SAKARI 3
3
Anyaʔa ticɛrɛ woʔo: Sraʔa farafɛɛ kundiʔi Josuwe kala na le
1Ki kruʔu ma, Bajegɔ Nyɛʔɛlɛ à li sraʔa farafɛɛ pe kundiʔi Josuwe tyɛʔɛ we na na. Wi dá bo yerehaʔa wa li mlɛŋɛ yɛʔɛ ma ge. Sotanri wɔ̀ɔ po be kpo wi kaligi namyɛlɛ na le mà na baʔa wí na.#3:1 maʔa wèle wa Ɛsid 5:2; Tyɛ 12:10 ni wè. 2Bajegɔ Nyɛʔɛlɛ à liʔi yo Sotanri kan we mà yo: «Bajegɔ Nyɛʔɛlɛ li yo má ni ma ma no ton ge, Sotanri. Ee, Bajegɔ Nyɛʔɛlɛ la li dá Jerusalɛmu fara we, li yo má ni: Sotanri, ma ma no ton ge. Josuwe woò nyɛ nɛ pa kpasyo konʔo nyɛ ga pé maʔa syɔ kwɔʔɔ ma ge yo?»#3:2 ma wèle wa Jude 9 ni wè.
3Kiì nì kì bɛfu ní, Josuwe wi drere ti dá bo kranra. Wɔ̀ɔ po yerehaʔa be mlɛŋɛ tanla we. 4Bee pe da yeré wa mlɛŋɛ wi yɛʔɛ ma ge, wɔ̀ɔ kí yo pé ma nɛ mà yo: «Drere da tí nyɛ kranra wa wí na lere de, ye ti fàrà wi na. Ki kruʔu ma, wɔ̀ɔ kí yo Josuwe mà we mà yo: Wele mí bi klomo fara mà na bì kpasyokmara le má na.»
5Ki nyiŋi na, à miʔi yo mà yo pe kpasyokolo fili pwɔ wa wi yugu na pe dreʔe kà le wí na kì yɛ, Bajegɔ Nyɛʔɛlɛ li mlɛŋɛ wi yɛʔɛ na ge. 6Ki kruʔu ma, Bajegɔ Nyɛʔɛlɛ li mlɛŋɛ wɔ̀ɔ yo Josuwe nì we mà yo: 7«Bajegɔ Nyɛʔɛlɛ, la Sye wì bɛfu fɔlɔ à li yo:
‹Nà ma da na kloro tanri
bì da na kaʔa kɔrɔsi
gee mí yo mâ yaʔa ge,
pa ma grɛʔɛ na go kundiʔi
bì da na kasyɛn kɔrɔsi ge.
Hɛɛn bee pé nyɛ wa
yerehaʔa na yɛʔɛ ma ge,
má bi da tunŋu ko wa
pe kpafoʔo ni ge.
Nyɛʔɛlɛ lí bi ba li tungɔɔ hanri wi pan
8Sraʔa farafɛɛ kundiʔi Josuwe,
mo ní ma nibyee bee ní
ye klɛ́n wa teme na,
na pe da kaʔa gee nyu
ké bi ba hanri kruʔu ma ge,
ye nagruʔu can ye lòʔó.
Mí bi na tungɔɔ jrɛʔɛ we,
ŋa wí nyɛ nɛ pa
tiʔi kaclaʔa nyɛ
ga kí ma nyini ge.#3:8 ma wèle wa Jer 23:5; 33:15; Sak 6:12 ni wè.
9Ŋglɛnʔɛ ga mí ma tyɛʔɛ wa
Josuwe tanla we,
nyɛʔɛ nasyɛn nyɛ
ki ŋglɛnʔɛ na ge.
Yraʔa ga kí ma yala
pe nyoŋo waʔa na,
mí biʔi nyoŋo waʔa na.
Mí bi ki klo la
li klomo laʔa li na
wlɛʔɛ nigbe na.
Bajegɔ Nyɛʔɛlɛ la
Sye wì bɛfu fɔlɔ à li yo ban.
10Ki wlɛʔɛ na,
pa ye ba yè kpoʔolo wa
hrɛsɛn tiri ní,
ní yè mruʔu tiri noʔo na ge.
Bajegɔ Nyɛʔɛlɛ la
Sye wì bɛfu fɔlɔ à li yo ban.› »#3:10 ma wèle wa Mis 4:4 ni wè.
Currently Selected:
SAKARI 3: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
