SAKARI 10
10
Yee Bajegɔ Nyɛʔɛlɛ nyɛri le
1Ye Bajegɔ Nyɛʔɛlɛ nyɛri le,
jango li hɔgɔ kan ye ma
nyoro nyiŋi na ge.
Lí bi hɔgɔ hanri kiì nyɛri
bì hɔkpandoro kan ye ma.
Lí bi yè akaba ba ye fali fin be
wa yè bɛfu yè kere ni de.
2Mɛjɛn yè asunmu
pí ma akpoʔo leyoo kayoro yo.
Yè nyafɛɛ à pe akpoʔo
anyaʔa kayoro yo.
Pé na akpoʔo ŋloro
kayoro jari
mà na yugu fun dihonfiʔimi
kayoro nyu.
Ki kala na,
Israyɛli wí ma punŋu
na nyari na hɔlɔ
nɛ pa mbadaʔa nyɛ.
Pé na cɛlɛ,
mɛjɛn naʔafɔlɔ
wò nyɛ pé na.
3«Mí ma lama gban
mbara naʔafɛɛ bee nabonmoo ní be.
Mí bi ŋkapɛɛ cɔlɔ be,
mɛjɛn Bajegɔ Nyɛʔɛlɛ la
Sye wì bɛfu fɔlɔ wi pan
wi mbadaʔa ga krugu
kí nyɛ Juda go gi ge.
Lí bi pe krɛʔɛ nɛ pa mlaʔa
kmomo kakmaʔa nyɛ ge.
4Go noʔoma ŋglɛnʔɛ
kí bi ba nyini wa Juda wiì ni.
Kpasyoro go kanma
timoganla ní,
ní mlaʔa kmomo anda
bi nyini wa wi ni.
Kundiʔiyee pè bɛfu
pé bi ba nyini wa
wiì ni teme na.
5Pé bi ba bo nɛ pa
mlagmoo dihon nyɛ we,
bee pé na kaʔa kanŋaa
taplɔʔɔ tanri nyiŋi ga na ge.
Pé bi mlaʔa kmo,
mɛjɛn Bajegɔ Nyɛʔɛlɛ
lí nyɛ pé ni.
Fɛrɛ tí bi ba don pe bɛnfɛɛ
pe syongida luʔufɛɛ na be,
pa pe yuru hoʔo de.
6Mí bi Juda go
ki fanŋa kpɔʔɔ ge
bì Josɛfu go syɔ
ŋklomo ma me.
Mí bi pe tɛnŋɛ́ nɛ fonŋo,
mɛjɛn pe nyugara
tí na wa ná na.
Pé bi bo nɛ pa ma yo
mi ìn glu bì pe wa fyeu!
Mɛjɛn mí nyɛ Bajegɔ Nyɛʔɛlɛ
la pe Nyɛʔɛlɛ le,
mí bi da nuru pé ma.
7Efrayimu wí bi bo nɛ pa
naŋa braʔa fɔlɔ nyɛ we.
Wi pii pe dihon wí bi nyi
lafiʔimi na nɛ pa
pe hin dufɛn jɔ
mâ tin pomo ma na ge.
Ee, wi pii pé biʔi nya
bì bo lafiʔimi nì.
Pé bi da yɔʔɔri
Bajegɔ Nyɛʔɛlɛ li kala na le.
8Mí bi wyele wyeri
bì pe kpoʔolo deʔe nigbe na,
mɛjɛn mí ma pe syɔ
ŋklomo ni.
Pé bi nyɛʔɛ ceŋge
nɛ pa pe da glú mâ po fan ge.
9Mí bi pe canmu
wa kloʔo ke tɔɔ hɛɛn
kpafoʔo ni ge,
di pa pe da honri na kala na
ali bì pe yaʔa wa
klo leʔele ni le.
Pee ní pe pii ní
pa pe nyuwyeʔe ta,
ki kruʔu ma
pa pe hru bì ban.
10Mí bi ba pe nyini wa
Ejipite klo ni le,
bì pe nyini wa Asiri klo ni le,
bì ban pé ni nɛ Galadi nì,
ní Liban klo ni le.
Pè bɛfu pe ìn bi ba
klɛnhaʔa ta.
11Israyɛli kluʔu woo
pé bi ba nyugbɔmo kɔ me,
ga kí nyɛ cɔlɔʔɔ nyugbɔmo me.
Lí bi nyugbɔmo kokoliyee
kmo be.
Nili lɔkpɔʔɔ ticuʔumu dere
tì bɛfu tí bi ba waʔa.
Asiri klo li makpɔʔɔmo
mì bɛfu mí bi ba gɔ.
Ejipite klo masaʔa kangbolo le
pé bi ba li syɔ lí ma.
12Mí bi Israyɛli wi fanŋa
kpɔʔɔ ge wa Bajegɔ Nyɛʔɛlɛ ni le.
Pé bi baa danri liì fanŋa ni.
Bajegɔ Nyɛʔɛlɛ à li yo ban.»
Currently Selected:
SAKARI 10: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
