NDIMA JA NTUME 14

Paulo ne Barnaba uko Ikonio

1Ingeri uko Ikonio vakaingia hamwe he sinagogi ya Vayuda; vakabirikira wa ihindo ibaha la Vayuda na Vagiriki vakaitikija. 2Mira Vayuda vesiitikije vakasembeka Vakiisanga na kuvalinganya na vandughu.

3Niho vakaikaa uko igheri ieza, vekiteta kwa ndereko vuntu vwa Mfumwa, eye etetia iyo mburi yakwe ya mbonea vuonwa, ekivainka maluvengo na virumo viketwe ni mikono yavo. 4Mira vantu va muzi vakaghavikana, va kumwe vakaimuka monda wa Vayuda, na va kumwe mondo wa ntume. 5Hekinakete mvinzoko wa Vakiisanga na Vayuda, hamwe na vabaha vavo, vakavarisha vwasi na kuvabigha mabwe, 6navo vakamanya iyo mburi, vakaaha noko Listra na Derbe, mizi ya Likaonia, na masanga eho mondo na mondo; 7vakaikaa uko vekibirikira Mburi Yedi.

Uko Listra

8Uko Listra hekina mntu mmwe msoka wa maghu, eholoje too kufuma he ndeni ya mlala wavo, esinatonga neri. 9Uo mntu akamsikija Paulo aho ekiteta; Paulo naye akamrerehisha, akamvona iti ena mwitikijo wa kubanjwa; 10akateta na izii ibaha, ekiti, “Imuka na maghu ako urongeke!” Akaimuka hala indi akavata. 11Ala mavungano vekivona vila vyeketwa ni Paulo, vakalonzisha, vekiteta he Kilikokia: “Mirungu yatuseia he fwanyanyi ya kivantu!” 12Vakamwitanga Barnaba: “Zeu,” ne Paulo: “Herme,” kila eye mzateta. 13Mtasi wa Zeu, eye nyumba yakwe ya mtaso yeho mozya he ula muzi, akaete nzao na ngata ya virangare mhaka mpengeni, ekienda kutasa hamwe na mavungano.

14Mira ntume Barnaba ne Paulo, vekisikia iyo mburi, vakabaja suke javo, vakadindika vakaingia he ala mavungano, vakalonzisha, 15vekiti, “Vomeni, hanini mweketa huvu? Na uswi turevantu sa unywi, tumubirikira Mburi Yedi, iti mugharuke na kushigha ivyo vintu vyesina nzia, mumgharukie Mrungu eho moo, eye erumbie wanga na masanga na bahari na vintu vyose vyehoho; 16eye he ilo igheri levechije evashighie vaisanga vose vatonge he nzia javo venye. 17Mira teshighie kukutetia vuonwa, ambu erongie vyedi, ekimuinka mvua kufuma uko wanga, na magheri a lufindiki, ekiighusha ngoro jenyu kijo na kuizihirwa.” 18Kwa vwasi he ivyo viteto vakavakinda vantu vasivatase.

19Mira hakaza Vayuda vefuma Antiokia na Ikonio, vakagera vantu shongo, vakam’bigha Paulo mabwe, vakam’bulula noko chanze he muzi, vekiti akenja kufwa. 20Mira varateri vekimjunguluka myondo yose, akaimuka, akaingia he muzi; hala yavo hakwe akafuma, akatonga noko Derbe hamwe ne Barnaba.

Kuhunduka uko Antiokia

21Niho vekinabirikire Mburi Yedi he ula muzi, na kuvona varateri vajinki, vakahunduka noko Listra na Ikonio na Antiokia, 22vekidindija ngoro ja varateri na kuvachunda vaikae he ula mwitikijo, na kuti kitutara kuingia he vufumwa vwa Mrungu kwa nzia ya mavwasi majinki. 23Vekinakenje kuvavikia vaghosi he kila kanisa, na kuomba hamwe na kukuima hamwe navo, vakavavika he Mfumwa, eye vemwitikije. 24Vakavecha ghati ya Pisidia, vakafika Pamfulia. 25Vekinabirikire kiteto ngwa uko Perge vakasea mhaka Atalia.

26Kufuma aho vakaingia he ngilawa, vakatonga noko Antiokia; uko niho hantu vekiombiiwe mbonea ya Mrungu he iyo ndima vekenjije kuikolosha. 27Vekifika vakavunganya kanisa, vakavaukulila mburi jose Mrungu ejiketie hamwe navo, na iti Vakiisanga vajuvuiwa luvwi lwa mwitikijo. 28Vakaikaa uko hamwe na varateri ikenda esi idori.

Currently Selected:

NDIMA JA NTUME 14: CHSUNT67

Highlight

Copy