NDIMA JA NTUME 18

Uko Korinto

1Nyuma ya ijo mburi, Paulo akafuma Atene, akatonga Korinto. 2Akavona Myuda eitangwa Akaila, emoghiwe uko Ponto, naye niho aza kufuma Italia, hamwe na mche wakwe eitangwa Priskila, ni hala Klaudio eamore Vayuda vose vafume uko Roma, naye akafikia havo; 3na kila ndima yavo ya vufundi e mwe, akaikaa havo, vakaronga ndima hantu hamwe ambu ne varechuma mahema. 4Akafunya mavwijo akwe kila sabato he sinagogi, akaghesha kuvajuta Vayuda na Vagiriki.

5Aho Sila ne Timoteo vekinasee kufuma Makedonia, Paulo akazikiwa mno ni kila kiteto, akavatetia Vayuda vuonwa iti Yesu niye Kristo. 6Vekikanana naye na kumrara, akakukunta suke jakwe, akavati, “Sakame yenyu imuikaie he mitwi yenyu, mi nazera, kuvokia iki ninetonga he Vakiisanga.” 7Akavuka hala akaingia he nyumba ya mntu eitangwa Tito Yusto, emfoleka Mrungu, nyumba yakwe yekiziane na sinagogi. 8Krispo, m’baha wa sinagogi akamwitikija Mfumwa hamwe na kaa yakwe yose. Hata Vakorinto vajinki vekisikia, vakaitikija vakabatizwa. 9Mfumwa akamvwira Paulo na kio kwa mvonyesha kimpeho: “Usifoleke, mira teta neri usihuje, 10ambu mi niho hamwe nawe, tehena mntu enekuomanya neri kukuketia kivivi, ambu nina vantu vajinki he muzi uu;” 11akaikaa uko hantu ha mwaka mmwe na mieji mtandatu, ekicheja kiteto cha Mrungu ghati hevo.

Galio ne Paulo

12Ingeri Galio ekinaoke mlao wa Akaya, Vayuda vose vakamvukia Paulo kwa ngoro mwe, vakamtika mozya he kichumbi chalahia, vekiti, 13“Uu mntue vajuta vantu iti vamtase Mrungu, kitasire chesiveiana na kiziomo chetu.” 14Paulo ekienda kuvushija momo wakwe, Galio akavati Vayuda, “Unywi Vayuda, nanga hena masa kana mburi ingi mbivi nekimusikija. 15Mira kakicha ni viteto vya nkani kana mazina kana kiziomo chenyu, ivyo chweni venye, ambu mi sikundie kuoka mrachwa vintu sa ivyo.” 16Akavakinya vavuke mozya he kichumbi chalahia. 17Navo vose vakamgura Sostene m’baha wa sinagogi vakam’bigha hala mozya he kichumbi chalahia. Neri asighoshe iyo mburi iti ni kintu.

Paulo ehunduka Sirya

18Ivyo vyekivecha Paulo akaikaa wa aho misi mingi, nyuma akavaaghanya vandughu, akaingia he ngilawa kutonga Sirya, hamwe ne Priskila ne Akila; uko Kenkrea akaenja mtwi wakwe; ambu ekina malape. 19Vakafika Efeso, akavashigha ho. Ye mwenye akaingia he sinagogi, akavwijanyana na Vayuda. 20Vekinamwende iti aikae havo irongo ieza kuvecha, asikunde. 21Mira akaaghana navo ekiti, “Ninehunduka henyu Mrungu ekinighenja. Akavuka uko Efeso na ngilawa. 22Ekinafike Kaisaria, akakwea kukezya kanisa, akanasea noko Antiokia. 23Ekinakenje kuikaa uko igheri isiku akavuka, akavechija ghati ya isanga la Galatia na Frigia nesa avadindije varateri vose kila hantu.

Apolo uko Efeso

24Niho Myuda mmwe eitangwa Apolo, emoghiiwe uko Aleksandria, e mntu ena icha, akafika Efeso, naye ekimanyije nezo maandiko. 25Uo mntu ekichejijwe nzia ya Mfumwa, naye kila ekiakwa ni ngoro, akavoka kuteta na kucheja kwa nezo mburi jakwe Yesu; naye ekimanyije m’batizo wakwe Yohane du. 26Akavoka kuteta kwa ndekero he sinagogi; Priskila ne Akila vekimsikija vakamtika na havo, vakamhererejija nzia ya Mfumwa nezo kukela. 27Hala ekienda kukelanya bahari atonge Akaya, vandughu vakamsarija, vakavaandikia varateri iti vamghuhie; naye ekifika ho akavaghenja nezo vala veitikije kwa mbonea. 28Ambu evavotie Vayuda pere mozya he vantu vose, ekivonyesha he maandiko, iti Yesu niye Kristo.

Currently Selected:

NDIMA JA NTUME 18: CHSUNT67

Highlight

Copy