NDIMA JA NTUME 1

Kivokio

1We Teofilo, kila kitabu cha kuvoka nekiandike cha mburi ja vyose Yesu evokie kuronga na kucheja, 2mhaka msi ula ekikwejwa noko wanga, ekinakenje kuvaazera kwa Mpeho Wedi ntume vala evasaghure; 3evo vala ekinarishwe vwasi ekuvonyeshe hevo kwa maluvengo majinki iti eho moo, ekivafumia marongo a misi makumi mane na kuteta mburi jetara vufumwa vwa Mrungu. 4Aho ekizomana navo akavaazera vasivuke Yerusalemu, mira vainde kiravo chakwe Vava, mwekisiki hemi; 5ambu Yohane ekibatiza kwa mpombe, mira unywi munebatizwa kwa Mpeho Wedi, hesinavecha misi mingi.

Kukwea wanga kwakwe Yesu

(Mrk. 16:19-20; Luk. 24:50-53)

6Vekinavungane vakamvwija vekiti, “Mfumwa, igheri ilo niho wenevahunduia Vaisraeli vufumwa vwavo?” 7Akavati, “Si ndima yenyu kumanya magheri kana kiaze Vava evikie kwa nzinya yakwe mwenye. 8Mira muneinkwa nzinya aho Mpeho Wedi ekinemuseia, na unywi muneoka vaonwa vangu aha Yerusalemu, na Yudea hose na Samaria, mhaka mginto wa masanga.” 9Ekinatete huvo, aho vekirereha, akavushijwa na wanga, ijumbi likamguha vereyoya. 10Vecheri tunkula noko wanga hala ye ekitonga, rereha, vantu veri vakaimuka hafuhi navo, vedokie suke nyewa, 11vakati, “Unywi vantu va Galilaya, hanini mweimuke mwekirereha noko wanga? Uu Yesu evushijwe henyu kutonga noko wanga, enerahunduka huvo sa vuntu mwemvonie ekitonga na uko wanga.”

Kusaghurwa kwa ntume wa ikumi na keri

12Niho vakahunduka na Yerusalemu kufuma he ntuvi yeitangwa ya Mizeituni, yeho hafuhi na Yerusalemu kiringanyo cha mtongo wa sabato. 13Vekinaingie vakakwea na gu hala hantu vekiikaa, va: Petro ne Yohane ne Yakobo ne Andrea, Filipo ne Toma, Bartolomayo ne Matayo, Yakobo mwana Alfayo, Simoni Zelote ne Yuda mwana Yakobo. 14Ava vose vekishinda omba na ngoro mwe, hantu hamwe na vantu va kiche, ne Maria mlala wavo Yesu, na vajinawe.

15Misi ila Petro akaimuka ghati he avo vandughu (mazina ekoloka ighana na makumi meri) akati, 16“Vandughu, chekitara iandiko likoloshwe, sa vuntu Mpeho Wedi etetie kae he momo wakwe Davidi he mburi yakwe Yuda, eye ekivarongorire vala vemgurire Yesu; 17ambu ekitaranywe hamwe na uswi, akainkwa ifungu he ii ndima. 18(Heicho uo mntu ezorire mghunda na mhako wa vuvivi; akagwa, akafokoroma, akabuka, matumbo akwe ose akafuma. 19Kikamanyika he vantu vose vetue Yerusalemu, na ula mghunda kihavo ukaitangwa Akeldama, ni kuti, ‘Mghunda wa sakame.’) 20Ambu cheandikwe he kitabu cha mazumo:

‘Hantu hakwe hashighwe vula,

Neri hasikete mntu eikaa ho;’ kangi:

‘Vubaha vwakwe vughuhwe ni ungi.’ 21Heicho, he vala vantu vekitonjanya na uswi igheri lose, aho Mfumwa Yesu ekiingia hetu na kufuma, 22kuvokia m’batizo wakwe Yohane mhaka msi ula ekivushwa hetu na kutonga uko wanga, he avo kitara iti mntu mmwe aoke muonwa hamwe na uswi, wa kuvuka kwakwe he vefwie.”

23Vakatika vantu veri, Yosefu eitangwa Barsaba, ena izina la keri eitangwa Yusto, ne Matia. 24Niho vakaomba, vakati, “We Mfumwa wemanyije ngoro ja vantu vose, tuvonyeshe, he ava veri ni uhi wemsaghure, 25agure hantu hakwe Yuda he ii ndima ya ntume eishighie, akatonga kihakwe.” 26Vakavashotia manga, akamgwia Matia, naye akataranywa na ntume ikumi na mmwe.

Currently Selected:

NDIMA JA NTUME 1: CHSUNT67

Highlight

Copy