SAKARI 8
8
Nyimi ní yrɛbɛ fafaʔa tama kayoʔo
1Bajegɔ Nyɛʔɛlɛ la Sye wì bɛfu fɔlɔ à li ní mà yo ná ni nɛ. 2À li yo: «Na glanra tí ma kpɔʔɔ ceŋge Sinyo kaʔa kala na le Sinyo kaʔa kí na na glanʔa ceŋge.»
3À li yo:
«Mí bi hru wa Sinyo ni
bì ya glɛn wa
Jerusalɛmu kaʔa ni ge.
Pé bi da Jerusalɛmu kaʔa yeri
kafungee fɛɛ kaʔa.
Bajegɔ Nyɛʔɛlɛ la Sye wì bɛfu fɔlɔ li angogo
pé bi baa ki yeri angoylɛʔɛ.»
4Bajegɔ Nyɛʔɛlɛ la Sye wì bɛfu fɔlɔ à li yo:
Nabii lagwɔlɔ ní cɛɛ lagwɔlɔ ní
pé bi baa pe nyaʔa wa klɛnhaʔa
Jerusalɛmu kaʔa kanŋaa na
pe kanganʔala ní ge
wa pe kyɛrɛ ni pe
nyuwyetiklonʔo kala na le.
5Jerusalɛmu kaʔa kanŋaa
ké bi nyi najɛɛ ní,
ní picɛɛ ní ní bee ní
pé na hre ge.
6Bajegɔ Nyɛʔɛlɛ la Sye wì bɛfu fɔlɔ à li yo:
Ki wlɛʔɛ nàʔa tyɛʔɛ,
paʔa bo kafonlo woʔo na hɛɛn bee ma pé koro ge.
Di paʔa bo kafonlo woʔo kpo domi ma we yo?
7Bajegɔ Nyɛʔɛlɛ la Sye wì bɛfu fɔlɔ à li yo:
«Mí bi na hɛɛn syɔ be
wa yaajɛhaʔa namyɛlɛ ní
ki jehaʔa namyɛlɛ kloʔo ni ge,
8bì ban ba pe tɛnŋɛ wa
Jerusalɛmu kaʔa ni ge.
Pa pe bo domi na hɛɛn.
Domi pa mi bo
pe Nyɛʔɛlɛ kanyɛmɛ nì,
ní sinmi na me.»
9À li yo:
«Kayoro da tí yo
leyoo pe noro na
Bajegɔ Nyɛʔɛlɛ la Sye wì bɛfu fɔlɔ li go
ki noʔoma leme nyiŋi na,
yé ma ki kayoro
loʔo de alaʔa ni ge,
ye dihon le ye ni.
10Mɛjɛn sanni ki nyiŋi
kí bi no ge,
pe ìn dàá hɛɛn sari be,
pe in dàá ajobo
pi tungɔʔɔ sari ge kpo.
Hɛɛn bee pe dáa sye
mà na hunnu na pan ge,
yrafyɛn ìn dà bo wa
pe kyɛrɛ ni bì gban
bì pe bɛnfɛɛ ja be.
Mi dá hɛɛn pè bɛfu jrɛʔɛ
mà pe wa pe na.
11Bajegɔ Nyɛʔɛlɛ la Sye wì bɛfu fɔlɔ wí yo:
Di mà kpe wa fɔ mà bâ no
ŋa ŋa na,
ga mi dá hanri na hɛɛn
bee na pe dá goro ge,
mi ìn bi je ga ki nyoʔo hanri
pé na adi.
12Akaba pí bi ba nyɛʔɛ,
hrɛsɛn tiri pa ti sɛ,
akaba ba pe fali tra na
pa pi sɛ kmaʔa,
namuru pa ti kamɛŋɛ hanri
ki wo naʔa tra na de,
mí bi klɛnhagmaʔa kan
na hɛɛn bee ma pe kori ge.
