SAKARI 2
2
Anyaʔa syɛnwoʔo: Nyɛŋɛɛ ní, ní timoro kmofɛɛ ní
1Ki kruʔu ma, à mi na yɛʔɛ jrɛʔɛ mà wele. Mi dá nyɛŋɛɛ ticɛrɛ nya. 2Mlɛŋɛ ŋa wi dáa nyu ná ni, à miʔi yo wí ma mà yo: «Ki nyɛŋɛɛ ke kɔrɔ wí nyɛ nyaʔa gi?»
Wɔ̀ɔ na po: «Ki nyɛŋɛɛ ke nyɛ kloʔo gɛ gee ké nyɛ fanŋa nì mâ po ke dá Juda kluʔu nì, Israyɛli woo ní, ní Jerusalɛmu kaʔa woo craʔa be kee gɛ.» 3Ki kruʔu ma, Bajegɔ Nyɛʔɛlɛ à li timoro kmofɛɛ ticɛrɛ tyɛʔɛ ná na. 4À mi yo: «Ki woo bee be pé bi ba nyaʔa hanri?»
Mlɛŋɛ wɔ̀ɔ ná po: «Ki nyɛŋɛɛ gee ke dá Juda kluʔu canmu ge fɔ hɛn wɛ̀ ìn gban bì yugu jrɛʔɛ ge adi. Ki timoro kmofɛɛ pé ma pan, jango bì ba ki nyɛŋɛɛ fiʔiri ge bì kloʔo ke tɔɔ hɛɛn pe fanŋa kɔ ge, ki woo bee pe dá nyɛŋɛ́ɛ jrɛʔɛ mâ ke wa Juda kluʔu woo na be mâ pe canmu ge.»
Anyaʔa tanri woʔo: Tonlimo maʔala
5Ki kruʔu ma, à mi yɛʔɛ jrɛʔɛ mà wele. Mi dá hɛn wà nya yerehaʔa tonlimo maʔala dà bo wa wi ma wi kyɛʔɛ ni ge. 6À miʔi yo wí kan mà yo: «Má na sye bì ya Jerusalɛmu kaʔa ki tiklonmo ní ki pyalama pomo cɛn me.»
7Mlɛŋɛ ŋa wi dáa nyu ná ni, wi dá jɛ mâ yo wí bi da sye nyiŋi ga na, à mlɛŋɛ wà ma pan nɛ mà bɔ́ɔ̀ flin màʔa yo wí kan mà yo: 8«Ma fɛ̀ ma kɛri najɛpii maʔala fɔlɔ krugu ma yaʔa yo wí kan moo po Jerusalɛmu kaʔa goyɛrɛ tí bi go nyɛʔɛrɛ bee kan pé nyɛ wa ki lama ni ní ki ajobo pi fafaʔama kala na le. 9Bajegɔ Nyɛʔɛlɛ à li yo: ‹Mí bi grɛʔɛ kwɔʔɔ gunŋu bìʔi kolo bìʔi krɛʔɛ. Mí bi bo kpangbanma kmara wa ki nulala ni le.› »
Bajegɔ Nyɛʔɛlɛ lí ma ŋkloó yeri be
10Bajegɔ Nyɛʔɛlɛ à li yo:
«Yee fe,
yaa prama kamolo kloʔo hɛɛn.
Ye fɛ̀ ye nyini wa,
mɛjɛn domi Bajegɔ Nyɛʔɛlɛ le,
mí yo:
Mí ma ye canmu namuru
ti namyɛʔɛlɛ ticɛrɛ tiflɛʔɛ ní.
11Jerusalɛmu kaʔa woo
bee pe dá jo mâ ya pe tɛnŋɛ
wa Babilɔni ni,
ye fɛ̀ ye yè syɔ.»
12Kloʔo ke tɔɔ hɛɛn bee pe dá ye cɔʔɔ, Bajegɔ Nyɛʔɛlɛ lí ma na tun peè krugu, mɛjɛn liì la Sye wì bɛfu fɔlɔ lí bi kpɔʔɔmo pa má na. À li yo:
«Hɛɛn bee pe dá kyɛʔɛ pa ye na,
pé maʔa pa wa
na nyɛlɛ pyɔ wiì na.
13Wele mí bi na kyɛʔɛ jrɛʔɛ
ki kloʔo ke tɔɔ hɛɛn
krugu be.
Bee pe krɛʔɛ́ pe ŋkloo be,
ki woo pé bi pe co
bì pe krɛʔɛ ŋkloo.»
Ki nyiŋi na, pa peʔe cɛn bì yo Bajegɔ Nyɛʔɛlɛ la Sye wiì bɛfu fɔlɔ wì ma na tun. 14Bajegɔ Nyɛʔɛlɛ à li yo:
«Jerusalɛmu kaʔa woolo,
yee ŋú yee yɔʔɔri lafiʔimi nì,
mɛjɛn mí bi glɛn wa
yè kpafoʔo ni ge.
15Ki wlɛʔɛ na,
kloʔo ke tɔɔ fafaʔa bi ba ba
domi Bajegɔ Nyɛʔɛlɛ na le
bì grɛʔɛ na hɛɛn.
Mí bi ba glɛn wa yè kpafoʔo ni ge.»
Ki nyiŋi na, pa yeʔe cɛn bì yo Bajegɔ Nyɛʔɛlɛ la Sye wì bɛfu fɔlɔ liì ma na tun ye ma.
16Bajegɔ Nyɛʔɛlɛ
lí bi ba Juda klo kpe
bì li krɛʔɛ li wolo
bì li krɛʔɛ li po klo ylɛlɛ.
Lí bi ba Jerusalɛmu fara we
nɛ fonŋó.
17Kí ma yala hɛɛn pè bɛfu
pe pyèrì wa Bajegɔ Nyɛʔɛlɛ
li yɛʔɛ ma ge,
mɛjɛn nàʔa mo cɛnri ge,
lí bi jɛ wa li deylɛʔɛ na ge.
Currently Selected:
SAKARI 2: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
