NDIMA JA NTUME 17

Uko Tesalonike

1Vekinaveche Amfipoli na Apolonia vakafika Tesalonike; aho hantu hekina sinagogi ya Vayuda. 2Ne Paulo sa vuntu emanyere, akaingia hala hantu veho, akavwijana navo he mburi ya maandiko sabato ntatu, 3ekiafunukura na kuvavonyesha iti chemvaie Kristo kurishwa vwasi na kuvuka he vefwie; na kuti, uo Yesu nemwuukulila mburi yakwe, niye Kristo. 4Va kumwe hevo vakaitikija, vakagurana ne Paulo ne Sila; na Vagiriki vala vemfoleka Mrungu, vajinkisha, na vache varongori esi vaghere.

5Mira Vayuda vakasikia kiru, vakakughuhira vantu vasiku e vantu du vesina nguma yedi, navo vakavunganya mavungano, vakavulugha muzi, vakaswia vantu va kaa yakwe Yasoni, vakaenda kuvatonja he vantu va muzi. 6Vekinavasove vakam’bulula Yasoni na vandughu kumwe na he vabaha va muzi, vekilonza, vekiti, “Ava vantu vegharushe isanga lose, vaza na kunu, 7ne Yasoni akavaghuhia; na ava vose veronga vintu vyetekane na maamoro akwe Kaisari, vekiti, ‘Hena mfumwa ungi, eitangwa Yesu.’” 8Lula luvungano na vabaha va muzi vakavulughika aho vesikia huvo. 9Vekinakenje kumrihija Yasoni ikome na vaghenji vakwe, vakavashigha vakutongire.

Uko Beroya

10Hala indi avo vandughu vakamtonja Paulo ne Sila na kio noko Beroya; navo vekinafike uko vakaingia he sinagogi ya Vayuda. 11Vantu ava ne kivedi kuvecha vala va Tesalonike, ambu vo veghuhie kiteto na ngoro yerongeke, vakaendisha he maandiko misi yose nesa vavone iti nirevwo kana ze. 12Niho vantu vajinki hevo vakaitikija, hata vache va shina va Kigiriki na vome esi vaghere. 13Mira Vayuda va Tesalonike vekinamanye iti kiteto cha Mrungu kibirikirwa hata uko Beroya ni Paulo, vakaswi uko naho, vakaililisha na kurieriesha mavungano. 14Hala indi vala vandughu vakamtonja Paulo noko mbaimbai he bahari, mira Sila ne Timoteo vakashala uko. 15Mira vala vemwerekeje Paulo, vakamtonja mhaka Atene. Navo vekikenja kuinkwa maazero kuvatonjija Sila ne Timoteo, iti vasiikaishe kumratera, vakatonga.

Uko Atene

16Aho Paulo ekivainda uko Atene, ngoro yakwe ikavihiwa ekivona vuntu muzi weizue majeni. 17Uko he sinagogi akagaya na Vayuda na vala vemfoleka Mrungu, na vala vekintana naye misi yose uko he kiete. 18Mira kumwe he vala venye viugho va Kiepikureo na va Kistokio vakakintana naye; kumwe vakati, “Mrundu uu eenda kuteta ni?” Vangi vakati, “Eikee sa ebirikira mburi ja mirungu migheni, kwa kila ebirikira mburi yakwe Yesu na ua kuvuka he vefwie.” 19Vakamgura, vakamtika Areopago, vakati, “Tuidima kumanya ii michejire misha weteta? 20Ambu uete mburi ngeni he masikio etu, tuenda kumanya iti ni mburi ani.” 21Ambu Vaatene vose na vagheni vetue ho tehena kingi vekienda, esire kuteta kana kusikija mburi shaa.

Paulo ebirikira uko Areopago

22Paulo akaimuka hala ghati he Areopago, akati, “Unywi vantu va Atene, navona he kila mburi unywi mu vantu vedunganya mno mburi ja mitasire. 23Ambu nekivecha vecha na kurereha vila mwevitasa, nevonie meza ya mtaso yeandikwe viteto ivi: ‘He Mrungu Esimanyike.’ Uo mwemshimia mwesimmanyije, niye nemubirikira mburi yakwe. 24Mrungu eye ebajije si ii na vyose vyeho heyo, esitue he nyumba jejengiwe na mikono, ambu ye ni Mfumwa wa uko wanga na kunu si. 25Neri tehirirwa na mikono ya vantu sa ena cho esovie, ambu niye einka vose moo, na muho na vintu vyose. 26Kangi niye eghoshije mbari jose ja vantu jifume he mntu mmwe, kangi jitue he masanga ose, akajivikia magheri na mihaka na hantu venetua, 27nesa vamwende Mrungu na ere kwa kubabata vamvone, nziaho teho hae na kila mmwe wetu. 28Ambu ndeni heye tuna moo, tutonga, tuna kuho kwetu, sa vuntu mmwe wenyu mreuka nyimbo etetie, ‘Ambu uswi vose tu va lukolo lwakwe.’ 29Heicho kila uswi twe lukolo lwa Mrungu, tekitutara kudunganya iti Kimrungu ni fwanyanyi ya dhahabu kana fedha kana ibwe, evyo vintu vyeteharehwa ni kucha kwa vantu.

30Lila igheri la kusamanya, Mrungu akakaa sa esivona, mira iki eazera vantu vose va kila hantu vachwe mti, 31ambu evhwie kiaze cha kulahia masanga ose kwa kitea, ekituma mntu ula emsaghure, naye evainkie vantu vose ndereko ya vintu ivi hala ekimvusha he vefwie.

32Niho vekinasikie iyo mburi ya kuvuka he vefwie, kumwe vakasola, vangi vakati, “He iyo mburi tunekusikija wa.” 33Niho Paulo akavuka akavashigha. 34Vantu va kiume kumwe vakagurana naye, vakaitikija, hevo hemna Dionisio m’baha wa kila kitala cheitangwa Areopago, na mntu wa kiche eitangwa Damari, na vantu vangi hamwe navo.

Currently Selected:

NDIMA JA NTUME 17: CHSUNT67

Highlight

Copy