NDIMA JA NTUME 23

1Paulo akavarerehisha vala vantu va chila, akati, “Vandughu vangu, mi netongiie he Mrungu na ngoro yeelile mhaka yoo ili.” 2Mtasi m’baha eye Anania akaazera vala veimuke hafuhi naye iti vam’bighe momo. 3Niho Paulo akamti, “Mrungu enekubigha we lukuta lwevirirwe chokaa. We weikee si kunilaha cheteghane na viziomo, uko uazera nibighwe chesiteghane na viziomo?” 4Vala veimuke hala hafuhi vakati, “Kave umrara mtasi m’baha wa Mrungu?” 5Paulo akati, “Vandughu, sekimanyije iti niye mtasi m’baha; ambu heandikwe: ‘M’baha wa mbari yako usimtetie uvivi.’” 6Paulo ekimanya iti kumwe hevo ni Vasadukayo, na kumwe ni vasadukayo, akateta na izii ibaha he ila chila, “Vandughu, mi ni Mfarisayo, mwana wa Mfarisayo; nilahwa vuntu vwa ikuji la kuvuka kwa vafwie.” 7Ekikenja kuteta huvo, hakaketa makanano he Vafarisayo na Vasadukayo, mzomano ukaghavanyika. 8Ambu Vasadukayo veti, Tehena kuvuka he vafwie neri vamalaika neri mpeho; mira Vafarisayo veitikije ivyo vyose. 9Hakaketa kilonzo kibaha. Vaandiki va kumwe va mondo wa Vafarisayo vakaimuka kumkania, vekiti, “Uswi tetuvwene kivivi he uu mntu; ha kakicha ni mpeho kana malaika etetie naye h’ii?” 10Hekinaketike ivoo ibaha, ula akida m’baha akafoleka iti Paulo asizeng’arurwa nivo, akaazera iti vasikari vasee vamvushe he mikono yavo, na kumwete na he iboma.

11Kio kila Mfumwa akaimuka hafuhi naye, akati, “Dindwa ni ngoro! ambu sa vuntu wenitetiie vuonwa aha Yerusalemu, kikutara kunitetia vuonwa hata uko Roma.”

Vayuda veaghana kumkoma Paulo

12Hekiangaa, Vayuda vakaaghana, vakakurigha kuti tevekale neri kunwa vesinamkoma Paulo. 13Na vala vekurighie huvo vekoloke makumi mane na kukela. 14Navo vakaswi he vatasi vabaha na vaghosi, vakati, “Twakurigha tusisaghe kintu twesinamkoma Paulo. 15Iki unywi hamwe na vaghosi va chila mutete na ula akida m’baha, amseje he unywi, sa mwetaenda kumanya mburi yakwe nezo kukela; na uswi twekuringanyanye kumkoma esinazengelela.” 16Abuye Paulo ekisikia iyo mburi ya ao maluo avo, akatonga akaingia he iboma, akamwukulila Paulo ii mburi. 17Paulo akamwitanga akida mmwe, akati, “Mtonje uu m’bwange he akida m’baha; ambu hena che eenda kumvwira.” 18Niho akamghuha, akamtonja he akida m’baha, akamti, “Paulo ula echungiwe eniitange, akanisemba nimwete uu m’bwange, ambu hena cho eenda kukuvwira.” 19Ula akida m’baha akamgura mkono, vakaimuka mondo, vakakela njama, “Akamvwija iti una mburi ani weenda kunivwira?” 20Akati, “Vayuda veaghane kukusemba iti yavo umseje Paulo hena chila, sa veenda kumanya mburi yakwe nezo kukela. 21Mira we usikunde; ambu hena vantu vekela makumi mane venemgwia maluo, vekurighie iti vasile kana kunwa vesinamkoma; navo vekuringanye veindie kiravo chako.” 22Niho ula akida m’baha akamshigha ula m’bwange akutongire, ekimkokontia iti, “Usimvwire mntu neri mmwe iti waniukulila iyo mburi.”

Paulo etonjwa noko Kaisaria

23Akaitanga vaakida veri, akati, “Ringanyani vasikari maghana meri, na vasikari va vafarisayo makumi mfungate, na venye machumo maghana meri, vavuke saa ntatu ja kio, vatonge Kaisaria. 24Akavati varinganye nyama jenemveka Paulo, na kumtonja mpoa hakwe mlao Feliki.” 25Akaandika barua huvu:

26Mi Klaudio Lisia, nakukezya, we mrashimiwa mlao Feliki! 27Uu mntu egurirwe ni Vayuda, vekienda kumkoma, niho nikatonga na ihindo la vasikari nikamkania hevo, kila nesikie iti ye ni Mroma. 28Nami nekienda kumanya cho cheshigha vekimsitaka, nikamseja, nikamvika mozya he chila. 29Nikavona iti asitakwe vuntu vwa mburi ja viziomo vyavo, neri tesitakwe kintu chemtara kukomwa kana kuchungwa. 30Nekinavwirwe iti heneketa maluo he mburi ya uu mntu, nikamwinkija noko hako fia, nikavaazera vala vemsitake iti vatetie mburi yakwe uko hako. Ikaa mpoa.”

31Niho vala vasikari vakamtika Paulo sa vuntu veazerwe, vakamtonja mhaka Antipatri na kio. 32Hekicha vakamshigha vala vevekiwe farasi vatonge naye, navo vakahunduka noko bomani. 33Hala vekifika Kaisaria vakamunka mlao ila barua na kumvika Paulo mozya heye. 34Naye ekinaisome akamvwija, “U mntu wa isanga lihi?” Ekinaukulilwe iti ni mntu wa Kilikia, 35akati, “Vala vekusitake vekineza niho nenekusikija.” Akaazera iti arindwe he nyumba ya kitala chakwe Herode.

Currently Selected:

NDIMA JA NTUME 23: CHSUNT67

Highlight

Copy