NDIMA JA NTUME 15

Vakristo Vakiisanga na myomo Mose

1Hakasea vantu vefuma Yudea, vakavacheja vandughu kuti, “Mwekisatavanwa sa msimo wakwe Mose temukakie.” 2Niho Paulo ne Barnaba vekinakenje kukanana navo na kugharusha kujinki, vandughu vakaazera iti Paulo ne Barnaba na vangi va kumwe hevo, vakwee noko Yerusalemu he ntume na vaghosi vuntu vwa iyo mburi.

3Igheri vekitumwa ni kanisa, vakavecha ghati he isanga la Foinike na Samaria, vekuikula vuntu Vakiisanga vegharuke; vakavazihija mno vandughu vose. 4Vekifika Yerusalemu, vakaghuhiwa ni kanisa na ntume na vaghosi; navo vakavakomia mburi jose Mrungu erongie hamwe navo. 5Mira kumwe he matagwa a Vafarisayo vala veitikije vakaimuka vekiti, “Kitara kutavanwa na kuvaazera iti vagurishe myomo yakwe Mose.”

Chila uko Yerusalemu

6Ntume na vaghosi vakavungana nesa vaidime kudunganya iyo mburi. 7Nkani jekinaoke nyingi Petro akaimuka, akavati,

“Vandughu, unywi mwemanyije iti he misi yevechije, Mrungu esaghure he unywi iti Vakiisanga vasikie Mburi Yedi he momo wangu, vaitikije. 8Na Mrungu eye emanyije ngoro ja vantu, akavatetia vuonwa, ekivainka hata vo Mpeho Wedi, sa vuntu etuinkie uswi. 9Neri teheketie mkanano he uswi navo, ambu ezerije ngoro javo kwa mwitikijo. 10Ikio, hanini mwemghesha Mrungu na kugera igogolo he singo ja varateri, elo vazima vetu neri uswi twesiidime kulitika? 11Mira tuitikija iti uswi savo tunekia kwa mbonea ya Mfumwa Yesu.”

12Niho mvungano wose ukahuja, vakamsikija Barnaba ne Paulo vekivaukulila mburi ja maluvengo na virumo vila erongie navo he Vakiisanga. 13Na avo vekichwa, Yakobo akagharusha, ekiti, “Vandughu, nisikijani:

14“Simoni etukomiie mburi vuntu Mrungu aho kuvoka evarerehe Vakiisanga, nesa asaghure vantu hevo vuntu vwa izina lakwe. 15Na viteto vya varoti vyeteghane nayo sa vuntu cheanwikwe:

16‘Ivi vyekivecha ninehunduka,

Nami ninijenga wa nyumba yakwe Davidi yegwie.

Ninejenga kangi hala hegomoke,

Nami nineiimukija;

17Nesa vantu vala veshele vamwende Mfumwa,

Na vaisanga vose evo izina langu lelangiwe hevo;

18Nivwo vuntu Mfumwa ula eketa ivyo eti.

Iyo mburi yemanyike too kae.’

19“Heicho, mi nichwa huvu: Vala Vakiisanga vemgharukia Mrungu, tusivarishe vwasi; 20mira tuvaandikie iti vatane na maikwe na kutasa miringu, na kushisha, na kula nyama jetesikwa, na sakame. 21Kila too he marika evechije, Mose ekina he kila muzi vo vembirikira; ambu mburi jakwe jekisomwa he sinagogi kila sabato.”

Barua he Vakristo Vakiisanga

22Niho kikavaizihira ntume na vaghosi na kanisa lose kusaghura vantu ghati hevo, na kuvatuma Antiokia hamwe na Paulo ne Barnaba; navo ni ava: Yuda ula eitangwa Barsaba, ne sila, eki vantu vabaha he vandughu. 23Vakavaandikia barua huvu: “Ntume, vandughu na vaghosi, he vandughu vefuma he Vakiisanga mweho uko Antiokia na Sirya na Kilikia. Tumukezya. 24Kila twesikie iti vantu vefumie hetu vemurishije vwasi na viteto vyavo, vekikombosha ngoro jenyu, uswi twesivaazere neri. 25Uswi twavona iti ni chedi kila twaaghana kwa ngoro mwe, kusaghura vantu na kuvatuma henyu hamwe na vakunde vetu Barnaba ne Paulo, 26e vantu veinkije moo wavo vuntu vwa izina la Mfumwa wetu Yesu Kristo. 27Heicho twavatuma Yuda ne Sila, nivo venemwukulila ijo mburi jose vo venye kwa miomo yavo. 28Ambu chemwizihire Mpeho Wedi na uswi iti tusimutwishe mjigho, esire ivyo vyetara, 29iti mutane na vintu vyetasiwe he mirungi na sakame, na nyama jetesikwa, na kushinda. Mwekikuima ivyo muketa chedi. Ikaani mporere.”

30Igheri avo vekinachungwe vakasea noko Antiokia; vekinavunganye vantu vose, vakavainka ila barua. 31Navo vekinaisome, vakaizihirwa he vuntu vwa uko kutujwa. 32Kangi Yuda ne Sila kila vo venye e varoti, vakavachunda vandughu kwa viteto vijinki, vakavadindija. 33Vekinaikae uko misi mighahi, vakachunguwa ni vandughu iti vahunduke na vumpoa he vala vevatumie.

34Mira kikamwizihira Sila kuikaa uko. 35Paulo ne Barnaba vakaikaa uko Antiokia vekicheja na kubirikira kiteto cha Mfumwa hamwe na vantu vangi vajinki.

Paulo ne Barnaba vetana

36Misi mingahi yekivecha Paulo akamti Barnaba, “Heriko tuhunduke tererereha vaandughu he kila muzi hantu twebirikire kiteto cha Mfumwa, iti veikee ze.” 37Barnaba akaenda kutonjanya ne Yohane eitangwa Marko. 38Mira Paulo teizihirwe kumtika uo evashighie kula Pamfulia, esitonjanye navo he iyo ndima. 39Hakaketa nkani hevo, vakatana; Barnaba akatonjanya ne Marko, vakazoka na ngilawa noko Kipro. 40Mira Paulo akamsaghura Sila, akavuka, ekiombiwa mbonea ya Mfumwa ni vandughu. 41Akavecha noko Sirya na Kilikia ekidindija makanisa.

Currently Selected:

NDIMA JA NTUME 15: CHSUNT67

Highlight

Copy