AGIJE 2

Nyɛʔɛlɛ li sraʔa gofonŋo ki kmara

1Yɛlɛ li yere nasyɛn woʔo ki wlɛrɛ fonɛrɛ mà kɛ̀ nigbe woʔo na, Bajegɔ Nyɛʔɛlɛ à li yo li leyoo Agije wi no na mà yo: 2Maʔa yo Juda klo kundiʔi Sorobabɛli ma we, wí nyɛ Seyalicɛli najɛ, ní sraʔa farafɛɛ kundiʔi Josuwe nì, wí nyɛ Yoyadaki najɛ wi, ní hɛɛn pe tɔɔ pè bɛfu ní ma pe po: 3«Hɛɛn bee pe da glú mâ ki sraʔa gokmaʔa nya fan ge, ki woo pèè nyɛ wa nyuwyeʔe na yo? Ki tɔ na, kí nyɛ yèé yè yɛʔɛ na ge mɛlɛ ŋaŋa ni ge? Koò nyɛ ye ma nɛ pa yraʔa kà nyɛ yo?#2:3 ma wèle wa Ɛsid 3:12 ni wè.

4Kiì nì kì bɛfu ní, Bajegɔ Nyɛʔɛlɛ à li yo: Sorobabɛli, ma dihon le ma ni. Sraʔa farafɛɛ kundiʔi Josuwe, maa mà kpanŋi. Klo lama hɛɛn pè bɛfu, ye dihon le ye ni. Yee tunŋu ko, mɛjɛn mí nyɛ ye nì. Bajegɔ Nyɛʔɛlɛ à li yo ban. 5Mi dá yoflimi nofele la kon ye ma yè nyinimi nyiŋi na wa Ejipite klo ni le, liì li la le mâ yo na Nyili lí bi glɛn wa yè kpafoʔo ni ge. Ki kala na, yò gáa fyaʔa. 6Ee, Bajegɔ Nyɛʔɛlɛ la Sye wì bɛfu fɔlɔ à li yo: Nàʔa mo cɛnri ge, mí bi namuru ní, tra ní nyugbɔmo nì, pì bɛfu kpoʔoro.#2:6 ma wèle wa Ebr 12:26 ni wè.

7Mí bi kloʔo ke tɔɔ hɛɛn pè bɛfu kan pee hiʔiri. Kloʔo ke tɔɔ hɛɛn pè bɛfu pe masaʔa kí bi ba gboʔolo naʔamɛ ge. Mí bi ki go ga nyi kpangbanma kmara ní. Bajegɔ Nyɛʔɛlɛ la Sye wì bɛfu fɔlɔ à li yo ban. 8Wɛrifiʔi nì tɛ nì pì bɛfu pi klɛ́n ma domi kan. Bajegɔ Nyɛʔɛlɛ la Sye wì bɛfu fɔlɔ wɔ̀ɔ yo ban. 9Ki sraʔa go syɛn woʔo ga ki kpangbanma kmara tí bi doro fɔ kplɛʔɛ woʔo na ge. Mí bi frɛmɛ pa naʔa ki deʔe ga na ge. Bajegɔ Nyɛʔɛlɛ la Sye wì bɛfu fɔlɔ wɔ̀ɔ yo ban.»

Hɛɛn pe kranma kayoʔo

10Masanaŋa Dariyusi wi masaʔa yɛʔɛ syɛn wolo li yere nacɛrɛ woʔo ki wlɛrɛ fonɛrɛ mà kɛ̀ ticɛrɛ woʔo na, Bajegɔ Nyɛʔɛlɛ à li yo li leyoo Agije no na. 11Li daʔá yo mà yo Bajegɔ Nyɛʔɛlɛ la Sye wì bɛfu fɔlɔ lí yo: «Ma sraʔa farafɛɛ yugu be krɛʔɛmɛ kayoro ní, ma pe po: 12Nà hɛn wà bí sraʔaylɛɛ kara tà kpe wi dreʔe kyɛʔɛ ní bì ba wi dreʔe yaʔa ki màʔà bru na, ná kiì ban, dufɛn wi, kana hunmu mi, ná kiì ban, akaʔa kà gi, nàʔa maʔa yraʔa o yraʔa na ge, ki yraʔa paʔa grɛʔɛ bì bo ylɛʔɛ yo?» Sraʔa farafɛɛ à pe yo: «Ayo.» 13Agije wɔ̀ɔ kí yo nɛ mà yo: «Nà hɛn wà bí wì kran kpo, ki woo nòo maʔa yraʔa kà na ga kí nyɛ ylɛʔɛ, ki yraʔa ga kí nyɛ ylɛʔɛ, paʔa gran kpo yo?» Sraʔa farafɛɛ à poo po: Ee, paʔa gran kpo. 14Ki nyiŋi na, Nyɛʔɛlɛ leyoo Agije wɔ̀ɔ yo pé ni nɛ mà yo: «Bajegɔ Nyɛʔɛlɛ lí yo: Ki hɛɛn bee pe tyɛnlɛ lí nyɛ ban kpo wa domi na yɛʔɛ na ge, pe kyɛrɛ tunŋu àʔa po ban kpo. Pé na nadanma yrɛbɛ ba kanʔa ná ma, pí nyɛ kranma.

