NDIMA JA NTUME 21

Kufuma Mileto mhaka Tiro

1Niho tukinakenje kutana navo na kuingia he ngilawa, tukatonga kimozya tukafika Kosi, msi wa keri tukafika Rodo, kufuma aho tukafika Patara, 2tukavona ngilawa yekelanya noko Foinike, tukaingia ho tukatonga. 3Twekinavone Kipro tukahashigha mondo wa kumoso, tukazoka, tukavecha mhaka Sirya, tukaseia Tiro, ambu niho hantu ngilawa yeking’olila mijigho yayo. 4Twekinavone varateri tukaikaa uko misi mfungate; navo vakamvwira Paulo kwa nzinya ya Mpeho Wedi iti asikwee noko Yerusalemu. 5Niho twekinakoloshe ila misi tukavuka, tukatonga; na vantu vose, hamwe na vache vavo na vana vavo, vakatuerekeja, vakatufunya he muzi, tukadunkuta mbaimbai he bahari, tukaomba. 6Twekinaaghanyane tukaingia he ngilawa, navo vakahunduka.

Mhaka Kaisaria

7Twekinakenje ntambo yetu kufuma Tiro tukafika Tolemai; tukavakezya vandughu, tukaikaa havo msi mmwe. 8Hala yavo tukafuma ho, tukafika Kaisaria, tukaingia he nyumba yakwe Filipo m’birikiji wa Mburi Yedi, e mmwe wa vala mfungate, tukaikaa hakwe.

9Uo mntu ekina vana vane e vabora hiryo, vekirota. 10Hala twekiikaa ho misi mingi, hakasea mroti mmwe eitangwa Agabo, efuma Yudea. 11Ekitufikia, akaghuha ngana yakwe Paulo, akakuchunga maghu na mikono, akati, “Mpeho Wedi eti huvu, ‘Huvu nivwo vuntu Vayuda va Yerusalemu venemchunga mwenye ii ngana, na kumwitikija he mikono ya Vakiisanga.’” 12Uswi na vantu va hala hantu twekisikia huvo, tukamsemba iti asikwee uko Yerusalemu. 13Niho Paulo akagharusha, “Hanini mweketa huvo, mweia na kunibaa ngoro? Ambu hemi, shigha neri kuchungwa, mira nekuringanye hata kukomwa uko Yerusalemu vuntu vwa izina la Mfumwa Yesu.” 14Ekinasue mburi yetu, tukahuja, twekiti, “Kikundire cha Mfumwa nakifumane.”

Mhaka Yerusalemu

15Misi ila yekivecha tukatika ntanu jetu tukakwea Yerusalemu. 16Varateri kumwe va Kaisari vakatonjanya na uswi, vena ne Mnasoni, mntu wa Kipro, mrateri wa kae, eye twenereikaa hakwe.

Paulo ekukundanya na Vakristo va Kiyuda

17Twekinafike Yerusalemu vandughu vakatughuhia na kuizihirwa. 18Msi wa keri Paulo akaingia hakwe Yakobo hamwe na uswi, na vaghosi vose vekirewaho. 19Ekinavakezye, akavagaiya mburi jose mwe mwe, vuntu Mrungu ejiketie he Vakiisanga kwa ndima yakwe. 20Navo vekisikia vakamkaza Mrungu, vakamti, “Mndughu wetu, wemanyije vuntu Vayuda vala veitikije e viku vijinki, na avo vose vena kiru mno vuntu vwa myomongwa. 21Navo vevwirirwe mburi jako, iti uvacheja Vayuda vose vala vetue he Vakiisanga kumshigha Mose, wekivati iti vasitavane vana vavo neri vasiratere misimo yavo. 22Iki cheneve nini? Ambu nire sari venesikia iti waza. 23Heicho keta sa vuntu twekuvwira: Aha hetu hena vantu vane vena malape. 24Vaghuhe uvaihie ukuzerije hamwe navo, nesa vaenje mitwi yavo, niho vantu vose vemanya iti jila mburi jako vevwirirwe si ja idi, mira we mwenye utongia he kugurisha myomongwa. 25Mira mburi ja vala veitikije vefuma he Vakiisanga, twekwnjije kuandika na kuchwa iti, vo vakurinde he vintu vyetasiwe he majeni, na sakame, na kila chetesikwa, na kushinda.” 26Niho Paulo akaghuha vala vantu, na msi wa keri akakuzerija ye mwenye hamwe navo, akaingia he nyumba ya mtaso, ekiukula mburi ya kukolosha misi ya kukuzerija kwavo, na itasi lifunywe vuntu vwa kila mmwe wavo.

Mkede wa uko Yerusalemu, kugurwa kwakwe Paulo

27Ila misi mfungate yezengelele kukoloka, Vayuda vefuma Asia, vakamvona he nyumba ya mtaso, vakasembeka vantu vose, vakamgura, 28vakalonza vekiti, “Vomeni Vaisraeli, tughenjeni! Uu niye ula mntu echeja vantu vose kila hantu vya kubera mbari yetu na myomongwa na aha hantu. Kangi kuvecha ivyo, aingija Vagriki he nyumba ya mtaso, akajiraja aha hantu hezerire.” 29Ambu vemvonie Trofimo, Mwefeso, kula he muzi, vakadunganya iti Paulo amwingija he nyumba ya mtaso. 30Muzi wose ukachika, vantu vakavungana fia fia, vakamgura Paulo, vakam’bulula, vakamfunya he nyumba ya mtaso; hala indi nyivwi jikafingwa. 31Hala vekienda nzia ya kumkoma, mburi ikamfikia akida m’baha wa ihindo la vasikari iti muzi wose wa Yerusalemu wavulughika. 32Hala indi akaghuha vasikari na vaakida, akavaseia fia. Navo vekimvona akida m’baha ena na vasikari vakashigha kum’bigha Paulo. 33Ingeri ula akida m’baha akamfikia, akaamgura, akaazera iti achungwe na minyororo miri, akavwija iti, “uu ni ani, kangi eketieni?” 34Va kumwe he lula luvungano vakalonza vakateta huvu, na vangi huvu. Niho ekisaidima kumanya mburi nezo, vuntu vwa kila kilonzo akaazera iti aingijwe na he iboma. 35Niho Paulo ekifika he ngazi, akatikwa ni vasikari, nesa vamkanie he ivoo la vantu. 36Ambu eraterwe ni vantu vajinki velonzisha vekiti, “Uu navushwe.”

37Hala Paulo ekiingijwa na he iboma, akamti ula akida m’baha, “Unikundija nikuvwire kintu?” Naye akati, “Uidima kuteta Kigriki? 38Siti niwe ula Mmisri eye he misi yevechije esembeke vantu na kutonja vala varekoma viku vine noko nyika?” 39Paulo akati, “Mi ni Myuda, mntu wa Tarso, muzi wa Kilikia, mntu wa uo muzi esi msoka. Nikusemba unikundije nitete na ava vantu venye va aha.” 40Niho ekinamkundije, Paulo akaimuka he vigombe, akavahaja na mkono. Hekinahuje chwi, akateta navo kwa kitetire cha Kiebrania, ekiti,

Currently Selected:

NDIMA JA NTUME 21: CHSUNT67

Highlight

Copy