SAKARI 9
9
Kloʔo ke tɔɔ hɛɛn pe kiti kayoʔo
1Bajegɔ Nyɛʔɛlɛ lí ma yo mà wa Adraki klo ma le. Ki kayoʔo kí na nyu Damasi kala na, mɛjɛn Bajegɔ Nyɛʔɛlɛ lí na li yɛʔɛ hanri mà na hɛɛn pe tɔɔ wele be nɛ pa lí na Israyɛli kluʔu woo wele be pomo ma na ge.#9:1-4 ma wèle wa Esa 17:1-3; 23:1-18; Jer 49:23-27; Esek 26:1 - 28:26; Jow 4:4-8; Amo 1:3-5; 9-10; Mat 11:21-22; Luk 10:13-14 ni wè.
2Lí na nyu Amate kala na le kpo
ga kí nyɛ be Damasi tanla we.
Lí na nyu kpo Tire nì,
ní Sidon kala na,
ali nàʔa ja bo
peè pe dá ticlimi tunŋu kɔ ge.
3Tire wi dá mlagmoo korohaʔa fan
mà wɛrifiʔi kpoʔolo kì na
nɛ pa taplɔʔɔ nyɛ
mà tɛ kpoʔolo wi na
nɛ pa kaʔa namyɛʔɛlɛ poro nyɛ de.
4Di Bajegɔ Nyɛʔɛlɛ
lí bi baʔa hanri
pì bɛfu pi cɔʔɔ wí ma.
Lí bi ba wi fangbɔʔɔ wa ge
wa nyugbɔmo ni.
Kwɔʔɔ kí bi Tire hogo wi kɔ.
5Asikalon wí bi ki cɔʔɔmo
tipeme nya bì fya.
Gasa wí bi mì nya kpo
bì fya ceŋge fɔ bì da hiʔiri.
Ekron pɔɔ bo ban kpo,
mɛjɛn wi dihon
wí bi ba gon wí na.
Masanaŋa wà nigbe
ìn bì ba da wa Gasa ni we.
Hɛn wà nigbe
ìn bì ba glɛn wa
Asikalon ni we.#9:5-7 ma wèle wa Esa 14:29-31; Jer 47:1-7; Esek 25:15-17; Jow 4:4-8; Amo 1:6-8; Sof 2:4-7 ni wè.
6Klo la hɛɛn bi ba glɛn wa
Asidɔdi kaʔa ni ge pè yɛ.
Mí bi Filisite klo woo
pe makpɔʔɔmo kɔ me.
7Mí bi pe sraʔa disyan
ga kí na na bɛnʔɛ ní ki kara kle
bì ti fara wa pe no ni ge.
Peè fanna pa pe nyuwyeʔe ta
wò Nyɛʔɛlɛ liì fanŋa ni.
Pé bi bo nɛ pa Juda kluʔu nì,
ki kundiʔi ní.
Ekron woo pa pe bo nɛ pa
Yebusi woo nyɛ be.
8Mí bi kɔrɔsi fɛɛ tɛnŋɛ́
bì na klo kɛli le,
bì da li kɔrɔsi mlagmoo
bee kala na pé na toro ge.
Hɛn wɛ ìn bi je ga ban
bì baa na klo hɛɛn faʔara be,
mɛjɛn mí ma na yɛʔɛ kan wa pee ma.
Masanaŋa ŋa wí bi frɛmɛ lege wa nɛ klo ni
9 Sinyo kaʔa,
maa lafiʔimi taʔaraʔa
taʔara ceŋge.
Jerusalɛmu,
ma lafiʔimi ŋuʔu ŋu.
Ma masanaŋa wí ŋa
wí na pan mà krugu.
Wí nyɛ sinŋi,
wí nyɛ fangbɔʔɔ ní
mà na wì cɛrɛ.
Wí ma luʔu sofɛnlɛ na,
ali sofɛnlɛ cala pyɔ wi.#9:9 ma wèle wa Mat 21:5; Jan 12:15 ni wè.
