SOFONI 3
3
Jerusalɛmu wi ìn loʔo Nyɛʔɛlɛ li yerime ma me
1Kaceʔe,
mà po kranʔa mo ŋa
má na hɛɛn cɔʔɔ be,
tipeʔe bi ma ta.
2Mɛjɛn ki ìn dà loʔo
yerime ma me.
Ki ìn dàʔa ta bi yrɛmɛ
kayoro loʔo de.
Ki ìn ki ta kpo
bì ki honriʔi pa
Bajegɔ Nyɛʔɛlɛ na le.
Ki ìn dàʔa ta bì flo wa
ki Nyɛʔɛlɛ tanla le.
3Ki kaʔa ga,
ki lama kundiʔiyee pé nyɛ
nɛ pa jariyee bee nyɛ
pé na colo ge.
Ki kundiʔiyee à pe po
nɛ pa sanwyeʔe nyɛ
gee ké na kara ca
yaakwɔʔɔ na.
Di ke in je tà yaʔa
kpɛndo woro.
4Ki Nyɛʔɛlɛ leyoo pé nyɛ
makpɔʔɔmo fɛɛ mà po
hɛɛn punŋumu fɛɛ kpo.
Ki sraʔa farafɛɛ
pé na deylɛʔɛ kran ge
mà na krɛʔɛmɛ cɔʔɔ me.
5Bajegɔ Nyɛʔɛlɛ sinli
lí nyɛ wa klɛnhaʔa
ki lama ni me.
Klomo wò wa liì ni le.
Lí na li kahranʔa ní
li sinmi teri finmi na
jɛfanʔa o jɛfanʔa.
Li in je fleʔe ki woʔo na ge.
Di, kiì nì kì bɛfu ní,
hɛnkloŋo wi in je fɛrɛ cɛn.
6Bajegɔ Nyɛʔɛlɛ à li yo:
«Mí ma kloʔo ke tɔɔ hɛɛn
pèè kpo,
à pe kɔ mà pe gotiklonro
jrɛʔɛrɛ cɔʔɔ de.
Mí ma pe kaʔa namyɛʔɛ hanri,
à ke ko hɛɛn fun.
Hɛɛn wà nigbe wò na toro wa
pe ma adi.
Pe kyɛrɛ tí ma jaʔabu
mà krɛʔɛ tomoyee,
fɔ hɛn wà nigbe ìn gban
bì glɛn wa ti ni adi.
7À miʔi yo wa
na lama ni mà yo:
Nàʔa po Jerusalɛmu
wi dí biʔi ta bì da fyaʔa
ná na nɛ bì da yrɛmɛ kayoro
nuru de,
pe klɛnhaʔa ki ìn dì bi jaʔabu.
Mí dá kayoro da yo
mâ wa pe ma,
ti ìn dì bi pe ta.
Di pé na fyala
na katipeʔe hanri.»
8Ki kala na,
Bajegɔ Nyɛʔɛlɛ à li yo:
«Ye na han.
Yeʔe cɛn ye yo
ki wlɛʔɛ kí na pan wa,
mí bi ba jɛ bì kiti kon we.
Mɛjɛn mi diʔi kón màʔa yaʔa
mà yo mí bi kluru nì,
ní masara kpoʔolo
deʔe nigbe na.
Na lagbangbɔmo
mí bi na nafunŋu yaʔa
ki to pé na.
Na lagbanma kwɔʔɔ
ki bi tra tì bɛfu hogo.
Nyɛʔɛlɛ lí bi ba hɛɛn pe kluru krɛʔɛ de
9Ki nyiŋi na,
mí bi nosɛrɛ da kan
kloʔo ke tɔɔ hɛɛn ma.
Tí bi bo ylɛrɛ de,
jango pè bɛfu
pee Bajegɔ Nyɛʔɛlɛ
li yele yeri le.
Pee tunŋu ko lí kan
dihon nigbe ní.
10Na kpɔʔɔfɛɛ ní,
ní na hɛɛn bee pé ma craʔa
wa Etyopi klo lɔʔɔ
kruʔu ma ge,
pè bɛfu pé bi ba nadanma
yrɛbɛ kan ná ma.
