NDIMA JA NTUME 16
16
Timoteo ne Paulo vezana uko Listra
1Niho akafika Derbe na Listra; naho hekina mrateri eitangwa Timoteo, ne mwana wa mche wa Kiyuda eitikije, mira vavee neki Mgiriki. 2Uo mntu ena nguma yedi he vandughu veho uko Listra na Ikonio. 3Paulo akamwenda uo atonjanye naye, akamghuha, akamtavana vuntu vwa Vayuda vala veho myondo iyo, ambu vose vemanyije iti vavee ni Mgiriki.
4Ingeri aho vekivecha ghati he ila mizi, vakainka ala maamoro eamorwe ni ntume na vaghosi va uko Yerusalemu, iti vaagure. 5Makanisa akadindijwa he ula mwitikijo, itaro lavo likaongejika kila msi.
Ntambo yakwe Paulo kuvechija Asia ndori
6Vakavecha he isanga la Frigia na Galatia, vekisujwa ni Mpeho Wedi vasibirikire kila kiteto ngwa uko Asia. 7Vekifika hafuhi na Misia, vakaghesha kutonga Bitinia, mira Mpeho wakwe Yesu esivakundije. 8Vakavecha Misia vakasea na Troa. 9Uko kio Paulo akavonyeshwa kimpeho, akavona mntu wa Makedonia eimuke, ekimsemba kuti, “Vuka ukelanye na kunu Makedonia, utughenje.” 10Ekinavonyeshwe huvo kimpeho, hala indi tukaenda kutonga Makedonia, kila twamanya nezo iti Mrungu atuitanga kuravabirikira Mburi Yedi.
Paulo ekelanya na Makedonia ekivechija Filipi
11Niho tukavuka na ngilawa kufuma Troa, tukatonga kimozya, tukafika Samotrake, msi wa keri tukafika Neapoli. 12Kufuma aho tukafika he muzi wa Makedonia weitangwa Filipi, ewo muzi m’baha wa lila isanga, hantu Varoma vesamie naho; tukaikaa ho misi mifuhi.
13He msi wa sabato tukafuma na nze he mvera, tukatonga mbaimbai he kianda, twekiti hena hantu ha kuombia; tukaikaa si tukateta na vantu va kiche vevungane aho. 14Mche mmwe eitangwa Lidia, msusuruji wa rangi ya zambarau, wa he muzi wa Tiatira, emfoleka Mrungu, akatusikija, Mfumwa akajuvua ngoro yakwe iti adunganye vila vyetetiwe ni Paulo. 15Ekinabatizwe hamwe na kaa yakwe, akatusemba, ekiti, “Kakicha mwavona iti ni mkitengo he Mfumwa, ingiani he nyumba yangu muikae ho.” Akatuzikia.
16Aho twekitonga na hala hantu ha kuombia, tukazana na mgitu mmwe ena mpepo ya kurota, evamaziie va vavee mari nyingi vuntu vwa kurota kwakwe. 17Akamratera Paulo na uswi ekilonza, ekiti, “Ava vantu ni vandima va Mrungu ula eho uko wanga, vemubirikira nzia ya lukio.” 18Akaketa huvo misi mingi. Paulo akawajwa, akagharuka, akavwira ila mpepo: “Nikuamora he izina lakwe Yesu Kristo, fuma heye!” Ikafuma saa ila ila.
Paulo ne Sila vechungiwe, vakavokejwa
19Vazima vakwe vekivona iti tehena wa ikuji la lumazo iwavo, vakavagura Paulo ne Sila, vakavabulula noko he kiete he vabaha va muzi; 20navo vakavatika he valahi, vakati, “Ava vantu vetukondia muzi wetu, uko ni Vayuda; 21kangi vebirikira mburi ja miikarire yesikundijwa hetu, kuighuhia neri kuiratera, kila uswi twe Varoma.” 22Mavungano vose vakavuka vakavaswia; valahi vakavahambua suke javo kwa nzinya, vakaazera iti vabighwe na nzata. 23Vekinavabighe mno vakavagera he nyumba ya varechungwa, vakamkokontia mlughojo iti avarinde nezo. 24Naye ekinainkwe ilo iazero akavagera he chumba cha ndeni, na kuvagera magogolo he maghu. 25Mira uko kio ghati Paulo ne Sila vakamwomba Mrungu na kumwimbia nyimbo ja kumkaza; na vala vangi vechungiwe vekivasikija. 26Hala indi hakaketa kididimo kibaha he isanga, na malukuta a nyumba ya varechungwa akakushika; hala indi maluvwi ose akajuvuka; vila vyechungiie vose vikahalajwa. 27Ula mlughojo wa nyumba ya varechungwa akaburukana, ekivona iti maluvwi a nyumba ya varechungwa ajuvuka, akajuta mhandwi akaenda kukukoma, kila eti varechungwa vaaha. 28Mira Paulo akateta na wanga kwa nzinya, ekiti, “Usikuketie kivivi, ambu uswi vose turewaha.” 29Akaenda iti taa jietwe, akajinka noko ndeni; ekizingiza kwa fole akavagwia Paulo ne Sila. 30Kangi akavafunya na nze, akati, “Vafumwa vangu, kinitara niketeze nesa nikie?” 31Vakamti, “Mwitikije Mfumwa Yesu niho wenekia, we na kaa hako.” 32Vakamvwira kiteto cha Mfumwa ye na vantu vose veho he kaa yakwe. 33Akavaghuhia saa ila ila ya kio, akavaoja mishiririmba yavo; kangi igheri ilo ilo akabatizwa ye na vantu vakwe vose. 34Akavakweja na he nyumba yakwe, akavaharehia kijo, akaizihirwa mno ye hamwe na vose va kaa hakwe, kila akenja kumwitikija Mrungu.
35Mavukuvuku vala valahi vakatuma vabaha va vasikari, vekiti, “Vavokejeni vala vantu vakutongire.” 36Ula mlughojo wa nyumba ya varechungwa akamwukulila Paulo io mburi, ekiti, “Valahi vatuma vantu iti muchunguwe; heicho iki fumani na nze, kutongireni mpoa.” 37Paulo akavati, “Vetubighie mozya he vantu vose neri vesinatulaha, uko uswi tu Varoma, kangi vakatugera he nyumba ya varechungwa; na iki veenda kutufunya kimpiso? Icho hai, navaze vatufunye vo venye.” 38Vabaha va vasikari vakavaukulila valahi iyo mburi, navo vekisikia iti ni Varoma, vakafoleka. 39Vakaza vakavasemba; vekinavafunye na nze vakavasemba iti vafume he ula muzi. 40Navo vakafuma he kichungo, vakaingia he nyumba yakwe Lidia; vekinavonane na vandughu, vakavatuja, vakatonga.
Currently Selected:
NDIMA JA NTUME 16: CHSUNT67
Highlight
Share
Copy

Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.