13Juda go woo ní
Israyɛli go woo ní
ye dá grɛ̀ʔɛ̀ mà po
danŋama yraʔa wa
kloʔo ke tɔɔ hɛɛn kpafoʔo ni
pomo ma na,
mí bi ye syɔ,
pa ye bo hɛɛn pe tɔɔ ma be
frɛmɛ tama yraʔa
ki pomo na me.
Yò gáa fyaʔa.
Ye dihon le ye ni.»
14Bajegɔ Nyɛʔɛlɛ la Sye wì bɛfu fɔlɔ à li yo:
«Yè tokpɔɔ pe dá
na lama gban nyiŋi ga na,
mi dá yo mí bi tipeʔe
ga hanri ye na,
mi ìn dà honri bìʔi yaʔa
bahranʔa pomo ma na ge.
15Mí bi kakmaʔa hanri
Jerusalɛmu nì,
ní Juda go woo na be
ban kpo.
Yò gáa fyaʔa,
Bajegɔ Nyɛʔɛlɛ la Sye wì bɛfu fɔlɔ à li yo ban.
16Ga kí ma yala yé hanri ge
kiì gi ga ge.
Yè bɛfu nigbe nigbe
yee kanyɛmɛ nyu
yè hɛnnyɛɛ kan be,
ye kiti kon kanyɛmɛ nì
wa yè kyɛrɛ goyɛrɛ na de
frɛmɛ kala na le.#8:16 ma wèle wa Efɛ 4:25 ni wè.
17Yò gáa honri tipeʔe ye ni.
Yò gáa ye klan akpoʔo na ge.
Mɛjɛn ki yrɛbɛ ba pí na na bɛnʔɛ.
Bajegɔ Nyɛʔɛlɛ à li yo ban.»
Su como wlɛrɛ tí bi ba grɛʔɛ fɛti woro
18Bajegɔ Nyɛʔɛlɛ la Sye wì bɛfu fɔlɔ li dá yo ná ni mà yo: 19Li daʔá yo mà yo: «Su ŋa pé na cun, yɛlɛ li yere ticɛrɛ woʔo ni, kɔgunnu woʔo ni, nasyɛn woʔo ni, ní kɛ̂ woʔo ní tí bi ba wa bì grɛʔɛ bì bo srɛʔɛ ní, lafiʔimi nì, syeriʔi ní, ní lafiʔimi wlɛrɛ wa Juda go woo ma be. Di kanyɛmɛ nì, frɛmɛ ní pii ye glanʔa.»
20Bajegɔ Nyɛʔɛlɛ la Sye wì bɛfu fɔlɔ à li yo:
«Kloʔo ke tɔɔ hɛɛn fafaʔabaa
bi ba jɛ wa kyɛrɛ fafaʔa ni.
21Kaʔa kà hɛɛn bi baa sye
kaʔa kà woo krugu
bì yaʔa yo pe kan bì yo:
‹Ye pan wo kɛri wo ya
Bajegɔ Nyɛʔɛlɛ nyɛri le.
Wo kɛri wo yaa Bajegɔ Nyɛʔɛlɛ ca
la Sye wì bɛfu fɔlɔ we.
Wo plɛ̀n wo kɛri teme na.›
22Kloʔo ke tɔɔ hɛɛn fafaʔabaa ní
pe braʔafɛɛ ní
pé bi ba gɛri Jerusalɛmu ni,
bì yàá Bajegɔ Nyɛʔɛlɛ la
Sye wì bɛfu fɔlɔ ca le
bì da li nyɛri.»
23Bajegɔ Nyɛʔɛlɛ la Sye wì bɛfu fɔlɔ wɔ̀ɔ yo:
«Ki wlɛʔɛ na,
nabii kɛ̂ bi ba nyini wa
kloʔo ke tɔɔ hɛɛn ní be
bì da hɛnrɛ tà nyu tì yɛ,
ní kloʔo ke tɔɔ hɛɛn ní be
bì ba Juwifiyee naŋa
wà dreʔe kanla co bì yo:
‹Wo corí bì blɛn má ni bì gɛri,
mɛjɛn wó maʔa loʔo mà yo Nyɛʔɛlɛ lí nyɛ ye nì.› »
Currently Selected:
SAKARI 8: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
