NDIMA JA NTUME 10

Petro ne Korinelio

1Uko Kaisaria hekina mntu eitangwa Kornelio, akida wa itagwa leitangwa la Kiitalia, 2naye ne mntu egurisha kangi emfoleka Mrungu, ye na kaa yakwe yose, ekiinkija matasi majinki he vantu na kumwomba Mrungu genda. 3Msi mmwe igheri la saa kenda ja he msi akavona boo kimpeho, malaika wa Mrungu, ekimzia na kumti, “Korinelio!” 4Akamrerehisha, akaituka, akamti, “Ni kini Mfumwa?” Akamti, “Maombi ako na matasi ako akwea sa nkumbu uko wanga mozya he Mrungu. 5Ikira tuma vantu uko Yope, uremwitanga Simoni, eitangwa Petro. 6Ye ni mgheni wa mntu eitangwa Simoni, mresuka mikota, nyumba yakwe yeho mbaimbai he bahari, enekuvwira kila chekutara kuronga.” 7Niho ula malaika etetie naye ekinatonge, Kornelio akaitanga vantu veri he vandima va kaa hakwe, na msikari mmwe, e mntu egurisha he vala vemhirira genda. 8Ekikenja kuvagaiya vyose, akavatuma uko Yope.

9Hala yavo hakwe, aho vekizora, vekizengelela hafuhi na muzi, Petro ekweie na gu kuraomba igheri la saa mtandatu ja hemsi. 10Akasikia nza haiwa, akaenda kula. Aho vekiringanya kijo, akasempuka. 11Akavona uko wanga hejuvuke, hakasea kintu cheikee sa suke mbaha, ikasejwa mhaka si, yegurirwe vikono vine; 12ndeni heyo hena mbare jose ja nyama ja maghu mane, na jebulutika, na madeghe a wanga. 13Izii likamzia lekiti, “Petro, vuka, koma ule.” 14Mira Petro akati, “Hai, Mfumwa, ambu too sinala kintu kivivi kana chesiliwa.” 15Izii likamzia ka keri lekimti, “Vila Mrungu evizerije, we usiviitange vivivi. 16Icho kikaketika huvo kantu katatu; nyuma kikahunduwa hala indi noko wanga.

17Aho Petro echeriganganya he ngoro yakwe, iti icho avona kimpeho ni kuti ze, vala vantu vetumiwe ni Kornelio, vekikenja kuvwija nyumba yakwe Simoni, vakaimuka mpengeni, 18vakaitanga, vakavwija iti Simoni eitangwa Petro ewaha. 19Petro eho edunganya kila evonie kimpeho, Mpeho akamti, “Hena vantu vatatu vekuenda. 20Heicho vuka usee utonjanye navo, usitatanye, ambu nimi nevatumie.” 21Petro akasea he vala vantu, akati, “Uo mwemwenda nimi; chemuetie ni kini?” 22Vakati, “Akida Korinelio, e mntu mwenye singisirya, emfoleka Mrungu, ena nguma yedi he mbari yose ya Kiyuda, eazerwe ni malaika ezerire kutuma vantu hewe, utonge kaa hakwe, nesa asikije cho weneteta.” 23Akavaghuhia vaoke vagheni vakwe.

Hala yavo, Petro akavuka akatonga hamwe navo, na vandughu kumwe va kula Yope vakatonjanya naye. 24Msi wa keri vakafika Kaisaria. Korinelio naye ekivaindie, eitange vandughu vakwe na vambwie vakwe. 25Petro ekiingia, Korinelio akafuma kumzana, akagwa si he maghu akwe, akamdunkutia. 26Mira Petro akamvusha, akamti, “Imuka, ambu nami nire mntu.” 27Hala ekiteta naye akaingia, akavona vantu vajinki vevungane. 28Akavati, “Unywi mwemanyije iti tekikundijwa mntu e Myuda atonjanye na mntu wa mbari ingi neri kuswi hakwe; mira Mrungu enivonyeshe iti hasikete mntu ye nemwitanga mvivi kana ejirare; 29nicho chashigha nikinaitangwe nesisuie kuza; iki ana nimuvwija: Ni mburi ani mweniitangie?” 30Korinelio akati, “Misi mine yevechije he saa ii eyo saa kenda, nekiomba he nyumba yangu; hakaimuka mntu mozya hemi, edokie suke nyewa chwe; 31akati, ‘Korinelio! maombi ako asikiwa, na matasi ako akumbukwa ha Mrungu. 32Iki tuma vantu Yope, umwitange Simoni eitangwa Petro, eikaa he nyumba yakwe Simoni, mresuka mikota, yeho hafuhi na mpwani; naye ekiza eneteta nawe.’ 33Hala indi nikatuma vantu hako, nawe ukaketa chedi, ukaza. Na iki uswi vose tuwaha mozya he Mrungu, kusikija vyose Mfumwa ekuazere.”

Mabirikiro akwe Petro

34Petro akavusha momo, akati: “Kididi namanya iti Mrungu tena sombo; 35mira he kila mbari mntu ula emfoleka na kuronga vya kitea ekundwa niye. 36Kila kiteto evainkie vana Israeli, ekibirikira Mburi Yedi ya mporere yefuma he Yesu Kristo (iti ye ni Mfumwa wa vose), 37mburi ila unywi mweimanyije, yegishije Yudea hose kuvokia Galilaya, nyuma ya m’batizo ula webirikirwe ni Yohane; 38mburi yakwe Yesu wa Nazareti, sa vuntu Mrungu emgimbike ekimgera Mpeho Wedi na kumunka nzinya; naye akavecha hantu hose, ekironga ndima yedi na kubanja vose verishijwe vwasi ni Shetani; ambu Mrungu ekina naye. 39Na uswi tu vaonwa va mburi jose eketie he isanga la Yudea na uko Yerusalemu, eye vemkomie kwa kumvamba he mti. 40Mira msi wa katatu Mrungu akamvusha he vefwie, akamunka kukuvonyesha boo, 41si he vantu vose, esire he vala vaonwa vesaghurwe ni Mrungu too aho, evo va uswi, twelie na kunwa hamwe naye, hala ekinavushwe he vefwie. 42Akatuazera kuti tuvabirikire vantu na kutea vuonwa, iti: Uu niye egimbikwe ni Mrungu, aoke Mlahi wa vala vereho na vala vefwie. 43Uo niye varoti vose vemtetia vuonwa kuti, He izina lakwe kila mntu emwitikija ye, enevona kushighiwa mabanu.”

Vakiisanga veinkwa Mpeho Wedi na kubatizwa

44Petro echeri teta ivyo viteto, Mpeho Wedi akavaseia vose vesikie kila kiteto. 45Niho vala veitikije vefuma he vetavanwe, evo vala vezie ne Petro, vakamaka, kila hata Vakiisanga navo vakufutiwa kiinkwa cha Mpeho Wedi. 46Ambu vevasikie vekiteta vitetire vingi na kumkaza Mrungu. Niho Petro akagharusha, 47“Ni ani eidima kuvasuja mpombe, ava vasibatizwe, vantu veinkiwe Mpeho Wedi sa uswi?” 48Akaazera vabatizwe he izina lakwe Yesu Kristo. Niho vakamsemba azikeikaa havo misi misiku.

Currently Selected:

NDIMA JA NTUME 10: CHSUNT67

Highlight

Copy