NDIMA JA NTUME 5

Anania ne Safira

1Mira mntu mmwe eitangwa Anania, hamwe na Safira mche wakwe, etaghie kisaka chakwe, 2akavisa vya kumwe he vila evonie, na mche wakwe eremanya, na vya kumwe akaete akavivika he maghu a ntume. 3Petro akati, “Anania, hanini Shetani ekiizua he ngoro yako, kumvwira Mpeho Wedi mongo, na kuvisa kumwe he vila wevonie he zora ya kisaka? 4Hala wena nacho se kimari yako? na iki chekinataghwe, cho wevonie sekirechako? Cheokie ze mhaka ukavika icho kintu he ngoro yako? Si mntu wemvwirire mongo, esire Mrungu.” 5Anania ekisikia ivyo viteto, akagwa hala si, akafwa. Vantu vose vesikie ivyo, vakaingiwa ni fole mbaha. 6Hakavuka vabwange vakamvungulusa na shanda, vakamfunya na nze, vakamjika.

7Nyuma hantu ha saa ntatu jekivecha mche wakwe naye akaingia, esimanyije icho cheketike. 8Petro akamgharusha, “Nivwira ki, Ii niyo zora mwevonie he icho kisaka?” Akamti, “Yee, niyo zora.” 9Petro akamti, “Cheikee ze mwekiaghana kumghesha Mpeho wa Mfumwa? Rereha, maghu a vala vemjikie mghosio eho mpengeni, navo hata we venekutika na nze.” 10Hala indi akagwa he maghu akwe akafwa. Vala vabwange vekiingia vakakicha afwa, vakamtika na nze, vakaremjika hala hantu mghosiwe ejikiwe. 11Kanisa yose na vantu vose vesikie ivyo, vakagurwa ni fole mbaha.

Maluvengo na kubanja kwerongiwe ni Ntume

12Na kwa mikono ya ntume hakarongwa maluvengo na vimako vijinki he vantu; navo vose vekiikaa kwa ngoro mwe he lukumbi lwakwe Salomoni; 13na he vangi vose tehena neri mmwe eidime kugurana navo, mira vantu vakavakaza haiwa. 14Vareitikija vakazika kuongejika he Mfumwa, vajinki va kiume na va kiche. 15Hata vawaji vavo vakavafunya na nze he nzia mbaha, na kuvavika he madasi na he magodoro, nesa Petro ekivazia, neri kivuri chakwe du kivafikie mmwe hevo. 16Hata vantu vangi kufuma he mizi yeho mondo na mondo ya Yerusalemu, vakavungana vekiete vawaji na vala verishwa vwasi ni mpepo mbivi, na avo vose vakabanjwa.

Petro ne Yohane mozya he Chila kangi

17Hakavuka mtasi m’baha hamwe na vose vena naye, (avo nivo e va itagwa la Vasadukayo,) veizue kiru.

18Vakavagura ntume, vakavagera he nyumba ya varechungwa. 19Mira uko iko malaika wa Mfumwa akajuvua maluvwi a nyumba ya varechungwa, akavafunya na nze, akati, 20“Tongani mureimuka he nyumba ya mtaso, muvwire vantu viteto vyose vyya ii nkalamo.” 21Navo vekinasikie huvo, vakatonga he nyumba ya mtaso chaheyavo kere, vakacheja.

Mtasi m’baha akaza hamwe na vala vena naye, akaitanga vantu va chila na vaghosi vose va vana Israeli, vakatuma vantu kula he nyumba ya varechungwa iti vavaete. 22Mira vala vabwange vekifika he nyumba yya varechungwa tevevavonie, vakahunduka vakaghamba, 23kuti, “Nyumba ya varechungwa tweikichije yerefingwa nezo, na varinji vereimuka mpengeni, mira twekijuvua tetuvonie mntu eho ndeni.” 24Niho m’baha wa nyumba ya mtaso na vabaha va vatasi vekisikia huvo, vakafwiwa ni mutwi vuntu vwavo iti iyo mburi yeokie ze. 25Hakaza mntu mmwe akavakulila mburi kuti, “Vala vantu mwevachungie, veimuke he nyumba ya mtaso vekicheja vantu.” 26Niho ula m’baha wa nyumba ya mtaso, akatonga hamwe na vabwange, akavaete, mira si kwa nzinya, ni hala vefoleke vantu, vasirevabigha mabwe. 27Vekinavaete, vakavavika he chila; mtasi m’baha akavavwija, ekiti, 28“Tetumukokontie iti musicheje he ilo izina? iki muzi wa Yerusalemu wagisha michejire yenyu, muenda kutuetie nzune ya sakame ya uo mntu.” 29Petro na ntume vakavagharusha vekiti, “Kitutara kumsikia Mrungu kukela vantu. 30Mrungu wa vazima vetu emvushije Yesu he vefwie, eye unywi mwemkomie mwekimvamba he mti. 31Uo Mrungu emgimbike he mkono wakwe wa kume, aoke M’baha na Mkija, aetie Vaisraeli kuchwa mti na kushighiwa mabanu. 32Na uswi tu vaonwa va ijo mburi hamwe na Mpeho Wedi, eye Mrungu evainkie vala vemsikia.” 33Vekinasikie huvo vakasha he ngoro, vakaenda kuvakoma.

34Mira Mfarisayo mmwe eitangwa Gamalieli, Mwalimu wa myomongwa, e mreshimiwa ni vantu vose, akaimuka he chila, akaazera vala vantu vavikwe nze hadori. 35Akavati, “Unywi vome va Israeli! Kucheieni he vuntu mwenevaketia ava vantu. 36Ambu he ii misi yavecha hemvukie Teuda, akakutia iti ye ni mntu m’baha, akaraterwa ni vantu sa maghana mane; naye akakomwa, na vose vemsikie vakazarika, vakateka. 37Nyuma ya uo hakavuka Mgalilaya eitangwa Yuda he ila misi ya kuandikwa; akajuta vantu vajinki, vakamratera; naye akareteka, na vala vemsikie vose vakazarika. 38Na iki nimutio, Tanani na ava vantu, vashigheni, ambu kakicha ni mburi kana ndima ya kivantu, inekondika, 39mira kakicha yefumie ha Mrungu temuidima kuikonda; musirevoneka sa vantu veomana na Mrungu.” 40Vakamsikia; vekinavaitange ntume, vakavabigha, vakavaamora iti vasitete wa he izina lakwe Yesu, vakavavokeja. 41Navo vakafuma he ila chila vekiizihirwa, kila vatarwa iti chevavaiye kusonishwa vuntu vwa ilo izina. 42Na kila msi uko he nyumba ya mtaso na he nyumba javo teveshighie kucheja na kubirikira Mburi Yedi, iti Yesu ni Kristo.

Currently Selected:

NDIMA JA NTUME 5: CHSUNT67

Highlight

Copy