Ye nagruʔu can, yee nùrú mà kpe alaʔa na

15Ye honri kmaʔa kaʔa gee na ke da glú mâ toro fan ge. Sanni yé bi Bajegɔ Nyɛʔɛlɛ li go fanma ŋglɛnrɛ pa ti na ge. 16Nà hɛn wà bi gɛri bi yo wí bì yà ble alenyɛʔɛ fonɛrɛ fara wa wi bolo ni le, wi na ya nya wa kɛ̂ droon. Nà hɛn wà bi gɛri bi yo wí bì yà dufɛn litriyee too syɛn ní kprɔʔɔ ko wa wi tyɛʔɛhaʔa na, wi na yâ nya wa litriyee fonɛrɛ droon. 17Mi dí waama ní akaʔa pibi fonʔomo ní, ní yreʔe fuʔurumu tyɛʔɛ mà yè yrɛbɛ pì bɛfu cɔʔɔ. Di kiì nì kì bɛfu ní, ye ìn diʔí ta bì hru bì ban nà krugu. Bajegɔ Nyɛʔɛlɛ à li yo ban. 18Ga ki dá hanri mà kpe yɛlɛ li yere nacɛrɛ woʔo ki wlɛrɛ fonɛrɛ mà kɛ̀ ticɛrɛ woʔo na, Bajegɔ Nyɛʔɛlɛ li sraʔa go ki noʔoma leme me, ní ga nì kí bi ba hanri alaʔa wlɛʔɛ nàʔa toro kɔ ge ye honri ki kaʔa kè bɛfu na. 19Akaba pà nyɛ wa ye ma yè bogoo ni ge yo? Hrɛsɛn tiri ní, mruʔu tiri ní, olife tiri ní, kà nigbe ìn dà sɛ. Ki kala na, mà kpe alaʔa na, mí bi na frɛmɛ pa ye na fafaʔa ceŋge.»

Bajegɔ Nyɛʔɛlɛ lí nofegee kónmo Sorobabɛli ma

20Bajegɔ Nyɛʔɛlɛ li dá yo nɛ li leyoo Agije no na ki syɛn woʔo na ki yɛlɛ li yege ki wlɛrɛ fonɛrɛ mà kɛ̀ ticɛrɛ woʔo na, 21mà yo wi yo Juda klo kundiʔi Sorobabɛli nì we wuu po: «Mí bi namuru ní tra kpoʔoro de.

22Mí bi masara ti fanŋa kɔ ge wa na hɛɛn pe kpafoʔo ni ge. Mí bi mlanʔa kmomo syon kɔrɔrɔ nì, ní bee ní pé na jin wa ti lama ni plɛn bì pe can tra na. Syongidayee ní pe luʔufɛɛ plɛn bì pe kpo mlanʔa kpele ni. Pé bi ba pe kpo.

23Bajegɔ Nyɛʔɛlɛ la Sye wì bɛfu fɔlɔ wɔ̀ɔ yo: Ki wlɛʔɛ na, mí bi ba na tungɔɔ Sorobabɛli kpe bùu krɛʔɛ lɛgɛ nɛ pa feʔeŋe nyɛ we, mɛjɛn mí moo fara. Bajegɔ Nyɛʔɛlɛ la Sye wì bɛfu fɔlɔ wɔ̀ɔ yo ban.»

Currently Selected:

AGIJE 2: NLK10

Highlight

Copy