Israyɛli hɛɛ bee pe koró ge
11Ki wlɛʔɛ na ge,
Israyɛli mɛ ìn bi ba fɛrɛ ta
bì klomo ta na namyɛlɛ na le.
Hɛɛn bee pé nyɛ lafiʔimi nì
makpɔʔɔmo ní ge.
Mí bi pe nyini wa
ma kpafoʔo ni ge.
Mɛ ìn bi da mà kpɔʔɔ
wa adi na angoylɛʔɛ
yugu na ge.
12Hɛn ŋa wí na wì cɛrɛ
mâ po fanŋa fun ge,
ki woo bee pé ma
pe honriʔi pa
Bajegɔ Nyɛʔɛlɛ na le.
Mí bi pe yaʔa wa
ma kpafoʔo ni ge.
13Israyɛli woo bee
pe koró pe ìn bi baa
klomo hanri adi,
pe ìn bi baa flɛnʔɛ.
Fanlanma kayoro ìn bi baa
nyini wa pe noro ni de.
Di pé bi baa li bì da fyonri.
Hɛn wɛ ìn bi ba fyara lege
pé ni adi.»#3:13 ma wèle wa Tyɛ 14:5 ni wè.
Jerusalɛmu wi fyonriʔi tama kayoʔo
14 Sinyo kaʔa,
maa daʔara lafiʔimi nì.
Israyɛli, maa yɔʔɔri gbanʔa.
Jerusalɛmu, ma po lafiʔimi nì,
maa yɔʔɔri
ma dihon wì bɛfu ní.
15Bajegɔ Nyɛʔɛlɛ
li dá kiti kayoʔo ga yo
ma kala na le.
Lí moo yaʔa.
À li ma bɛnfɛɛ laʔa be má na.
Israyɛli, ma masanaŋa,
Bajegɔ Nyɛʔɛlɛ liì tapolo
lí nyɛ wa ma kpafoʔo ni ge.
Tipeʔe kɛ ìn bi ma ta adi fyeu!
16Ki wlɛʔɛ na,
lí bi baʔa yo
Jerusalɛmu ma we bì yo:
«Sinyo kaʔa, mò gáa fyaʔa.
Ma kyɛrɛ ti fanŋa kò ga gɔ.
17Bajegɔ Nyɛʔɛlɛ
la ma Nyɛʔɛlɛ lí nyɛ wa
ma kpafoʔo ni ge.
Ma Syɔfɔlɔ braʔa fɔlɔ wi.
Lí nyɛ lafiʔimi nì
mà po frɛmɛ ní ma kala na le.
Lí bi byeri ma glanʔama
mi kpangbanma kala na le.
Lí bi bo lafiʔimi nì
bì da ŋu ma kala na le.
18Hɛɛn bee pé nyɛ yɛpɛnʔɛ ní
mâ po pe ìn dà gban
bí kpoʔolomo ylɛmɛ mà hanri
ma hɛɛn fafaʔabaa
pé na hanri ge,
mí bi pe kpoʔolo
deʔe nigbe na.
Pé ma nyini wa mo ni.
Faʔarama kacleʔe
ki dá bo pé ma
tiluʔugu ceŋge.
Mí bi ba fɛrɛ laʔa de pe na.
19Ki nyiŋi na,
mí bi ba pè bɛfu cɔlɔ
bee pe dáa ye cɔlɔ ge.
Mí bi ceʔe nigbe nigbe fɛɛ
pwɔʔɔ be.
Hɛɛn bee pe dá brɔ ge
mí bi pe hanri pe hrù,
pe pan nɛ.
Fɛrɛ ti da dón na hɛɛn na be
wa kloʔo gee ni ge.
Mí biʔi hanri pee pe sonni,
pee pe kpɔʔɔ wa ki kloʔo ni ge.
20Ki nyiŋi na,
mí bi ba ye kpoʔolo
deʔe nigbe na,
bì ban ye nì wa yè goro ni de.
Nàʔa po mí ma wa yèé ni be
hɛɛn bee nuŋu
pe da jo yè yɛʔɛ na,
mí biʔi hanri yè kpɔʔɔmo ta
ceŋge ní sonmo nì,
wa tra heme hɛɛn
pè bɛfu kpafoʔo ni.»
Bajegɔ Nyɛʔɛlɛ à li yo ban.
Currently Selected:
SOFONI 3: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
