NDIMA JA NTUME 3

Kubanjwa kwa mraomba eholoje

1Petro ne Yohane vekikwea hamwe kutonga he nyumba ya mtaso, saa kenda elo igheri la kuombia. 2Hekina mntu eholoje too ereho he ndeni ya mlala wavo, ekinatikwa ni vantu kila msi, na kuvikwa he mpenge ya nyumba ya mtaso yeitangwa Yedi, nesa atanje lughenjo he vala veingia he nyumba ya mtaso. 3Uo mntu ekivavona Petro ne Yohane vekiingia he nyumba ya mtaso, akatanja iti ainkwe lughenjo. 4Petro ekimtunkulila hamwe ne Yohane, akati, “Turerehe uswi!” 5Akavarereha na ikuji iti eneinkwa kintu nivo. 6Mira Petro akati, “Mi sina fedha neri dhahabu, mira kila nena nacho nicho nekunka. He izina lakwe Yesu Kristo wa Nazareti, imuka utonge.” 7Akamgura mkono wa kume akamvusha. Hala indi mavato akwe na marungo akwe akadinda, 8akavuka fia, akaimuka, akavoka kuvata; akaingia he nyumba ya mtaso hamwe navo, ekivata na kujinkajinka, na kumkaza Mrungu. 9Vantu vose vakamvona ekivata na kumkaza Mrungu. 10Vakamanya iti ni ula ekiikaa na kutanja lughenjo he mpenge Yedi ya nyumba ya mtaso; vakamagarara vakamaka he ijo mburi jeokie hena ye.

Petro ebirikira he nyumba ya mtaso

11Aho echerivaguragura Petro ne Yohane, vantu vose vakavungana fia he lukumbi lweitangwa lwakwe Salomoni, vekimagarara haiwa. 12Igheri Petro ekivona huvo akavagharusha vala vantu, “Unywi Vaisraeli, hanini mwekimaka ivi, kana hanini mwetutunkulila uswi, sa e nzinya jetu kana vwedi vwetu vwemunkie uu mntu kuvata? 13Mrungu wakwe Abrahamu ne Isaki ne Yakobo, eye Mrungu wa vazima vetu, emgimbike Yesu mndima wakwe, ula unywi mwemrengehe na kumkana he Pilato, hala ye ekichwa iti achunguwe. 14Mira unywi mukamkana ula ezerire, ula e mkitea, mukaenda kuinkwa mkomi. 15Mukamkoma na ula m’baha wa nkalamo, eye Mrungu emvushije he vefwie; na uswi tu vaonwa vakwe. 16Na kwa mwitikijo weho heye, ukamunka uu mntu uvu vibandi vwekoloke, mozya yenyu unywi vose.

17Na iki vandughu, nemanyije iti mweketie huvo kwa kusamanya, sa vuntu vabaha venyu veketie. 18Mira Mrungu akakolosha vila etetie kae he momo wa varoti vakwe vose, iti Kristo wakwe enerishwa vwasi. 19Chwani ra mti, mugharuke, nesa mabanu enyu ashaghashwe, nesa magheri a kutundanywa efuma he Mfumwa afike, 20nesa amtume Kristo Yesu ula mwemvikiiwe too kae, 21eye chekimtara kughuhwa noko wanga, mhaka haze ala magheri vintu vyose vyeneghoshijwa vishaa, eo Mrungu etetie he momo wa varoti vakwe vezerire too kivokio cha ili isanga. 22Ambu kweri Mose etetie kuti: “Mfumwa Mrungu enemuvushijija mroti sami, efuma he vandughu venyu, msikieni ye he vintu vyose eneteta na unywi. 23Aho kila mntu esikaremsikia uo mroti, eneteshwa tosho na kutanywa na vantu vakwe.’ 24Yee, hata varoti vose kuvokia Samweli na vala vezie nyuma heye, vose vetetie, vebirikire mburi ja misi ii. 25Unywi mu vana va avo varoti, na va vila viaghano, evyo Mrungu eaghane na vazima venyu, ekimti Abrahamu: ‘He lukolo lwako mbari jose ja si ii jineinkwa lutelwedi.’ 26Mrungu ekinamvushe mndima wakwe Yesu he vefwie, akarongamtuma he unywi, nesa amuinke lutelwedi, na kumtanya kila mmwe wenyu na vivivi vyakwe.

Currently Selected:

NDIMA JA NTUME 3: CHSUNT67

Highlight

Copy