SAKARI 14
14
Mladanʔaŋa nì, ní wò Fɔlɔ wi hrubanma ní
1Yè wèlé, Bajegɔ Nyɛʔɛlɛ
li wlɛʔɛ kí na nori.
Bee pé bi ba yè krɔʔɔ koli,
pé biʔi tiʔibi pe na wa
yè kpafoʔo ni.
2Mí bi kloʔo ke tɔɔ hɛɛn tyɛnʔɛ
kè bɛfu kpoʔolo
Jerusalɛmu kala na,
jango pe mlaʔa kponʔo ni.
Pé bi ba kaʔa co ge
bì ki lama yrɛbɛ pì bɛfu cɔʔɔ.
Pé bi baa cɛɛ ciʔili
bì da pe cɔʔɔ
Kaʔa lama hɛɛn pe konʔo
bì ba jo bì gɛri ŋklomo ni,
di pe tɔɔ bee
pé bi go wa kaʔa ni.
3Ki nyiŋi na, Bajegɔ Nyɛʔɛlɛ
pa li jɛ bì mlaʔa kmo
ki hɛɛn tyɛnʔɛ ní.
Nɛ pa li da glú na mlaʔa kmo
wlɛgblɛrɛ na pomo ma na ge.
4Ki wlɛʔɛ na,
Olife tiri angolo
la lí nyɛ wa Jerusalɛmu kaʔa
tanla wa yaajɛhaʔa namyɛlɛ na
wí bi ba wi ceʔe kan ge wa li na.
Olife tiri angolo
pa li wali syɛn bì sin
yaajɛhaʔa ní ki jehaʔa
namyɛʔɛlɛ ní ge.
Ki kpafoʔo paʔa gbɔʔɔ ceŋge.
Angolo li namyɛʔɛ nigbe
bi ba gɛri yaa prama
kaligi namyɛlɛ na.
Li tɔ pa li gɛri yaa prama
kamolo namyɛlɛ na le.
5Di yèé be,
yé bi ba fɛ bì gɛri wa
na angolo noʔo na
wa gbendeʔe dere na de,
mɛjɛn ki gbendeʔe dere
tí bi ba no wa
Asɛli kaʔa ma ge.
Yé bi ba fɛ nɛ pa ye da glú
mâ fɛ tra kpoʔoromo na
Juda kluʔu woo pe masanaŋa
Osyasi nyiŋi na
pomo ma na ge.
Bajegɔ Nyɛʔɛlɛ,
la na Nyɛʔɛlɛ lí bi ban
ki wlɛʔɛ kiì na.
Li mlɛŋɛyee pè bɛfu ní
bee pé na tunŋu ko
wí kan ge.
6Ki wlɛʔɛ na,
hɛɛn pe ìn bi baa jori
kpɛnmɛ na me.
Wyere ti ìn bi baa gun,
ní da nì tí na konʔolo na tun
nɛ pa ŋglɛnrɛ nyɛ de
tòo da gun kpo.
7Bajegɔ Nyɛʔɛlɛ liì nigbe
ma ki wlɛʔɛ cɛn ge.
Nyiŋi kì bɛfu
paʔa ba bo kpɛnmɛ.
Hɛn wóo gban bì da kpɛnmɛ nì,
ní yebliʔi kon pi na,
ali nàʔa ja bo yebliʔi gi,
kpɛnmɛ pa mi da bari.
8Ki wlɛʔɛ na,
nyujɛnmɛ bi baa fo
bì da nyini wa
Jerusalɛmu ni we.
Ki nyumu ma mí na fo mi konʔo
bì ba wali bì da sye wa
yaa jehaʔa namyɛlɛ nyugbɔmo ma me.
Kí bi hanri kanʔa na,
ní nyoro nyiŋi ni ge #14:8 ma wèle wa Esek 47:1; Jan 7:38; Tyɛ 22:1 ni wè.
9Bajegɔ Nyɛʔɛlɛ lí bi ba bo
tra hɛɛn pè bɛfu pe masanaŋa.
Ki wlɛʔɛ na,
Bajegɔ Nyɛʔɛlɛ liì nigbe
bi ba bo Nyɛʔɛlɛ.
Pé bi baa liì nigbe yele yeri.
10Klɛnmɛ mì bɛfu ma
mí ma Jerusalɛmu kɛli
mí bi ba grɛʔɛ
gbendeʔe deʔe
bì gbe Geba na wa yaa prama
kamolo namyɛlɛ na
bì ya no wa fɔ Hrimoni na
wa yaa prama kaligi
namyɛlɛ na le.
Jerusalɛmu kaʔa kí bi ba glɛn
kara tì bɛfu yugu na
da tí maʔa kɛli ge.
Bì gbe wa
Bɛnjamɛ kaʔa goyɛʔɛ na
fɔ bì ya no
kololo goyɛkplɛʔɛ na,
bì gbe Ananeyɛli
gotiklonʔo na
fɔ bì ya no masanaŋa
wi hrɛsɛn nyumu yuʔuhara na de.
