NDIMA JA NTUME 9

Sauli echwa mti

(Ntum. 22:6-16; 26:12-18)

1Mira Sauli ekizikafolesha na kudunganya cha kukoma varateri va Mfumwa, akamswia mtasi m’baha, 2akaenda amunke barua kutonga he sinagogi ja Damasko, nesa ekivona vantu va nzia ii va kiume kana va kiche, avachunge na kuvaete Yerusalemu. 3Igheri echeri ezoka aho ekizengelela Damasko, hala indi kianga kihaba chefuma uko wanga, kikamwangaja miondo yose. 4Akagwa hala si, akasikia izii lekimti, “Sauli, Sauli! Hanini wenirieriesha?” 5Akati, “Niwe ani Mfumwa?” Naye akati, “Mi nimi Yesu wemrieriesha. 6Mira vuka, uingie he muzi, unevwirwa kila chekutara kuketa.” 7Vala vantu vezoka naye vakaimuka vehomborere, kila vesikie izii, mira vesivwene mntu. 8Sauli akavuka hala si; ekivusha meso tevona kintu; vakamgura mkono, vakamtonja Damasko. 9Akaikaa misi mitatu, esivona, esila, neri kunwa.

Sauli uko Damasko

10Uko Damasko hekina mrateri eitangwa Anania. Mfumwa akamvwira he kumvonekia kimpeho: “Anania!” Akati, “Niwaha Mfumwa.” 11Mfumwa akamti, “Vuka, utonge he nzia yeitangwa Yerongeke, uvwije he nyumba yakwe Yuda, mntu eitangwa Sauli wa Tarso, ambu, rereha, eho eomba; 12naye evonie mntu eitangwa Anania ekiingia na kumvikia mikono nesa aidime kuvona wa.” 13Mira Anania akagharusha, “Mfumwa, nesikie mburi ja uo mntu he vantu vajinki, sa vuntu evaketie vantu vako vezerire uko Yerusalemu vivivi vijinki. 14Kangi wa aha, ena nzinya ya vatasi vabaha, ya kuchunga vala velanga izina lako hose.” 15Mira Mfumwa akamti, “Kutongire, ambu uo ni ntanu neisaghure, atonje izina langu he Vakiisanga na he vafumwa na he vana va Israeli. 16Ambu ninemvonyesha vijinki vyemtara kurishwa vwasi vuntu vwa izina langu.”

17Anania akatonga, akaingia he ila nyumba, akamvikia mikono, ekiti, “Mndughu Sauli, Mfumwa Yesu, eye, ula ekufumiie kula he nzia ila weziiwe, enitumie iti uidime kuvona wa, kangi uizujwe Mpeho Wedi.” 18Hala indi meso akwe akagusha vintu sa makanka, akavona, akavuka, akabatizwa; 19akala kijo, akaketa nguju.

Akaikaa uko misi misiku hamwe na varateri veho Damasko. 20Hala indi akam’birikira Yesu he masinagogi, iti Yesu ni Mwana wa Mrungu. 21Na vose vemsikie vakamaka, vakati, “Uu siye ula ekirierisha vala velanga ilo izina uko Yerusalemu? Na chemwetie na aha si iti avachunge na kuvatika he vatasi vabaha?” 22Sauli akazikaketa nzinya, Vayuda vala veikaa uko Damasko akavagera kutatanya, ekikonesha iti uu niye Kristo.

23Niho misi mingi yekivecha, Vayuda vakachila iti vamkome; 24mira kiavia chavo kikamanyika he Sauli; vakamrindija he mvera hemsi na kio iti vamkome. 25Varateri vakwe vakamghuha na kio, vakamsejija he lukuta na kikapu.

Sauli uko Yerusalemu na Tarso

26Sauli ekifika Yerusalemu akaghesha kukusankanya na varateri, mira vose vekimfoleka, vasiitikije iti ye ni mrateri. 27Mira Barnaba akamghuha akamtwaa he ntume, akavagaiya sa vuntu emvonie Mfumwa uko nzieni, na iti etetie naye, kangi vuntu ebirikire he izina lakwe Yesu kwa ndekero uko Damasko. 28Naye akaikaa hamwe navo, ekiigia na kufuma uko Yerusalemu, 29ekibirikira kwa ndekero he izina la Mfumwa; ekiteta na kukanana na Vayuda va Kigriki, navo vakaenda kumkoma. 30Mira vandughu vekimanya iyo mburi vakamtonja Kaisaria, vakamwinkija noko Tarso.

31Niho kanisa uko Yudea hose na Galilaya na Samaria, likaikaa mporere, likaketa nzinya, likaneta na kuongejika he kumfoleka Mfumwa na kutujwa ni Mpeho Wedi.

Petro ebanja uko Lida

32Ingeri Petro ekijunguluka myondo yose, akasea hata he vala vezerire veikaa uko Lida. 33Akavona mntu uko eitangwa Enea, eshinjie he kitanda miaka mnane, ambu eholoje. 34Petro akamti, “Enea, Yesu Kristo akubanja, vuka utandishe kitanda chako.” Hala indi akavuka. 35Vantu vose veikaa uko Lida na Saroni vekimvona, vakamgharukia Mfumwa.

Dorkasi

36Uko Yope hekina mrateri eitangwa Tabita, wekigharusha ni Dorkasi (ni kuti Suni); uo mche ekiizue mihiro yedi, na kuinkija matasi. 37Niho misi ila akawaa akafwa. Vekinamwoje vakamvuka uko gu. 38Kila Lida wekihafuhi na Yope, na varateri vekisikia iti Petro eho uko, vakatuma vantu veri heye, kumsemba kuti, “Usiikaishe kuza hetu.” 39Petro akavuka, akatonjanya navo; ekifika vakamkweja na gu. Vache vose vefwiiwe ni vome vakaimuka hafuhi naye vekiia, na kumvonyesha jila nkazu na marinda Dorkasi echumie hala ereho na moo. 40Petro akavafunya na nze vose, akadunkuta, akaomba, ekikenja akagharukia kila kimba, akati, “Tabita, vuka!” Naye akavusha meso, ekinamvone Petro, akavuka akaikaa si. 41Akamrongia mkono, akamvusha, ekinaitange vala vezerire na vala vache vefwiiwe ni vome, akamvika mozya hevo eho moo. 42Kikamanyika he muzi wose wa Yope; vantu vajinki vakamwitikija Mfumwa. 43Akaikaa misi mingi uko Yope ha mntu mmwe mresuka mikota, eitangwa Simoni.

Currently Selected:

NDIMA JA NTUME 9: CHSUNT67

Highlight

Copy