NDIMA JA NTUME 11

Petro elwania vila eketie

1Igheri ntume na vandughu veho uko Yudea vakasikia iti Vakiisanga navo vaghuhia kiteto cha Mrungu. 2Petro ekinakwee uko Yerusalemu, vala va kitavani vakakanana naye, 3vekiti, “Waingia he vantu vesitavanwe ukala navo.” 4Petro akavoka kuvavwirira kwa mraterano, akati,

5“Nekiho he muzi wa Yope, nekiomba, ngoro yangu ikasempuka, nikavona kimpeho, kintu cheikee sa suke mbaha chekisejwa kufuma uko wanga, chegurirwe vikono vine, kikanifikia. 6Nikakirerehisha, nekidunganya, nikavona nyama ja he masanga ja maghu mane, na ja sakeni, na jila jebulutika, na madeghe a wanga. 7Nikasikia izii lekiniti, ‘Petro, vuka, ukome ule.’ 8Nikati, ‘Hai, Mfumwa, ambu kintu kivivi kana chesiliwa tekinaingia narini he momo wangu.’ 9Lila izii likanigharusha ka keri kufuma uko wanga: ‘Vila Mrungu evizerije we usiviitange vivivi.’ 10Icho kintu kikaketika huvwo kantu katatu; nyuma vyose vikakwejwa wa noko wanga. 11Hala indi vantu vatatu vetumiwe kufuma Kaisaria vakaiuka nze he ila nyumba hantu tweho. 12Mpeho akaniti nitonje navo, neri nisitatanye. Ava vandughu mtandatu vakatonjanya nami, tukaingia he nyumba ya ula mntu. 13Akatugaiya sa vuntu evonie malaika eimuke nyumba hakwe na kumti, ‘Tuma vantu vatonge Yope, kuramwitanga Simoni eitangwa Petro; 14niye enekuvwirira mburi jenekukija, we na kaa yako yose.’ 15Ingeri nekiravoka kuteta, Mpeho Wedi akavaseia sa vuntu etuseie uswi aho kuvoka. 16Nikakumbuka kila kiteto cha Mfumwa sa vuntu etie, ‘Yohane ekibatiza kweri na mpombe, mira unywi munebatizwa na Mpeho Wedi.’ 17Heicho kakicha Mrungu evainkie vo kiinkwa kila kila etuinkie uswi twemwitikije Mfumwa Yesu Kristo, ni ani eneidima kumkinda Mrungu?” 18Vekinasikie viteto ivyo vakahuja, vakamkaza Mrungu, vekiti, “Mrungu avakundia Vakiisanga navo kuchwa mti kweete nkalamo.”

Kanisa la Vakiisanga uko Antiokia

19Ingeri vala vezarikezarike vuntu vwa kurierieshwa kwevoneke he mburi yakwe Stefano, vakazoka noko Foinike na Kipro na Antiokia, vesibirikire icho kiteto he vantu vangi esire Vayuda du. 20Mira va kumwe hevo neki vantu va Kipro na Kirene, navo vekifika Antiokia vakateta na Vayuda va Kigriki, vekibirikira Mburi Yedi ya Mfumwa Yesu. 21Mkono wa Mfumwa ukavaghenja, vantu vajinki vakaitikija, vakamgharukia Mfumwa. 22Ijo mburi ja avo vantu jikafika he masikio a vantu va kanisa veho uko Yerusalemu; vakamtu, a Barnaba iti atonge noko Antiokia. 23Naye ekinafike na kuvona mbonea ya Mrungu akaizihirwa, akavarunga vose iti vagurane na Mfumwa kwa ngoro yose. 24Ambu neki mntu wedi eizue Mpeho Wedi na mwitikijo, vantu vajinki vakaongejika mondo wa Mfumwa. 25Heicho akavuka akatonga Tarso kuramwenda Sauli; 26niho ekinamvone akamwete Antiokia. Vakaikaa aho hantu ha mwaka mzima, vekivungana hamwe na kanisa na kucheja vantu vajinki. Uko Antiokia niho hantu varateri vevokiie kuitangwa Vakristo.

Ndima yavo Barnaba ne Sauli uko Yerusalemu

27He misi ila ila hakasea varoti vefuma Yerusalemu, vakaza Antiokia. 28Hakaimuka mmwe wavo eitangwa Agabo, akavonyesha kwa nzinya ya Mpeho Wedi iti heneza nzota mbaha, hafuhi si jose, nayo ikavoneka he misi yakwe Klaudio. 29Na vala varateri vakaenda kuinkija lughenjo he vandughu vavo, vala veikaa uko Yudea, kila mntu na kiringanyanyo chakwe. 30Vakaketa huvo, vakaluinkija he vaghosi kwa mikono yavo Barnaba ne Sauli.

Currently Selected:

NDIMA JA NTUME 11: CHSUNT67

Highlight

Copy