NDIMA JA NTUME 4

Petro ne Yohane mozya he Chila

1Aho echeri teta na vala vantu, vatasi na m’baha wa nyumba ya mtaso na Vasadukayo, vakavazia, 2vevihiwe, kila vecheja vantu na kubirikira kuvuka kwakwe Yesu he vefwie. 3Vakavagura, vakavagera he nyumba ya varechungwa, mhaka hala heyavo hakwe, ambu neki chahemagheri. 4Mira vajinki he vala vesikie kiteto ngwa vakaitikija; itaro la vantu va kiume likaoka sa viku visano.

5Hala yavo hakwe, vabaha na vaghosi na vaandiki, vakavungana Yerusalemu, 6hamwe ne Ana mtasi m’baha, ne Kayafa ne Yohane ne Aleksanda, na vantu vose va izumbe la mtasi m’baha. 7Vekinavavike ghati, vakavavwija, “Mweketie huvo kwa nzinya ani, kana he izina lakweni?” 8Niho Petro ekiizua Mpeho Wedi, akavati, “Unywi vabaha va vantu na unywi vaghosi va Israelli! 9kakicha tuvwijwa yoo mburi ya chedi ula mntu msoka ekiketiwe, iti ebandijwe ze, 10manyani unywi vose hata vantu vose va Israeli, iti, He izina lakwe Yesu Kristo wa Nazareti, eye unywi mwemvambie he msalaba, na Mrungu akamvusha he vefwie; vuntu vwa ilo izina, nicho uu mntu eimuke aha mozya he unywi, e wedi. 11Ye niye lila ibwe ledaiwe ni unywi vajengi, nalo laoka ibwe ibaha la he pembe. 12Neri tehena lukio lwefuma he ungi neri mmwe, ambu tehena izina lingi aha si vantu veliinkiwe, chetutara kukijwa nilo.”

13Niho vekivona ndekero yavo Petro ne YYohane, kangi vekimanya iti ni vantu vesichejijwe, neri vena icha lekoloke, vakamaka, vakatwarija iti vekina ne Yesu. 14Kangi vekimvona ula ebandijwe eimuke hamwe navo, tevevonie cha kuvagharusha. 15Vakavavwira vafume he nyumba ya masa, vakachila vo venye na venye, 16vekiti, “Ava vantu tuvaghende ze? Ambu chemanyike boo he vantu vose veikaa Yerusalemu, iti luvengo lwa nguma lwerongiwe nivo, neri tetuidima kulukana. 17Mira nesa iyo mburi isiregisha he vantu, tuvaitushe, vasitete kangi na mntu neri mmwe he ilo izina.” 18Vakavaitanga vakavakokontia vasitete wa neri hadori, nerri kucheja he izina lakwe Yesu. 19Petro ne Yohane vakavagharusha, vakavati, “Kakicha kina kitea he Mrungu kumusikia unywi kukela Mrungu, chwani unywi venye; 20ambu uswi tekive kushigha kuteta vila twevivonie na kuvisikia.” 21Navo vekinavaitushe vakavachungua, vasivone cha kuvaketa, vuntu vwa vantu, ambu vantu vose vekimkaza Mrungu he vuntu vwa vila vyeketike; 22ambu ula mntu ekitiiwe ulo luvengo lwa kubanjwa ekikoloshe miaka makumi mane na kukela.

Petro ne Yohane vehunduka he vambwie vavo

23Igheri vekinachunguwe, vakatonga he vantu vavo, vakavavwirira mburi jose vevwirirwe ni vabaha va vatasi na vaghosi. 24Navo vekisikia vakavusha mazii avo na ngoro mwe he Mrungu, vekiti, “Ee Mfumwa, we niwe Mrungu, niwe werumbie wanga na si, na bahari na vyose vyeho heyo, 25nawe wetetie kwa Mpeho Wedi he momo wa mndima wako Davidi vava wetu:

‘Hanini Vakiisanga vekivurunyika,

Na mbari ja vantu jekiririkana vintu vyesina nzia?

26Vafumwa va si ii vakadoka,

Na vabaha vaaghana

Kumchila Mfumwa ne Kristo wakwe.’

27“Ambu ni cha idi, Herode ne Pontio Pilato hamwe na Vakiisanga na vantu va Israeli, vevungane he uu muzi, vuntu vwa mndima wako ezerire, eye Yesu, ula wemgimbike; 28nesa vakoloshe vyose mkono wako na miendire yako yevirekere too kae. 29Na iki Mfumwa, rereha maondosho avo, uvaghenje vazoro vako, kuteta kiteto chako kwa ndekero yose, 30wekironga mkono wako kubanja, maluvengo na vimako virongwe he izina la mndima wako ezerire, eye Yesu.” 31Igheri vekikenja kumwomba Mrungu, hala hantu vevungane hakakushwa, vose vakaizua Mpeho Wedi, vakateta kiteto cha Mrungu kwa ndekero.

Msango wa vumwe

32Luvungano lwa vala veitikije vekina ngoro mwe na madunganyo mamwe, neri tehena mntu eti kila ena nacho chochose ni chakwe mwenye, mira veketie sanga he vintu vyose. 33Kangi ntume vakateta vuonwa vwa kuvuka he vefwie kwa Mfumwa Yesu na nzinya mbaha, na mbonea mbaha ikaikaa hevo vose. 34Neri hevo tehena mntu eokie msovu, ambu vantu vose vala vena na visaka kana nyumba, vevitaghie na kila vevonie he vila vetaghie vakaviete, 35vakavivika he maghu a ntume; kila mntu akaghaviwa kiringanyo chakwe sa vuntu eenda.

36Na Yosefu, eitangwe ni ntume Barnaba, (ni kuti, “Mwana wa Kutuja”), Mlevi, kifumo chakwe ni mntu wa Kipro, 37uo ekina mghunda, akautagha, akaete jila fedha, akajivika he maghu a ntume.

Currently Selected:

NDIMA JA NTUME 4: CHSUNT67

Highlight

Copy