NDIMA JA NTUME 2

Viinkwa vya Mpeho Wedi

1Aho msi wa Pentekoste wekifika, vose vekiho hantu hamwe. 2Hala indi hakaza mrurumo wefuma uko wanga, wekikee sa nkungu yefefeta na nzinya, ukaizuja na nyumba yose hantu veho. 3Vakaziwa ni malumi eghavanyike eikee sa maluverevere a moto, akaikaa he kila mmwe. 4Vose vakaizujwa Mpeho Wedi, vakavoka kuteta mitetire ingi sa vuntu Mpeho evainkie kuteta.

5Kula Yerusalemu hekina Vayuda vemfoleka Mrungu, vantu va mbari jose he masanga. 6Aho ilo izii lekinasikiwe, mavungano vakavungana, vakamagarara, ambu kila mntu evasikie vekiteta kitetire cha havo. 7Vakamaka vose, vakakugha, vekitiana: “Rereha, ava vose veteta si Vagalilaya? 8Iki cheokieze, aha twesikia kila mntu kitetire chetu twemoghiwe nacho? 9Vaparti na Vamedi na Vaelami, na vala veikaa Mesopotamia, Yudea na Kapadokia, Ponto na Asia, 10Frigia na Pamfulia, Misri na mondo wa Libia, hafuhi na Kirene, na vagheni vefuma Roma, Vayuda na vegharukie Kiyuda, 11Vakrete na Vaarabu; tuvasikia ava vekiteta na vitetire vyetu, vila vintu vibaha Mrungu erongie.” 12Vose vakamaka na kufwiwa ni mtwi, vekivwirana: “Ii mburi ni kuti ze?” 13Vakumwe vakasola vekiti, “Veengee mvinyo mshaa.”

Petro ebirikira he Pentekoste

14Mira Petro akaimuka hamwe na vala ikumi na mmwe, akaretisha, akavati, “Unywi vantu va Yudea, na unywi vose mwetue Yerusalemu, sikijani viteto vyangu, iyo mburi imanyike he unywi. 15Uvwo vuntu mweririkana sivwo; ava vantu teveengee, ambu iki ni saa ntatu ja chaheyavo; 16mira iyo mburi ni ila yetetiwe he momo wa mroti Yoeli:

17‘Kineoka he misi ya msirikijo, Mrungu eti,

Ninevaitia vantu vose Mpeho wangu,

Vana venyu va kibwange na va kibora venerota;

Na vabwange venyu venevonyeshwa kimpeho;

Na vazima venyu veneota ndoto.

18Yee, he iyo misi ninevaitia vandima vangu va kiume na vakiche

Mpeho wangu, navo venerota.

19Nami ninefunya mamako uko wanga,

Na maluvengo aha si he isanga,

Sakame na moto na mhuehue wa moshi.

20Izuva linegusha kija,

Na mweji kuoka sakame,

Aho ula msi m’baha wa Mfumwa wemanyike wesinaza.

21Kangi kineoka, kila eneitanga izina la Mfumwa enekijwa.’

22Unywi vome va Israeli! sikijani viteto ivi: Yesu wa Nazareti, mntu efwinyirijwe boo he unywi ni Mrungu, kwa virumo na vimako na maluvengo, ala Mrungu eaketie kwa mkono wakwe ghati he unywi, sa vuntu unywi venye mwemanyije; 23uo mntu ekinainkijwe he unywi vuntu vwa mburi yechwiwe ni Mrungu kwa kurongamanya kwakwe too kae, unywi mukamvamba he msalaba, na kumkoma kwa mikono ya vantu vavivi; 24ye Mrungu emvushije he vefwie, ekivusha lusina lwa kifwa, ambu techekive agurwe nilwo. 25Ambu Davidi eteta mburi jakwe:

‘Nemvonie Mfumwa mozya hemi misi yose,

Ambu eho mondo wa mkono wangu wa kume, nisiyungeyunge.

26Heicho ngoro yangu ikakukunda, na lumi lwangu lukaizihirwa;

Kangi mwiri wangu nawo uneikaa he ikuji.

27Ambu tukashighe ngoro yangu uko he nkoma;

Neri tukashighe ezerire wako kufikiwa ni kivoji.

28Wanimanyisha nzia ja nkalamo;

Uneniizuja kuizihirwa kwa vusho vwako.’

29“Vomeni vandughu vangu, nikundiani nitete na ndekero mozya yenyu, mburi ja mzima wetu m’baha Davivi, iti efwie akajikwa, na mbira yakwe iho hetu na yoo ili. 30Mira kila erotie, ekimanya iti Mrungu emraviie ekikurigha iti he lukolo lwakwe enemvika mmwe, aikae he kichumbi chakwe cha kifumwa. 31Ye mwenye ekinarongevona huvo, etetie mburi ya kuvuka he vefwie kwakwe Kristo, iti ngoro yakwe teishighiwe uko he nkoma, neri mwiri wakwe teuvoie. 32Uo Yesu, Mrungu emvushije he vefwie, na uswi vose tu vaonwa vakwe. 33Heicho ekinakwejwe nhaka mkono wa kume wa Mrungu na kughuha he Vava kila kiravo cha Mpeho Wedi, akakufuta icho kintu mwavona iki na kusikia. 34Ambu Davidi tekweie uko wanga, mira ye mwenye eti:

‘Mfumwa emvwirire Mfumwa wangu:

Ikaa mkono wangu wa kume,

35Mhaka nenevika vanzo vako vose vaoke kagonti kavikia maghu ako.’

36“Heicho nyumba ya Israeli yose, naikoneshe kumanya iti: ‘Uo Yesu mwemvambie he msalaba, Mrungu amghosha Mfumwa na Kristo.’”

37Vekinasikei ivyo vikavashota he ngoro, vakamti Petro na ntume vangi, “Vandughu, tukete ze?” 38Petro akavati, “Chwani mti kila mmwe abatizwe he izina lakwe Yesu Kristo, mushighiwe mabanu enyu, na unywi muneinkwa Mpeho Wedi. 39Ambu icho kiravo ni he vuntu vwenyu hamwe na vana venyu, na vantu vose veho hae, na vala veneitangwa ni Mfumwa Mrungu wetu vamzie.” 40Akateta vuonwa hevo na kuvarunga kwa viteto vijinki mno, ekiti, “Kukijeni he mbari ii yena vutiri.” 41Na vala vemghuhiie kiteto chakwe vakabtizwa. Ula msi vakaongejika vantu vekoloka sa viku vitatu.

Miikarire ya Kikristo

42Vakaikaa he michejire ya ntume na he vumwe na he kubendua mkate na kuomba.

43Kila mntu akaingiwa ni fole; vimako na maluvengo mangi vikarongwa ni ntume. 44Na vala veitikije vose vakaikaa hantu hamwe, vakaketa sanga he vintu vyose, 45vekitagha mari javo, na vintu vyavo ven navyo, na kughavia vantu vose kila mntu na kiringanyo chakwe. 46Misi yose vekiikaa he nyumba ya mtaso kwa ngoro mwe, na kubendua mkate he kila nyumba, vakala kijo chavo na kuizihirwa kwa ngoro yeelile, 47vekimkaza Mrungu na kuizihija vantu vose. Mfumwa akaongeja luvungano kila msi, he vala vekikijwa.

Currently Selected:

NDIMA JA NTUME 2: CHSUNT67

Highlight

Copy