SAKARI 11
11
Fangbɔrɔ tí ma cɔʔɔ
1Liban,
ma goyɛʔɛ kɔrɔrɔ nyɛʔɛ de,
jango kwɔʔɔ kí
ma sɛdre tiri hogo de.
2Sipre tiri tì bɛfu tii jɛn,
mɛjɛn sɛdre tiri tí ma to.
Tiri da tí nyɛ kmara
mâ toro tì bɛfu na,
pé ma ti kon mà ti can.
Basyan syɛni tiri, tii jɛn,
mɛjɛn hɛɛn ìn dàá gbanni
bì da jin klɔʔɔ ga ni,
pé maʔa konʔolo.
3Pé na mbara naʔafɛɛ
konŋo nuru ge,
mɛjɛn pe ajobobo naʔahara
degmara tí ma cɔʔɔ.
Moò na yrafyɛn nuru
nà ki ìn bo jaripɔlɔ
jɛrifonŋo konŋo ban ge,
mɛjɛn Jurudɛn wi degmara
tí ma cɔʔɔ.
Mbara naʔafɛɛ syɛn kayoʔo
4Bajegɔ Nyɛʔɛlɛ la na Nyɛʔɛlɛ lí yo: «Ma krɛ̀ʔɛ̀ mbara da naʔafɔlɔ pé bi ba gbo ge ma kɛri tí ni wa lihaʔa na ge. 5Ti syɔfɛɛ pe ti kpo, di pee pè nyaʔa baʔahaʔa fun. Ti pɛrɛfɛɛ pa peʔe yo bì yo: ‹Pee Bajegɔ Nyɛʔɛlɛ sonni le. Mí bi nà krɛʔɛ yraʔafɔlɔ.› Ti naʔafɛɛ wà wóo nyugara ta tí na. 6Mɛjɛn Bajegɔ Nyɛʔɛlɛ lí yo: Klo lama hɛɛn pe nyugara toò na wa ná na adi. Mí bi ki hɛɛn yaʔa pe je pèè kyɛrɛ ni, mà plɛn pe masanaŋa nì we kpo. Pa pe klo cɔʔɔ le, mi ìn bi hɛn wà syɔ wa pe kyɛrɛ ni de.»
7Mbara da ti fanŋa kí ma kɔ wa ti tɔ ni de, kí ma yala pe ti kpo ge. Mí ma kɛri ki woro nì de lihaʔa na. Mí ma kangboʔolo syɛn kpe mà na là yeri “Kmama Kangbolo” na li tɔ yeri “Pwɔmo Kangbolo”. À mi na mbara konri de. 8Mí ma mbara naʔafɛɛ tanri prɔ yege nigbe ni, mɛjɛn na dihon wí ma te na na pe kala na le. Domi tapolo na la ìn dà bo pé na.
9À miʔi yo mà yo: «Mi ìn bi da ye jo adi. Bee pé na punŋu, pee bùnŋú. Bee pé na kun, pee gún. Bee pe koró, pe pè ka.»
10Ki kruʔu ma, à mi na yudanʔa kangbolo kaʔabu le, jango mi dá yoflimi nofele là kon kloʔo ke tɔɔ hɛɛn ma be li cɔʔɔ. 11Ki yoflimi nofele pa li jɔʔɔ ki wlɛdege na ge. Mbara pɛrɛfɛɛ bee pe dá bo wa mbadaʔa ni ge, ti dáa na wele màʔa cɛn mà yo Bajegɔ Nyɛʔɛlɛ liì kayoʔo gi. 12À miʔi yo pé kan mà yo: «Nàʔa ye glan, ye na sraʔa kà kan na ma. Nàʔa ye glan, yeʔe yaʔa yò gaʔa kan.»
Ki nyiŋi na, à pe na sraʔa tonli àʔa po wɛrifiʔi fonɛrɛ ma kɛ̀ kɛ̂.#11:12-13 ma wèle wa Mat 26:15; 27:9-10 ni wè. 13Bajegɔ Nyɛʔɛlɛ à liʔi yo ná ma mà yo: «Ma ya ki wɛrifiʔi wà ge wa cɔʔɔlɔ fanfɔlɔ wà tanla.» Pe dá pɛgbɔrɔ da kayoro yo tiì di.
À mi ki wɛrifiʔi fonɛrɛ mà kɛ̀ kɛ̂ kpe mà yaʔa wo wa cɔʔɔlɔ fanfɔlɔ tanla wa Bajegɔ Nyɛʔɛlɛ li sraʔa go ni ge. 14Ki kruʔu ma, à mi na kangbolo syɛn wolo kpe la kpoʔolomo wolo le mà li kaʔabu kpo jango Juda kluʔu nì, ní Israyɛli woʔo ní pò gá gboʔolo teme na, 15Bajegɔ Nyɛʔɛlɛ li daʔá yo ná kan mà yo: «Ma mbara naʔafɔlɔ wi drere le de nɛ. 16Mɛjɛn mí bi mbara naʔafɔlɔ wà fara wa klo ni le, ŋa mbara da tí na kun ti kala li ìn bi baa wi cori ge. Wi ìn bi baa da ca ti na punŋu ge, da tí ma kla wi ìn bi baa ti klara fwɔ de, da tí nyɛ gbanra wòo da ti kanʔa tiì li. Di da ti kpondó ma nylanʔa je, wí bi da ti kara ka de bì da ti yomicoro wlaʔa de.
17Mbara naʔafɔlɔ ŋa fanŋa fun wí na wi mbara wa ná ti yeri ge,
tipeʔe bi bɔɔ ta.
Mlaʔa kpele lí bi ba wi kyɛʔɛ nì,
ní wi kaligi nyɛlɛ ja le.»
Currently Selected:
SAKARI 11: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
