NDIMA JA NTUME 20

Paulo uko Makedonia, Ugriki na Troa

1Kila kilonzo chekinasie Paulo akavatumija varateri, akavarunga, akavaaghanya, nyuma akavuka akatonga noko Makedonia. 2Ekikenja kuvecha myondo iyo na kuvatandanya kwa viteto vijinki, akafika Ugriki.

3Akaikaa uko mieji mitatu; akaenda kutonga Sirya, kwa nzia ya he bahari; kila Vayuda vemketia makombere, akadunganya kuhunduka na nzia ya Makedonia. 4Vantu vetonjanye naye ni ava: Sopatro M’beroya, mwana Piro, ne Aristarko ne Sekundo vantu va Tesalonike; ne Gayo mntu wa Derbe, ne Timoteo; ne Tikiko ne Trofimo vantu va Asia. 5Mira vo veturongorire vakaretuinda uko Troa. 6Misi ya kula mikate yesikararrashwe yekinasie, tukaingia he ngilawa uko Filipi, tukafika uko Troa, ntambo ya misi misano tukaikaa ho misi mfungate.

Eutiko

7Niho msi wa kuvoka juma twevungane kubendua mkate; Paulo akavabirikira, erekere kuzoka hala yavo hakwe; naye akazika kuteta mhaka kio ghati. 8Hekina taa nyingi he ila gu hantu twevunganie. 9M’bwange mmwezu eitangwa Eutiko eikae si he idirisha, akaemeiwa mno ni lughohe; Paulo ekizika kubirikira akaluviwa ni lughohe, akagwa kufuma he gu ya katatu, akavushijwa efwie. 10Paulo akasea, akamgwia, akamshashata, akati, “Musilonze ambu ereho.” 11Akakwea na gu akabendua mkate, akala, akazika teta navo mhaka chaheyavo, niho akatonga. 12Vakamwete ula m’bwange ereho, vakatundana haiwa.

Ntambo mhaka Mileto

13Mira uswi tukarongora kutonga he ngilawa, tukazoka mhaka Aso, twekienda kumpakija Paulo uko, ambu nivwo vuntu eazere, ye mwenyye ekichwie kutonga na maghu. 14Ekinatufikie uko Aso, tukampakija, niho tukafika Mitilene. 15Tukavuka uko nangilawa, aha heyavo tukafika hantu heyoyane na kio; msi wa katatu tukafika Samo, tikaikaa Trogilio; msi wa kane tukafika Mileto. 16Ambu Paulo echwie kuvecha Efeso na ngilawa, nesa asirekaisha uko Asia; ambu ekisara iti chekive afike Yerusalemu msi wa Pentekoste.

Paulo eaghanya Vaghosi va Efeso uko Mileto

17Na kufuma Mileto Paulo akatuma vantu kutonga Efeso, kuvaitanga vaghosi va kanisa. 18Vekinafike hakwe akavati,

“Unywi venye mwemanyije vuntu neikee henyu misi yose too msi wa kuvoka kuvata aha Asia, 19Vuntu nemtumikie Mfumwa kwa kukuduisha kwose na kwa masoji, na he mighesho yenifikiie vuntu vwa makombere a Vayuda; 20iti sishighie kumubirikira kintu chochose cheveiwa kumughenja, mira nemuchejije boo, kangi nyumba kwa nyumba, 21nekiteta vuonwa he Vayuda na Vagriki, vachwe mti he Mrungu na kumwitikija Mfumwa Yesu Kristo. 22Ikira, rerehani, nitonga Yerusalemu nechungiwe he ngoro, neri nesimanyije vyo vyenenifikia uko; 23esire iti, he kila muzi Mpeho Wedi enivonyesha iti, vichungo na kurierieshwa vyeniindie. 24Mira sitara moo wangu iti ni kintu cha zora mbaha hangu, sa kukolosha ntambo yangu, na ndima ila neiinkiwe ni Mfumwa Yesu, kuteie vuonwa Mburi Yedi ya mbonea ya Mrungu. 25Na iki rerehani, mi nemanyije iti unywi vose nemubirikire vufumwa vwa Mrungu, nekivecha uko na uko, temukarenivona vusho vwangu. 26Heicho niteta vuonwa he unywi vose uu msi wa yoo, kuti nazera he sakame ya kila mntu. 27Ambu tehena mburi ya Mrungu neri mwe neshighie kumubirikira.

28“Kurindeni unywi venye hamwe na ifio lose lila Mpeho Wedi emuvikiie kuliimukia, na kurisha kanisa ya Mfumwa ekumaziie na sakame yakwe mwenye. 29Ambu nemanyije iti, nyuma ya kuvoka, maghinga makai eneingia henyu, esikavoneie ifio; 30kangi he unywi venye henevuka vantu, veneteta vyelingame, nesa vajute varateri na hevo. 31Heicho yaani kiavi mwekikumbuka iti miaka mitatu, sishighie kuchunda kila mntu kwa masoji, kio na msi.

32“Iki ana nimuvika he mikono ya Mrungu na he kiteto cha mbonea yakwe echo cheidima kumujenga, na kumuinka vupali hamwe na vala vezerire vose. 33Siketie tama ya fedha neri dhahabu neri suke ja mntu. 34Unywi venye mwemwnyije iti mikono yangu yerongie ndima he vila vyenitara mi na vya vala vekina nami. 35He vintu vyose nemuvonyeshe kuti, he kugura ndima huvo, kimutara kuvaghenja vasoka, na kukumbuka viteto vya Mfumwa Yesu sa vuntu etetie ye mwenye, ‘Ni chedi kuinkija kuvecha kuinkwa.’”

36Ekikenja kuteta huvo, akadunkuta, akaomba hamwe navo vose. 37Vose vakaia mno, vakamgwia Paulo he singo, vakam’bwita, 38vakaingiwa ni kuvika haiwa he iyo mburi etetie iti tevekaremvona kangi vusho vwakwe. Vakamwerekeja mhaka he ngilawa.

Currently Selected:

NDIMA JA NTUME 20: CHSUNT67

Highlight

Copy