AGIJE 1

Nyɛʔɛlɛ li sraʔa go ki fanfonmo

1Masanaŋa Dariyusi wi masaʔa yɛʔɛlɛ syɛn wolo li yere noli woʔo ki wlɛgblɛʔɛ na, Bajegɔ Nyɛʔɛlɛ à li yo li leyoo Agije no na, wɔ̀ɔ kí yo Juda klo kundiʔi Sorobabɛli ma we, wi dá bo Seyalicɛli najɛ, ní sraʔa farafɔlɔ Josuwe ma we, wiì wi dá bo Josadake najɛ.#1:1 ma wèle wa Ɛsid 4:24 - 5:2; 6:14 ni wè. 2Sye wì bɛfu fɔlɔ Bajegɔ Nyɛʔɛlɛ à li yo: «Ki hɛɛn bee pé naʔa nyu mà yo Bajegɔ Nyɛʔɛlɛ li sraʔa go ki fannyiŋi ki ìn je dyɛʔɛ kpɛn. 3Ki kala na, Bajegɔ Nyɛʔɛlɛ lí ma yo li leyoo ŋa li tungɔɔ Agije wi no na mà yo: 4Yèé ma be, kí nyɛ ylaʔa yo ye klɛn wa yè gokmara ni de mà feri yrɛkmama ní, di Bajegɔ Nyɛʔɛlɛ li sraʔa go ki kò be toʔo ge yo? 5Ki kala na, Sye wì bɛfu fɔlɔ Bajegɔ Nyɛʔɛlɛ lí yo: Kloʔo ga yé ma kpe ge, ye honriʔi na kmaʔa ceŋge. 6Ye dá akaba fafaʔa ton, di ye ìn ba akaba fafaʔa ta bì pi kon. Yé na li, di yoò na tinli. Yé na jo, di yè nyujɔʔɔ ki in je gɔ. Kpasyoro nyɛ ye na lere, di toò na wyere ko ye na. Wa yèé ni bee pé na tunŋu ko mâ na gbejanra taʔa, pé na ti wa kasyara da ni tí nyɛ fruguru ge. 7Bajegɔ Nyɛʔɛlɛ la Sye wì bɛfu fɔlɔ à li yo: Kloʔo ga yé ma kpe ge, ye honriʔi na ceŋge. 8Ye luʔu wa angogo na, ye pan tiri ní, ye ba sraʔa go fan ge. Paʔa glan domi nì we, pa mi kpɔʔɔmo ta Bajegɔ Nyɛʔɛlɛ à li yo ban. 9Ye dáa honri na pa akaba fafaʔa tama na, di ye ìn ba akaba fafaʔa ta. Ye dáa ki honri mà yo yé bi yè akaba kon bì ban pí ni yè goro ni nyiŋi ga na, à mi pì bɛfu fɛ na no tiflɛʔɛ ní ge. Ki dá hanri nyaʔa kɔsɔ na? Mɛjɛn na sraʔa go kí ma cɔʔɔ, di yèé yè bɛfu nigbe nigbe yé na fyala na yè gotara fanri de. 10Ki kala na, namuru da wa yè yugu na ge, ti ìn ki ta bì kamɛŋɛ kà kan ye ma. Tra ti ìn ki ta bì akaba ba kan ye ma yé na fali ge. 11Mí ma waama hanri, à mi co wa yè kere ni de, yè angoro ní, yè ble nì, ní yè hrɛsɛn nì, yè hunmu farahara ní, ní tra ti tonro tayrɛbɛ nì, ní hɛɛn ní, ajobo nì, ní yè kyɛʔɛ ahranma pì bɛfu ní.»

12Ki nyiŋi na, Seyalicɛli najɛ Sorobabɛli nì, ní Josadake najɛ ŋa sraʔa farafɛɛ kundiʔi Josuwe nì, ní hɛɛn pe tɔɔ pè bɛfu ní, à pe nagruʔu can, jango bì Bajegɔ Nyɛʔɛlɛ la pe Nyɛʔɛlɛ li noyomo loʔo ma mi dá yo Nyɛʔɛlɛ leyoo Agije ma wi mi yo pé kan ge. Hɛɛn pè bɛfu à pe fya Bajegɔ Nyɛʔɛlɛ na le. 13Bajegɔ Nyɛʔɛlɛ li dá Agije tun wi ba yo ki hɛɛn bee ní bì yala liì Bajegɔ Nyɛʔɛlɛ li tunmu ní ma li dá gan wí ma ge mà yo: «Mí nyɛ ye nì.» 14Ki kruʔu ma, Bajegɔ Nyɛʔɛlɛ à li Juda klo kundiʔi Sorobabɛli nì, sraʔa farafɛɛ kundiʔi Josuwe nì, ní hɛɛn pè bɛfu kan dihon nì. Pè bɛfu pe dá ban mà bâ Bajegɔ Nyɛʔɛlɛ la Sye wì bɛfu fɔlɔ li sraʔa go tunŋu hli ge. 15Ki dá hanri masanaŋa Dariyusi wi masaʔa yɛʔɛ syɛn wolo li yere noli woʔo ki wlɛrɛ fonɛrɛ mà kɛ̀ ticɛrɛ woʔo na.

Currently Selected:

AGIJE 1: NLK10

Highlight

Copy