NDIMA JA NTUME 22

Mgayo wakwe Paulo he Vayuda

(Ntum. 9:1-19; 26:12-18)

1“Unywi vome, vandughu vangu na vavava vangu, nisikijani ki nekikukania mozya henyu iki.” 2Vekisikia iti eteta navo Kiebrania vakazika huja, akati,

3“Mi ni Myuda, nemoghiwe Tarso, muzi wa Kilikia, nikarerwa he uu muzi nekiikaa hakwe Gamalieli, nikachejwa nezo mburi ja viziomo vya vazima vetu, nikakudoka mno kumrongia Mrungu ndima sa vuntu mweikee iki; 4nikarieriesha vala veho he nzia ii hata kuvakoma, nikavachunga vome na vache na kuvagera he nyumba varechungwa. 5Sa vuntu mtasi m’baha enitetia vuonwa hamwe na vaghosi va chila yose, evo nekighuhie barua hevo, kutonja he vandughu, nikatonga Damasko, nesa vala veho uko nivaete na kunu Yerusalemu vechungiwe, nesa valahwe.

6“Ingeri aho nekizoka, nekizengelela Damasko, igheri la hemsi kilungulungu, hala indi kianga kibaha chefuma uko wanga kikanibigha myondo yose. 7Nikagwa hala si, nikasikia izii leniti, ‘Sauli, Sauli, hanini wenirieriesha?’ 8Nikagharusha, ‘Niwe ani Mfumwa?’ Akaniti, ‘Nimi Yesu Mnazareti, eye we wenirieriesha!’ 9Na vala veho nami vevonie icho kianga, mira izii la uo etetie nami tevelisikie. 10Nikati, ‘Mfumwa, nikete ze?’ Mfumwa akaniti, ‘Vuka uingie Damasko, uko unevwirwa mburi ya vyose vyekutara kuronga.’ 11Kila nesiidimavona wa vuntu vwa kila kianga kibaha, nikategurwa mkono ni vala vekina nami nikafika Damasko. 12Mntu mmwe eitangwa Anania, emfoleka Mrungu he kuratera viziomongwa, ena nguma yedi he Vayuda vose vekitue uko, 13akanizia, akaimuka hafuhi nami, akaniti, ‘Mndughu wangu Sauli, vona!’ Hala indi meso angu akavona. 14Akaniti, ‘Mrungu wa vavava vetu akusaghura we, uidime kumanya kikundire chakwe, na kumvona ula mwenye kitea na kusikia izii lefuma he momo wakwe. 15Ambu uneoka muonwa wakwe he vantu vose, wa vila wevonie na kuvisikia. 16Ikira uindani? Vuka ubatizwe, ukuoje mabanu ako, wekilanga izina lakwe.’

17“Aho nikinahunduke Yerusalemu, nekitasa he nyumba ya mtaso, nikaikaa sa nesempuka. 18Nikamvona, ekiniti, ‘Fuma fia kunu Yerusalemu ambu tevekaitikije vuonwa vwako wenenitetia.’ 19Nami nikati, ‘Mfumwa, avo venimanyije iti nimi nekivachunga vala vekuitikije, na kuvabigha he kila sinagogi. 20Na ila sakame ya mwonwa wako Stefano yekiitwa nami nereimuka hafuhi, nikakikunda, kangi nikasungajia ja vala vekimkoma.” 21Naye akaniti, ‘Tonga du, ambu mi ninekutuma utonge hae he vantu Vakiisanga.’”

Paulo ekuteta iti ni Mroma

22Vakamsikija mhaka he icho kiteto; vakatetisha na wanga vekiti, “Mvushe uu he isanga, ambu tekive iti akalame.” 23Aho vekilonza na kutagha suke javo na kupururusha teri, 24ula akida m’baha akaazera iti aingijwe na he iboma, ekiti avwijishwe kwa kubighwa viboko, nesa amanye cho cheshigha vekimlonzia huvo. 25Aho vekikenja kumchunga na nzighi, Paulo akamti ula akisa eimuke hafuhi naye, “H’ii, kikundijwa he unywi kubigha mntu e Mroma mlaho wesinachwiwa?” 26Ula akida ekisikia huvo akatonga akamwukulila ula akida m’baha, ekiti, “Uenda kuhira ni? ambu uu mntu ni Mroma.” 27Ula akida m’baha akaza akamvwija, “Nivwiraki, u Mroma?” Akati, “Yee.” 28Ula akida m’baha akagharusha akati, “Uvu vuroma netevuzora na mari nyingi.” Paulo akati, “Mi ni Mroma wa kimwoghwa.” 29Niho vala varemvwija vakavuka, vakamshigha; na ula akida m’baha akafoleka, ekimanya iti ni Mroma, na kila amchunga.

Paulo ekukania he chila ya Sanhedrin

30Msi wa keri ekienda kumanya nezo cho cheshigha ekisitakwa ni Vayuda, akamchungua, akavaazera vabaha va vatasi na chila yose vazomane; akamseja Paulo akamvika mozya hevo.

Currently Selected:

NDIMA JA NTUME 22: CHSUNT67

Highlight

Copy