SAKARI 7
7
Su como Jerusalɛmu kaʔa cɔʔɔmo kala na
1Masanaŋa Dariyusi wi masaʔa yɛʔɛ ticɛrɛ wolo li yere nacɛrɛ woʔo na, Kisilewu yege ki wlɛrɛ ticɛrɛ woʔo na, Bajegɔ Nyɛʔɛlɛ à li yo Sakari nì we. 2Betɛli kaʔa woo pe dá Saresɛri nì Hregɛmu nì, ní hɛɛn pèè tun mà yo pe kɛri pe ya Bajegɔ Nyɛʔɛlɛ yugu le. 3À pe yâ Bajegɔ Nyɛʔɛlɛ li go lama sraʔa farafɛɛ ní leyoo yugu mà yo: «Kí ma yala woo gbèlé wo su co yere kɔgunnu woʔo na nɛ pa wo klú náʔa hanri fan pomo ma na ge yo?» 4Ki nyiŋi na, Bajegɔ Nyɛʔɛlɛ la Sye wì bɛfu fɔlɔ wɔ̀ɔ yo ná ni mà yo: 5Maʔa yo klo hɛɛn pè bɛfu ma ní sraʔa farafɛɛ ní, ma pe po:
«Mà kpe yɛʔɛ too tanri
ní kprɔʔɔ ni,
yé na su cun mà na kpele
yere noli ní nasyɛn
woro na de.
Kanyɛmɛ na,
paʔa bo yé na ki su cun
domi kan yo?
6Nà ye da li bì da jo,
ye ìn ki cɛn bì yo
ye hin bo yé na li na jo
yèé yè kan yo?»
7Bajegɔ Nyɛʔɛlɛ li ìn da glú bì ki kayoro da yo li leyoo pe no na. Ki nyiŋi ga na, hɛɛn ní pé ma klɛn frɛmɛ na wa Jerusalɛmu kaʔa ni, ní ki klɛnmɛ kyɛrɛ nì de, ní yaa prama kamolo namyɛlɛ kyɛrɛ nì, ní gbendere ní de yo? 8Ki kruʔu ma, Bajegɔ Nyɛʔɛlɛ à li yo Sakari nì we mà yo: 9Bajegɔ Nyɛʔɛlɛ la Sye wì bɛfu fɔlɔ à li yo:
«Yee kiti kon kanyɛmɛ nì,
yee nyugara nì,
ní kmama kaʔa hanri
yè nibyee na be.
10Yò gáa kucaa ní,
piclibee ní,
lepanglɛɛn ní,
ní fyomo fɛɛ cɔlɔ be.
Yò gáa tipeʔe honri
yè hɛnnyɛ kan be.»
11Di pe ìn ki ta bìʔi loʔo. Pe ìn ki kayoʔo kpɔʔɔ ge. Pe dá pe nakpoʔolo ton ge, jango pò gaʔa loʔo. 12Pe dá pe dihon syeʔele we nɛ pa janma ŋglɛnʔɛ nyɛ, jango pò gáa Bajegɔ Nyɛʔɛlɛ la Sye wì bɛfu fɔlɔ li krɛʔɛmɛ kayoro ní, ní Nyɛʔɛlɛ li Nyili li kayoro nuru da li dá yo fanfan leyoo pe noro na de. Kiì kala na, Bajegɔ Nyɛʔɛlɛ la Sye wì bɛfu fɔlɔ lí ma lama gban pe ni ceŋge. 13Bajegɔ Nyɛʔɛlɛ la Sye wì bɛfu fɔlɔ lí yo:
«Mi dáa yeri nyiŋi ga na,
pe ìn da nuru ná ma.
Ki kala na pee pé ma na yeri
nyiŋi ga na mi ìn ki ta
bì loʔo pé ma.
14Hɛɛn tyɛnʔɛ gee
pe ìn dà jɛn ge,
mí ma pe canmu wa
pee kpafoʔo ni.
Pe klo à li ko waʔafele
wa pe kruʔu ma ge.
Hɛɛn wà nigbe
ìn dà go wa li ni.
Pé ma ki klokmala krɛʔɛ le
sinbriʔi deʔe.»
Currently Selected:
SAKARI 7: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
