NDIMA JA NTUME 13

Kanisa uko Antiokia

1Na he kanisa leho uko Antiokia hekina varoti na vacheji, navo ne Barnaba, ne Simioni eitangwa Nigeri, ne Lukio wa Kirene ne Manaeni ula mjinawe Mfumwa Herode veamwie ivee imwe, ne Sauli. 2Igheri hala vekimhirira Mfumwa na kukuima, Mpeho Wedi akati, “Nivikieni Barnaba ne Sauli he ila ndima nevaitangie.” 3Vekinakuime na kuomba, vakavavikia mikono, vakavachungua iti vatonge.

Barnaba ne Sauli uko Kipro

4Navo vekitonjwa ni Mpeho Wedi, vakasea noko Seleukia; kufuma uko vakazoka he bahari mhaka Kipro. 5Hala veho uko Salimisi vakabirikira kiteto cha Mrungu he sinagogi ja Vayuda. Navo vekina ne Yohane ekivarongia ndima.

6Vekinaveche ghati he kirua chose mhaka Pafo, vakavona mntu mmwe, mghanga wa Kiyuda, e mroti wa mongo, eitangwa Bar-Yesu, 7uo ekina na mlao eitangwa Sergio Paulo, e mntu echee; uo mlao akavaitanga Barnaba ne Sauli iti vaze hakwe, akaenda kusikia kiteto cha Mrungu. 8Mira ula mghanga Elima, (akakanana navo, ekienda kigharusho cha izina lakwe), akakanana navo, ekienda kumgharusha ula mlao iti ashighe ula mwitikijo. 9Sauli eye eitangwa Paulo, ekiizua Mpeho Wedi, akamtunkulila, akati, 10We weizue viavya na vuvivi vwose, we mwana wa Shetani, munzo wa kitea chose, tushigha kukombosha nzia ja Mfumwa jerongeke? 11Heicho, rereha, mkono wa Mfumwa ukugura, nawe uneoka ituntu, usivone izuva kamtungo.” Hala indi ijumbi likamgwia na kija, akatumputumputa, ekienda mntu emgura mkono na kumrongorira. 12Niho ula mlao ekivona ivyo vyaketika, akaitikija, akamaka michejire ya Mfumwa.

Mabirikiro akwe Paulo he Vayuda yuko Antiokia ya Pisidia

13Niho Paulo na vaghenji vakwe vakavuka vakazoka na ngilawa, kufuma Pafo vakafika Perge, he Pamfulia. Yohane akavashigha, akahunduka noko Yerusalemu. 14Mira vo vakavuka uko Perge, vakavecha ghati he isanga, vakafika Antiokia, muzi wa Pisidia; msi wa sabato vakaingia he sinagogi, vakaikaa si. 15Igheri, myomongwa ikanasomwe na kitabu cha varoti, vabaha va sinagogi vakatuma hevo, vakati, “Vandughu, kakicha muna mburi yevaghenja ava vantu, iteteni.”

16Paulo akaimuka, akavahaja na mkono, akati, “Unywi vome va Israeli, na unywi mwemfoleka Mrungu, sikijani! 17Mrungu wa ava vantu Vaisraeli evasaghure vazima vetu, avo akavaghosha vabaha aho vecheriikaa sa vagheni he isanga la Misri, na he mkono wevushijwe, akavafunya, akavarongorira. 18Akavagumirijija uko nyika miaka makumi mane. 19Ekikenja kukonda jila mbari mfungate he isanga la Kanani, akavainka ilo isanga lavo lioke vupali vwavo. Nyuma ya ivyo akavainka Varetanya miaka sa maghana mane na makumi masano, 20mhaka he igheri he mroti Samweli. 21Uko nyuma vakatanja kuinkwa mfumwa; Mrungu akavainka Sauli Mwana Kisi, mntu wa mbari yakwe Benyamini, igheri la miaka makumi mane. 22Ekiramvusha uo akamkweja Davidi aoke mfumwa wavo, eye emtetiie vuonwa, ekiti, “Nemvonie Davidi mwana Yese, mntu eizihija ngoro yangu, eye eronga mikundire yangu yose. 23He mbereko ya uo mntu Mrungu akavaetie Vaisraeli Mkija, eye Yesu, sa vuntu evikie kiravo. 24Aho esinaza, Yohane akaronga birikira m’batizo wa kuchwa mti he vantu vose va Israeli. 25Ne Yohane aho ekikenja ndima yakwe, etetie, ‘Mudunganya iti mi ni ani? Mi siye, mira rerehani, hena mmwe eneza nyuma hemi, eye mi chesinutara kuhalaja viratu he maghu akwe.’

