SAKARI 1
1
Bajegɔ Nyɛʔɛlɛ lí ma Israyɛli woo yeri be
1Masanaŋa Dariyusi wi masaʔa yɛʔɛ syɛn wolo li yere natanri woʔo na, Bajegɔ Nyɛʔɛlɛ li dá yo Nyɛʔɛlɛ leyoo Sakari nì we. Berekya wi dá bo Sakari wi to. Ido wɔ̀ɔ po Berekya wi to.#1:1 ma wèle wa Ɛsid 4:24 - 5:1; 6:14 ni wè. 2Bajegɔ Nyɛʔɛlɛ li daʔá yo wí kan mà yo wiʔi yo Israyɛli kluʔu woo ma be wi pe po: «Domi Bajegɔ Nyɛʔɛlɛ la Sye wì bɛfu fɔlɔ, mi dá lama gban yè tokpɔɔ ní be ceŋge. 3Di ye hrù ye pan nà krugu, domi pa mi hru yèé krugu be kpo. Bajegɔ Nyɛʔɛlɛ la Sye wì bɛfu fɔlɔ lí yo ban. 4Yò gáa yè tokpɔɔ pe kahranʔa ploʔo ge. Fanfan Nyɛʔɛlɛ leyoo pe daʔá yo pé kan mà yo Bajegɔ Nyɛʔɛlɛ la Sye wì bɛfu fɔlɔ wí yo: Pe wa pe krɛ̀ʔɛ̀ pe pe klobeʔe yaʔa ní pe kahranbeʔele ní ge. Di pe ìn dàʔá ta bì loʔo ná ma, pe ìn nagruʔu can bì na kayoro loʔo de. 5Bajegɔ Nyɛʔɛlɛ à li yo: Yè tokpɔɔ pé nyɛ hanbe? Dee di, ki leyoo pe dá bì go nyuwyeʔe na su yo? 6Di mi dá kayoro ní, ní tunmu ma kan na tungɔɔ leyoo ma be, pi ìn dà no wa yè tokpɔɔ na be yo? Yè tokpɔɔ à pe bâ wa mà krɛʔɛ mà naʔa nyu mà yo: Bajegɔ Nyɛʔɛlɛ la Sye wì bɛfu fɔlɔ li dá ga kon mâ yaʔa wò tanʔabeme kala na, ní wò kahranʔa ní ge, à li pì bɛfu yaʔa à pi to wo na.»
Anyaʔa kplɛʔɛ kiì ga ge: Syongidayee
7Dariyusi wi masaʔa yɛʔɛ syɛn wolo li yere kɛ̂ mà kɛ̀ ticɛrɛ woʔo na, Bajegɔ Nyɛʔɛlɛ li dá yo li leyoo Sakari nì we mà yo: 8Mi dá anyaʔa kà nya yebliʔi ni. À mi hɛn nya wi luʔú wa syongida nyɛʔɛ na. Wi da yeré wa mirite tiri tanla wa angoro nulala ni le. Syongida nyɛɛ ní tyonro woo ní, ní fiili ní pèè dá bo wa wi kruʔu ma ge.#1:8 ma wèle wa Tyɛ 6:2-8 ni wè.
9Ki nyiŋi na, à miʔi yo mà yo: «Na Fɔlɔ, ki syongidayee bee pé na nyaʔa teri?»
Mlɛŋɛ ŋa wi dá yo ná ni, wɔ̀ɔ yo: «Pé na ga teri mí biʔi tyɛʔɛ má na.»
10Naŋa ŋa wi dí bo wa yerihaʔa wa mirite tiri kpafoʔo ni, wɔ̀ɔ kí yo ná kan mà yo: «Bee Bajegɔ Nyɛʔɛlɛ lí tun mâ yo pe tra tì bɛfu nyari dere tì bɛfu na ge, peè bɛ.»
11Ki kruʔu ma, Bajegɔ Nyɛʔɛlɛ li mlɛŋɛ ŋa wi dá bo wa yerehaʔa mirite tiri kpafoʔo ni, syongida luʔufɛɛ à peʔe yo wí kan mà yo: «Wó ma klo li dere tì bɛfu nyari. À woʔo nya hɛɛn bee wa tra na pè bɛfu pé nyɛ fyonriʔi na. Pé nyɛ frɛmɛ na.»
12Ki nyiŋi na, li mlɛŋɛ wɔ̀ɔ kí yo nɛ mà yo: «Bajegɔ Nyɛʔɛlɛ la Sye wì bɛfu fɔlɔ we, ma dá lama gban Jerusalɛmu nì Juda kluʔu kyɛrɛ da nì mà kpe kí ma yɛʔɛ too tanri ní kprɔʔɔ kɔ ge, má bi nyugara ta bì ki lagbanma kɔ me nyaʔa nyiŋi na?»
13Mlɛŋɛ ŋa wi dá yo ná ni, Bajegɔ Nyɛʔɛlɛ à li kayokmara ní lafiʔimi kayoro yo wí kan.
Bajegɔ Nyɛʔɛlɛ lí bi Jerusalɛmu fara we nɛ fonŋo
14Ki kruʔu ma, mlɛŋɛ ŋa wi dáa nyu ná ni, wɔ̀ɔ kí yo ná kan mà yo bì daʔara bìʔi yo bì yo Bajegɔ Nyɛʔɛlɛ la Sye wì bɛfu fɔlɔ à li yo:
«Mi dá bo yejaʔa nì ceŋge Jerusalɛmu nì,
ní Sinyo angogo kala na le.
15Mí ma lama gban me ceŋge ki hɛɛn bee ní pé nyɛ frɛmɛ na ge,
mɛjɛn nyiŋi ga na mi dá lama gban cɛnri Israyɛli kluʔu woo ní be,
ki hɛɛn tyɛnʔɛ gee à ke kà haʔa wa Israyɛli wi cɔlɔʔɔ na ge.
16Ki kala na, Bajegɔ Nyɛʔɛlɛ lí yo:
Mí bi hru bì gɛri Jerusalɛmu ni we nyugara nì.
Na sraʔa go pé bi yaʔa fan wa nɛ fonŋo.
Pé bi tonlimi maʔala pa le wa Jerusalɛmu na we.
Bajegɔ Nyɛʔɛlɛ la Sye wì bɛfu fɔlɔ liì maʔa yo.»
17Maʔa yo gbanʔa nɛ akpokpɔʔɔ ni ma yo Bajegɔ Nyɛʔɛlɛ la Sye wì bɛfu fɔlɔ wí yo:
«Na kyɛrɛ tí bi braʔa ta nɛ.
Bajegɔ Nyɛʔɛlɛ lí bi Sinyo hàʔa we bi wi dihon fìʔi we nɛ fonŋo.
Lí bi Jerusalɛmu fara we nɛ fonŋo.»
Currently Selected:
SAKARI 1: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
