SAKARI 4

Anyaʔa kɔgunnu woʔo: Fiklan apaʔa ní Olife tiri ní

1Ki kruʔu ma, mlɛŋɛ ŋa wi dáa nyu ná ni wɔ̀ɔ pan mà bâ na nyɛ nɛ pa pe hin hɛn nyɛ pomo ma na ŋa wí na ŋolo ge. 2Wɔ̀ɔ kí yo ná kan mà yo: «Má na nyaʔa nyaʔa?»

À muu po: «Mí na tɛ fiklan nyaʔa hunmu lehaʔa nyɛ wí na mà na nori wa wi yugu deʔe na ge, ní fiklan wi kaclara dere tì bɛfu ní

3 Olife tiri syɛn nyɛ be ki fiklan tanla we. Nigbe nyɛ wi hunmu lehaʔa kaligi namyɛlɛ na, à nigbe ma po wa wi hunmu lehaʔa kamolo namyɛlɛ na le.»#4:3 ma wèle wa Tyɛ 11:4 ni wè.

4Mlɛŋɛ ŋa wi dáa nyu ná ni, à muu yugu nɛ mà yo: «Na fɔlɔ, ki yrɛbɛ ba pì bɛfu pi kɔrɔ wí nyɛ nyaʔa ní?»

5Mlɛŋɛ ŋa wi dá bo ná ni wɔ̀ɔ ná po: «Mɛ ìn ki kɔrɔ cɛn we yo?» À muu po: «Ayo, na fɔlɔ.»

Nofele konmo Sorobabɛli ma we

6Ki nyiŋi na, wɔ̀ɔ yo: «Bajegɔ Nyɛʔɛlɛ lí na na kayoʔo ga nyu Sorobabɛli ma we kiì ga ge mà yo: Bajegɔ Nyɛʔɛlɛ la Sye wì bɛfu fɔlɔ à li yo: ‹Fanŋa kala ban. Sye kpangbanŋa kala ban, di na Nyili liì maʔa hanri.#4:6 ma wèle wa Ɛsid 5:2 ni wè. 7Angogbɔʔɔ, má nyɛ nyaʔa Sorobabɛli wi yɛʔɛ na ge? Má bi jraʔa bi donli kɛɛrɛ. Pɔ̀ɔ baa ki ŋglɛnrɛ pa de taʔaraʔa kpangbanŋa ní bì yo: Nyaʔa akmaʔa gi ga ge, nyaʔa akmaʔa gi ga ge!› »

8Bajegɔ Nyɛʔɛlɛ li dá yo ná ni nɛ. 9À li yo: «Sorobabɛli wiì ma ki go ga ki noʔoma le wi kyɛrɛ nì. Wi kyɛrɛ tiì biʔi fan ki kɔ kpo. Nàʔa po ban, na hɛɛn pa peʔe cɛn bì yo: Bajegɔ Nyɛʔɛlɛ la Sye wì bɛfu fɔlɔ wiì ma ma tun pé ma. 10Hɛɛn bee pe hin na yraʔa ga tatugu ki hlimi wlɛʔɛ faʔara ge, ki woo pé bi ba bo lafiʔimi nì gunŋu ki sinmi maʔala kala na wa Sorobabɛli kyɛʔɛ ni ge. Ki fiklanyee nasyɛn pé nyɛ Bajegɔ Nyɛʔɛlɛ li nyɛʔɛ gɛ gee ké na tra dere tì bɛfu wele ge.»#4:10 ma wèle wa Tyɛ 5:6 ni wè.

11À muu yugu nɛ mà yo: «Ki olife tiri syɛn da tí nyɛ wa fiklan wi kaligi namyɛlɛ ní kamolo wolo ní le, ti kɔrɔ wí nyɛ nyaʔa ni?» 12À mi ní moo yugu nɛ fonŋo mà yo: «Ki olife tiri kaclara syɛn da tí nyɛ be fiklan wi namyɛʔɛlɛ syɛn na we, hunylɛmɛ mí na toro dere da na ge, ti kɔrɔ wí nyɛ nyaʔa ní?» 13Mlɛŋɛ wɔ̀ɔ ná po: «Mɛ ìn pi kɔrɔ cɛn we yo?» À mi yo: «Ayo, na fɔlɔ.» 14Ki nyiŋi na, wɔ̀ɔ na po. «Nabii syɛn bee Bajegɔ Nyɛʔɛlɛ li dá fara mâ hunmu wo pé na mâ po pé ma yere tra dere tì bɛfu na wa Bajegɔ Nyɛʔɛlɛ li yɛʔɛ ma ge, peè bɛ.»#4:14 ma wèle wa Tyɛ 11:4 ni wè.

Currently Selected:

SAKARI 4: NLK10

Highlight

Copy