NDIMA JA NTUME 19

Vareteri vakwe Yohane M’batizi uko Efeso

1Hala Apolo eho uko Korinto ekikenja kuvecha ghati he masanga a migongo akafika Efeso, akakintana ho na varateri vasiku. 2Akavavwija, “Aho hantu mwaitikija, mweghuhie Mpeho Wedi?” Vakamgharusha, “Hai, neri kusikia iti hena Mpeho wedi tetunasikia.” 3Akavavwija, “Hama mwebatizwe m’batizo ani?” Vakati, “He m’batizo wakwe Yohane.” 4Paulo akati, “Yohane ekibatize m’batizo wa kuchwa mti, ekivati vantu vamwitikije ula eneza nyuma heye, eye Yesu.” 5Vekinasikie huvo, vakabatizwa he izina la Mfumwa Yesu. 6Niho Paulo ekinavavikie mikono, Mpeho Wedi akavaseia; vakavoka kuteta mitetire migheni na kurota. 7Vose neki vantu va kiume ikumi na veri.

Paulo uko Efeso

8Akaingia he sinagogi, akateta kwa ndekero hantu ha mieji mitatu, ekivijanya na vantu na kuvajuta na he mburi ya vufumwa vwa Mrungu. 9Mira vangi vakaoka vatiri, vakasua kuitikija, vakarara iyo nzia mozya ya mvungano; niho akavuka, akavashigha, akatanya varateri hevo, akavwijanyana na vantu kila msi he idarasa la mntu mmwe eitangwa Tirano. 10Mburi iji jikaketika huvu hantu ha miaka miri, mhaka vose vetue Asia vakasikia kiteto cha Mfumwa, Vayuda na Vagiriki.

11Mrungu akavusha virumo he mikono yakwe Paulo kuvecha kiringanyo; 12hata vawaji vakaetiwe vitambaa na nguo jefuma he mwiri wakwe, mawaji avo akavashigha, na mpepo mbivi jikafuma hevo.

13Vayuda kumwe e varehunga mpepo vekianga anga, navo vakaghesha kulanga izina la Mfumwa Yesu, he vala vena mpepo mbivi, vekiti, “Nimurighia he Yesu ula ebirikirwa ni Paulo.” 14Na vala veketie huvo neki vana mfungate va mtasi m’baha wa Kiyuda, eitangwa Sikewa. 15Ila mpepo mbivi ikagharusha, ikavati, “Yesu nimmanyije, ne Paulo neremmanya; mira unywi muvani?” 16Ula mntu egurirwe ni mpepo mbivi akavajinkia veri, akavaidika, vakaaha kufuma he ila nyumba veho kituhu na vionda.

17Iyo mburi ikamanyika he Vayuda vose na Vagiriki vetue Efeso, vose vakagurwa ni fole, na izina la Mfumwa Yesi likakazwa. 18Vajinki he vala veitikije vakaza vakaghamba mabanu, vekifunyirija mihiro yavo. 19Na vantu vajinki he vala vekironga mburi ja mavughanga, vakavunganya vitabu vyavo vakavishota mozya ya vantu vose; vakatara zora yavyo, vakavona iti ifika fedha viku makumi masano. 20Huvo nivwo vuntu kiteto cha Mfumwa chezikie na kuvota na nzinya.

Paulo eringanya ntambo

21Ivyo vyekisia Paulo akarekera he ngoro yakwe kuti ekikenja kuvecha Makedonia na Akaya, atonge Yerusalemu, ekiti, “Nekikenja kuikaa uko, kinitara kuvona hata Roma.” 22Akatuma vantu veri he vala vemrongia ndima, kutonga Makedonia, ni Timoteo ne Erasto, ye mwenye akaikaakaa kula Asia.

Mkede wa Efeso

23He igheri ilo hakuvuka mkede esi mdori he mburi ya ila nzia. 24Ambu hekina mntu eitangwa Demetrio, mreshana fedha, ndima yakwe ne kuhareha vujumba vwa fedha vwa kumtasia Artemi, akavamazia vafundi mari nyingi. 25Akavavunganya avo hantu hamwe na vangi va ndima iyo iyo, akavati, “Vomeni, mwemanyije iti vuzuri vwetu vufuma he ndima ii. 26Kangi muvona na kusikia, iti si aha Efeso du, mira hata Asia yose chwe, uo Paulo ekengereja vantu vajinki na kuvagharusha madunganyo avo, ekiti iyo mirungu yeharehwe na mikono siyo mirungu. 27Si kuti ii ndima yetu du yena ntenga ya kubereshwa, mira hata nyumba ya kumtasia mrungu m’baha wa kiche eye Artemi inefalajwa, na kuvushijwa ngazo yakwe, eye Asia yose na vamasanga ose vemtasa.” 28Vekinasikie huvo vakakwewa ni oro, vakalonza vekiti, “Artemi wa Vaefeso niye m’baha.”

29Mizu wose ukaizua kilonzo, vakadindika kwa ngoro mwe vakaingia he itanga la kuseghijija, aho vekinavagure Gayo ne Aristarko, vantu va Makedonia vekizokie hamwe na Paulo. 30Paulo ekienda kuingia ghati he vantu, varateri vasimkundije. 31Na vabaha kumwe va Asia, vala e vambwie vakwe, vakamtumia vantu, vakamsemba iti asikuingije he itanga la kuseghijija. 32Vangi vakalonza huvu na vangi huvu; ambu ula mzomano waulughika, na vajinki hevo vasimanye cho cheshigha vekivungana. 33Vantu kumwe vakamfunya Aleksanda he luvungano, eye Vayuda vemvikie mozyya he vantu. Aleksanda akavakonya kwa mkono ekienda kukukania mozya he vantu. 34Mira vekinamanye iti ye ni Muyuda, vakalonza vose kwa izii imwe hantu ha saa mbiri, vekiti, “Artemi wa Vaefeso niye m’baha.”

35Karani wa muzi ekikenja kuhoreja vantu, akati, “Vomeni Vaefeso, ni ani esimanyije iti muzi wa Efeso urinda nyumba ya mtaso, yakwe Artemi m’baha, na wa kintu kila chegwie kufuma uko wanga? 36Heicho kwa kuti ijo mburi tejive kukanwa, kimutara kuhuja; musikete kituru. 37Ambu mwevaetie ava vantu, neri vesiivie vintu vyya nyumba ya mtaso kana kumfalaja mrungu wetu wa kiche. 38Kakicha Demetrio na mafundi veho hamwe naye vena masa na mntu, vitala viho, na valao veho, navasitakane. 39Mira kakicha muna mburi ingi, ineherehwa he mzomano ula wevaie. 40Ambu tuna mpwasi ya kusitakwa vuntu vwa uu mkede wa msi wa yoo, wesina kiusho; na he iyo mburi twesikaidime kukukania he uu mzomano.” 41Ekinatete huvo, akadimua mzomano.

Currently Selected:

NDIMA JA NTUME 19: CHSUNT67

Highlight

Copy