11Hɛɛn pé bi ba glɛn wa.
Danŋama ìn bi bo wa adi.
Ee, Jerusalɛmu
wí bi ba bo frɛmɛ na.#14:11 ma wèle wa Tyɛ 22:3 ni wè.
12Hɛɛn tyɛnʔɛ gee
ké na mlaʔa kmo
Jerusalɛmu nì we,
Bajegɔ Nyɛʔɛlɛ lí bi ba
cɔlɔʔɔ ga wa pé na kiì ga ge.
Nà pe jɛ bì yere nyiŋi ga na,
pe kara, pa pe fonʔo bì wo.
Pe nyɛʔɛ pa ke fonʔo.
Pe no nɛŋɛɛ ke fonʔo wa
pe noro ni de kpo.
13Ki wlɛʔɛ na,
Bajegɔ Nyɛʔɛlɛ lí bi ba
cɔlɔkpɔʔɔ wa pé na wa.
Pé bi baa pe kyɛrɛ jrɛʔɛ de
pè krugu bì da gon.
14Juda wiì tapolo wí bi ba jɛ
bì Jerusalɛmu haʔa
mlaʔa na ge.
Pé bi ba krɔʔɔ kì bɛfu syɔ
bee ma pe klɛ́n pè tanla ge,
tɛ nì, wɛrifiʔi nì,
ní kpasyofafaʔara nì.
15Cɔlɔkpɔʔɔ bi ba do
mlagmoo klɛnmɛ na,
syongidayee ní,
ní syongidayee pèè tyɛnlɛ ní,
nyoʔomɛyee ní, sofɛnŋɛɛ ní,
ní ajobo tyɛnʔɛ kè bɛfu ní,
nɛ pa kí ma hɛɛn ta be
pomo ma na ge.
16Kloʔo ke tɔɔ hɛɛn bee
pe dá goro mâ pan
bì ba mlaʔa kmo
Jerusalɛmu nì we,
pè bɛfu nigbe nigbe
pé bi ba jɛ bì gɛri
bì yaa kɔgunru kanni
wa Bajegɔ Nyɛʔɛlɛ la
Sye wì bɛfu fɔlɔ masanaŋa
kpangbanŋa wi yɛʔɛ ma ge,
bì yaa wi kpɔʔɔ yɛʔɛ kè bɛfu na
bì da kajoʔolo fɛti hanri we.#14:16 ma wèle wa Sraʔa 23:39-43 ni wè.
17Nàʔa tra na,
heme ma mí biʔi ce,
nà mi ìn gɛri Jerusalɛmu ni,
bì da sye wì bɛfu fɔlɔ,
Bajegɔ Nyɛʔɛlɛ la masanaŋa
kpangbanŋa kpɔʔɔ we,
ki woo pòo hɔgɔ ta.
18Ejipite klo heme ma
mi ìn biʔi ta bì gɛri wa ge,
mòo hɔgɔ ta kpo.
Hɛɛn tyɛnʔɛ gee
ke ìn bi gɛri wa bì ya kajoʔolo
fɛti hanri Jerusalɛmu ni we,
Bajegɔ Nyɛʔɛlɛ lí bi cɔlɔʔɔ
ga wa pé na,
lí bi kiì tege wa
Ejipite klo na le.
19Ejipite klo woo ní,
ní hɛɛn tyɛnʔɛ gee ní
ke ìn daʔa ta bì gɛri wa
kajoʔolo hanrihaʔa na,
pe sraʔa kiì gi.
20Ki wlɛʔɛ na,
pé bi baʔa nyoŋo wa wlere na
da pe pwɔ wa syongidayee
atiri na bì yo:
Pé ma fara mà yaʔa
Bajegɔ Nyɛʔɛlɛ kan
mà po ylɛɛlɛ.
Ali cɔhɔʔɔgɔɔ gee ké nyɛ wa
Bajegɔ Nyɛʔɛlɛ li sraʔa go ni
ké nyɛ aylɛbɛ bi,
nɛ pa tasaa bee nyɛ pé nyɛ wa
tyɛʔɛhaʔa sraʔa farahaʔa
yɛʔɛ ma ge.
21Jerusalɛmu kaʔa lama
cɔhɔʔɔgɔɔ ní Juda klo lama
cɔhɔʔɔgɔɔ kè bɛfu,
pé bi ke yaʔa ke klɛn
Bajegɔ Nyɛʔɛlɛ la
Sye wì bɛfu fɔlɔ kan
bì bo aylɛbɛ.
Hɛɛn pè bɛfu bee
pé bi ba sraʔayee fara,
ki woo pè bɛfu pa pe gban
bì pe sraʔayee kara
hɔʔɔ de wa ke ni.
Ki wlɛʔɛ na,
pe ìn bi ba yawafɛɛ wà nya wa
Sye wì bɛfu fɔlɔ
Bajegɔ Nyɛʔɛlɛ
li sraʔa go lama ni me.
Currently Selected:
SAKARI 14: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