10Mí bi mlaʔa kmomo
syon kɔrɔrɔ punŋu de wa
Efrayimu klo ni le,
bì mlaʔa kmomo syongidayee
kɔ be wa Jerusalɛmu ni we.
Mlaʔa kmomo andara
tí bi gaʔabu kpo.
Ki masanaŋa wí bi baa
frɛmɛ kayoʔo nyu
kloʔo ke tɔɔ hɛɛn ma be.
Wi klo klɛnmɛ mí na jrɛʔɛ wa
nyugbɔmo ma na sye
mà yáà nori mi tɔ na.
Bì gbe Ufrate na
bì gɛri bì ya no wa
tra kanŋaa na ge.#9:10 ma wèle wa Ŋuʔu 72:8 ni wè.
Kasofɛɛ pe wama kayoʔo
11Di mo, Israyɛli we,
yoflimi nofele la li da gón
má ma disyan nì ge,
li kala na,
mí bi ma tungɔɔ kle
bì pe fara wa nyumu fun
tindɛʔɛ ni ge.#9:11 ma wèle wa Nyi 24:8 ni wè.
12Yèé tungɔɔ bee
yè honriri pahaʔa
kí nyɛ nyɛŋɛ ge,
ye hru ye kɛri yè klokmala
braʔa wolo ní le.
Mí naʔa nyu naʔa fligi má kan
mà yo mí bi ma yrɛbɛ
pi nyoʔo syɛn nuŋu
mâ na alaʔa ni ge
ba pí cɔʔɔ ge.
13Mɛjɛn mí bi Juda kluʔu woo
kle nɛ pa anda nyɛ ge,
bì Efrayimu krɛʔɛ we
nɛ pa ŋara nyɛ de.
Sinyo, mí bi ma pii troʔo be wa
Grɛki woo ma pe ya do pe na.
Mí bi ma hanri nɛ pa
mlaʔa kpele nyɛ wa mlagmoo
braʔa fɔlɔ kyɛʔɛ ni ge.
14Bajegɔ Nyɛʔɛlɛ
lí bi lì tyɛʔɛ pé na
wa pe yugu na ge.
Wi ŋara tí bi da sye nɛ pa
yreʔe nyɛʔɛmɛ nyɛ me.
Lí bi wyeʔe wyeri
bì da sye yaa prama kamolo
namyɛlɛ tiflɛgbanʔa nì ge.
15Bajegɔ Nyɛʔɛlɛ la Sye wì bɛfu fɔlɔ lí bi bo
Israyɛli kluʔu woo
pe kɔrɔsifɔlɔ.
Pé bi ba yrɛbɛ pì bɛfu cɔʔɔ
bì da hɔgɔ kacegee tanri ge.
Pé bi ba jɔ bì dì yɛʔɛ kiì wa
kiì grɛʔɛ pe na.
nɛ pa hɛn ŋa nyɛ
wí ma dufɛn jɔ ge,
ná kiì ban,
bì bo nɛ pa sraʔa
disyan nyɛ ga
kí ma alele nyi
mâ po pé biʔi nyranʔa nyranʔa
wa sraʔa farahaʔa dere na de.
16Ki wlɛʔɛ na,
Bajegɔ Nyɛʔɛlɛ la pe Nyɛʔɛlɛ
pa li pe syɔ.
nɛ pa li hɛɛn kpoʔolomo
nyɛ me,
mɛjɛn pè bɛfu pé bi baa nyi
wa wi tra na da
tí nyɛ ylɛrɛ de,
bì bo nɛ pa masaʔa jala
ŋglɛnrɛ nyɛ de.
17Pe wrekmara ní,
ní pe kpangbanma kmara ní
tí bi da bari ceŋge.
Akaba ba pe fali pí bi
pe najɛɛ pe fanŋa kpɔʔɔ ge.
Dufɛn fonŋo wí bi picɛɛ
pe fanŋa kpɔʔɔ ge.
Currently Selected:
SAKARI 9: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