26“Vandughu, vana va lukolo lwakwe Abrahamu, na avo vangi ghati he unywi vemfoleke Mrungu, iyo mburi ya ulu lukio yetuetiwe uswi. 27Ambu vala vetue Yerusalemu, na vabaha vavo, kwa kuti vesekimmanyije, neri kutwarija viteto vya varoti vyesomwa kila sabato, vakavikolosha kwa kumlaha. 28Nziaho tevevonie kiusho cha munkomia, vakamsemba Pilato akumkomire. 29Vekinakoloshe vyose vyemwandikiwe, vakamseja he ula mti, vakamvika he mbira. 30Mira Mrungu akamvusha he vefwie; 31akavonwa misi mingi ni vala vekweie nayye kufuma Galilaya mhaka Yerusalemu, evo eki vaonwa vakwe he vantu. 32Na uswi tububirikira Mburi Yedi ya kila kiravo vaku vetu vekiinkiwe, 33iki Mrungu akitukoloshija uswi twe vana vavo, kwa kumvusha Yesu he vefwie; sa vuntu cheandikwe he izumo la keri:

‘We niwe Mwanangu, yoo mi nakumogha.’ 34Kangi wa kila emvushije he vefwie, nesa asihundukie kuvona, etetie huvu:

‘Ninemuinka unywi vila vyezerire vyakwe Davidi vya idi.’ 35Heicho hantu hangi wa he izumo eti:

‘Tukashighe ezerire wako kufikiwa ni kivoji.’ 36Ambu Davidi ekinakenje kuhirira mburi ya Mrungu he lukolo lwakwe, akashinjia, akavikwa hamwe na vazima vakwe, akafikiwa ni kivoji. 37Mira ye evushijwe ni Mrungu he vefwie, tefikiwe ni kivoji.

38“Heicho nakimanyike henyu vandughu vangu, iti he uo mubirikirwa kushighiwa mabanu. 39Na heye, ula emwitikija eteririwa kitea he vintu vila vyose chesekive atarirwe kitea kwa myomongwa yakwe Mose. 40Kucheieni ra, ila mburi yetetiwe he varoti isiremuzia:

41‘Rerehani, unywi varebera, makani na kuteka,

Ambu nironga ndima he ii misi yenyu, ndima mwesekiitikija

Neri hata mntu akatemugaia mno.’”

42Aho vekifuma vakavasemba vavavwire wa ivyo viteto sabato yeneza. 43Mvungano wa sinagogi wekinasakane, Vayuda na vala vegharukie Kiyuda vegurisha, vajinki vakavaratera Paulo ne Barnaba; evo vekiteta navo, vakavagera nzinya kuikaa he mbonea ya Mrungu.

Ntume vevabirikira Vakiisanga

44Ila sabato ingi, vantu vajinki, hafuhi muzi wose, vakavungana kusikija kiteto cha Mrungu. 45Mira Vayuda vekivona mavungano vakaizua kiru, vakasua vila viteto vyetetiwe ni Paulo, vakaketa nkani na kurara. 46Mira Paulo ne Barnaba vakateta kiume, vakati, “Chekitara kiteto cha Mrungu kirongetwtwa henyu, mira kila mwekipasa, na kukuvona venye iti tekimufwenye nkalamo ya kae na kae, rerehani, twagharukia Vakiiisanga. 47Ambu nivwo vuntu tweazerwe ni Mfumwa, ekiti,

‘Nakuvika uoke kianga cha Vakiisanga, uoke lukio mhaka mginto wa masanga.’”

48Vakiisanga vekisikia huvo vakaizihirwa, vakakaza kiteto cha Mrungu; na vala vetarirwe ni nkalamo ya kae na kae vakaitikija. 49Kiteto cha Mrungu kikagisha he lila isanga lose. 50Mira Vayuda vakasembeka vache vala vegurisha, veshimiwa, na vabaha va muzi, vakavasoseja vavarierieshe Paulo ne Barnaba, vakavakinya he isanga lavo. 51Navo vakavakukuntia teri ya maghu avo, vakatonga noko Ikonio. 52Varateri vakaizujwa kuizihirwa na Mpeho Wedi.

Currently Selected:

NDIMA JA NTUME 13: CHSUNT67

Highlight

Copy