Misri hakaketa mfumwa ungi, esimmanyije Yosefu. 19Uo akaendia mbari yetu kiavia na kuvaketia vazima vetu vivivi, ekivatitikija iti vataghe vana vavo vadori, nesa vasiikae na moo. 20He ilo igheri Mose akamoghwa, naye ne mwana wedi he Mrungu, akarerwa he nyumba ya vavee mieji mitatu. 21Ekinataghwe, mwana Farao wa kibora akamghuha, akamrera sa mwana wakwe mwenye. 22Mose akachejwa viugho vyose vya Kimisri, akaoka mndekero he viteto na mihiro.

23“Ekikolosha miaka makumi mane, akadunganya kuvarereha vandughu vakwe, evo vana Israeli. 24Akamvona mmwe ekiketiwa chesivaie, akamkania, akamchwia sire ula ekiketiwa chesivaie kwa kum’bigha ula Mmisri. 25Edunganye iti vandughu vakwe venetwarija iti Mrungu eenda kuvakija kwa mkono wakwe, mira tevetwarije. 26Hala yavo akavafumia vekikanana, akaenda kuvakundanya, ekiti, ‘Vomeni, unywi mu vandughu, hanini mweketiana chesive?’ 27Mira ula emketie mghenjii chesive, akamshukuma, ekiti, ‘Ni ani ekughoshije m’baha wetu na mretutanya? 28Kana uenda kunikoma sa vuntu wemkomie ula Mmisri ighuo?’ 29Mose akaaha vuntu vwa icho kiteto, akaikaa kivugheni he isanga la Midiani, akamoghia ho vana veri va kibwange.

30“Miaka makumi mane yekivecha, akafumiwa ni malaika he moto weaka he izungo uko nyika he ntuvi ya Sinai. 31Mose ekiuvona akamaka he icho evonyeshwe; ekifika hafuhi iti arerehe, akaziwa ni izii la Mfumwa: 32‘Mi ni Mrungu wa vazima vako, Mrungu wakwe Abrahamu, ne Isaki ne Yakobo.’ Mose akazingiza, asiidime kurereha. 33Mfumwa akamti, ‘Ng’ola viratu he maghu ako, ambu aho hantu weimuke hezerire. 34Chaidi nevonie mavwasi a vantu vangu veho uko Misri, nesikie kululuma kwavo, nami nasea kuvakija. Heicho iki nikutuma uko Misri.’

35“Uo Mose vemsuie vekiti, ‘Ni ani ekughoshije m’baha na mzetutanya?’ niye etumiwe ni Mrungu kuoka m’baha na mkomboli kwa mkono wa ula malaika emfumiie he lila izungo. 36Uo niye evafunyije ho, ekironga vimako na maluvengo he isanga la Misri, na he bahari Nkundu, na uko nyika miaka makumi mane. 37Uo Mose niye evavwirire Vaisraeli: ‘Mrungu enevavushija mroti sa mi he vandughu venyu, uo munamsikie.’ 38Uo niye ekiho he lula luvungano kula nyika hamwe na ula malaika etetie naye he ntuvi ya Sinai, kangi hamwe na vazima vetu; niye einkiwe viteto vya nkalamo atuinke uswi. 39Uo mntu vazima vetu tevekundie kumsikia, mira vakampasa na mbai, na kwa ngoro javo vakahunduka Misri. 40Vakamti Aroni: ‘Tuharehie murungu yeneturongorira; ambu uo Mose eye etufunyije he isanga la Misri tetumanyije cho chemvonekie.’ 41Misi ila vakahareha ndama, vakatasa ila fwanyanyi, vakaizihirwa he ndima ja mikono yavo. 42Mira Mrungu akavavonya mghongo, akavashigha iti vatase irivati la uko wanga, vuntu cheandikwe he kitabu cha varoti:

‘Hama unywi va nyumba ya Israeli,

He ila miaka makumi mane mweho uko nyika,

Mwenitasie ng’ombe jakoma na matasi a kuinkija?

43Neri, mira ihema lakwe Moloki mwelighuhie,

Na ntondo ja mrungu wenyu Refani,

Fwanyanyi mwejiharehe iti mujitase;

Nami ninemusamija noko hae kuvecha Babeli.’

44“Lila ihema la vuonwa lekina na vazima vetu uko nyika, sa vuntu ula etetie ne Mose eazere iti aliharehe lefwanane na ila fwanyanyi evonie, 45elo vazima vetu he kutarirana vena ne Yosua vakaliingija he kifumwa cha vaisanga, evo Mrungu evangashije mozya ya vazima vetu, mhaka misi yakwe Davidi; 46evoneiwe ni Mrungu, naye eombie amwendie Mrungu wakwe Yakobo ha kuikaa. 47Mira emjengiie nyumba ni Salomoni. 48Mira ula eho uko wanga teikaa he nyumba jejengiwe na mikono, sa vuntu mroti eti:

49‘Uko wanga ni kichumbi changu cha kifumwa,

Na si ii ni hantu hangu ha kuvikia maghu angu;

Ni nyumba ani mwenenijengia? ni Mfumwa eti,

50Kana hantu ani nenehemia?

Si mkono wangu weharehe ivyo vyose?’

51“Unywi vatiri, mwesitavanwe ngoro neri masikio! Misi yose mumkinda Mpeho Wedi; sa vuntu vazima venyu veketie, na unywi nirevwo. 52Ni mroti uhi vazima venyu vesimrierieshe? Vevakomie vala verotie mburi ya kuza ula Mwenye Singisirya; eye na unywi iki mwaoka varenge vakwe, mukamkoma. 53Unywi mweghuhie myomongwa, kwa iazero la malaika, neri musiigurishe.”

Kifwa chakwe Stefano

54Vekisikia huvo, vakasha he ngoro, vakamkereresia majegho, 55mira ye ekiizua Mpeho Wedi; akatunkula na uko wanga, akavona ngazo ya Mrungu, ne Yesu eimuke mondo wa kume wa Mrungu. 56Akati, “Rereha! navona wanga jejuvuke, na Mwana wa Mntu eimuke mkono wa kume wa Mrungu.” 57Vakalonza na izii ibaha, na kujiva masikio avo, vakamjinkia vose hamwe, 58vakamfunya na nze he muzi, vakam’bigha mabwe. Na vaonwa vakavika suke javo he maghu a m’bwange eitangwa Sauli. 59Vakam’bigha Stefano na mabwe, naye ekiomba eketi, “Mfumwa Yesu, ghuha ngoro yangu.” 60Akadunkuta, akaiagha na izii ibaha, “Mfumwa, usivatarire ii nzune.” Ekikenja kuteta huvo, akashinjia. Aho ekikomwa Sauli akasikia kachuu.

Currently Selected:

NDIMA JA NTUME 7: CHSUNT67

Highlight

Copy