MALASYI 1

1Bajegɔ Nyɛʔɛlɛ li dá kayoro da yo Malasyi ma wi ti yo Israyɛli kluʔu woo ma be tiì da de.

Bajegɔ Nyɛʔɛlɛ lí ma Israyɛli wiì fara

2Bajegɔ Nyɛʔɛlɛ à li yo: «Yé na na glanʔa.» Yèé à ye yo: «Wó na ma glanʔa pomo mimii na?» Bajegɔ Nyɛʔɛlɛ à li yo: «Esawu woò nyɛ Jakɔbe wi lɛ yo? Di kiì nì kì bɛfu ní, Jakɔbe à wiì mà na glan,#1:2-5 ma wèle wa Hrɔm 9:13; Esa 34:5-17; 63:1-6; Jer 49:7-22; Esek 25:12-14; 35:1-15; Amo 1:11-12; Abi 1-14 ni wè. 3à mi Esawu wa we. Mi dá wi angoro dere krɛʔɛ de waʔafe dere mà wi klo kan nya poon ma.» 4Edɔmu woo nà pe da nyu bì yo: «Wo cɔʔɔ́, di wò dere da ti cɔʔɔ wó bi nì bì ti fan fonro nɛ.» Ki nyiŋi na, Bajegɔ Nyɛʔɛlɛ la Sye wì bɛfu fɔlɔ à liʔi yo mà yo: «Pé bi dere fan de, di pa mi ti jaʔabu nɛ. Hɛɛn pé bi baa ki nyu bì yo Bajegɔ Nyɛʔɛlɛ lí ma lama gban su hɛɛn bee ní pe tipere kala na, pé bee.» 5Yèé yè tapoboo yé bi baʔa nya yè nyɛʔɛ ní ge, pa yeʔe yo bì yo: «Bajegɔ Nyɛʔɛlɛ lí ma kpɔʔɔ. Li klɛ́n Israyɛli kluʔu woo pe klo na fɔ mà toro li kanŋaa na ge.»

Srɛʔɛ pomo ma moò nyɛ ylama me

6Sye wì bɛfu fɔlɔ Bajegɔ Nyɛʔɛlɛ à li yo: «Najɛpii wi hin na wi to kpɔʔɔ we. Ŋklo fanna wi naa wi fɔlɔ kpɔʔɔ we. Di domi wò nyɛ yè to mà nì mà po yè fɔlɔ yo? Nyaʔa ma kan yoò na na kɔrɔsi bì da na kpɔʔɔ ge? À ye na na faʔara mà naʔa yugu mà yo: ‹Wó na ma faʔara pomo mimii na?› 7Yé naʔa hanri ga nì yé na akakranma fara sraʔa wa na sraʔa farahaʔa na ge. ‹À ye naʔa nyu mà yo yé ma na yele kran le mɛlɛ?› Yé naʔa hanri nyiŋi ga na yé naʔa nyu mâ yo Bajegɔ Nyɛʔɛlɛ li sraʔa farahaʔa koò na cun nɛ pa akpɔʔɔ nyɛ ge. 8Nà ye da ban yè ajobo ba nì pí ma fyon bì baa pi fara sraʔa, kapeʔe ban yo? Nà ye da ban ajobo ba nì pi ceʔe ké nyɛ cɔʔɔgɔɔ, ná kiì ban, ajobo ba pí nyɛ yaba bì baa pi fara sraʔa ge, kapekpɔʔɔ ban yo? Bajegɔ Nyɛʔɛlɛ la Sye wì bɛfu fɔlɔ wɔ̀ɔ yo: Ma ya ma klo kundiʔi kpɔʔɔ pi ni, paʔa wi glan yo? Pa ma dɔɔ glanʔa yo?»#1:8 ma wèle wa Lado 15:21 ni wè. 9Bajegɔ Nyɛʔɛlɛ la Sye wì bɛfu fɔlɔ à li yo: «Ki tɔ na ge, yeʔe po yeʔe wèlé, ye na nyɛ̀rí bì nyugara ta ye na. Nà ye ki nyoʔo hanri yè kyɛrɛ ní de, pa miʔi ta mɛlɛ bí nyugara ta ye na ge.» 10Bajegɔ Nyɛʔɛlɛ la Sye wì bɛfu fɔlɔ à li yo: «Kí nyɛ pronʔo, á ye Nyɛʔɛlɛ li sraʔa go ton, jango yò gáa kwɔʔɔ mu ge wa waʔafe na na sraʔa farahaʔa na ge. Yè kala loò na na glanʔa. Mi ìn biʔi ta bì yè kyɛʔɛ sraʔa wà syɔ.»

11Bajegɔ Nyɛʔɛlɛ la Sye wì bɛfu fɔlɔ à li yo nɛ: «Bì jɛ yaajɛhaʔa na bì gɛri yaajehaʔa namyɛlɛ na, na yele lí ma kpɔʔɔ wa kloʔo ke tɔɔ hɛɛn kpafoʔo ni ge. Pé na nudanʔa yraʔa hori wa dere tì bɛfu na na yele li kpɔʔɔmo kala na le. Pe sraʔayee bee pé na fara pé nyɛ ylɛɛlɛ, mɛjɛn na yele lí nyɛ kpangbanla wa kloʔo ke tɔɔ hɛɛn pe kpafoʔo ni ge.

12Di yèé be, yé na na yele kran le mà naʔa nyu mà yo: Bajegɔ Nyɛʔɛlɛ li sraʔa farahaʔa kí nyɛ kranʔa. Yrɛbɛ ba pí nyɛ waʔa na ge, poò nyɛ yrafyɛn fɔ mà ga laʔa kranma yrɛbɛ na.» 13Bajegɔ Nyɛʔɛlɛ la Sye wì bɛfu fɔlɔ à li yo: «Yé naʔa nyu kpo mà yo: ‹Ki tunŋu ga kí nyɛ teʔe kpangbanŋa gi.› Wo ìn joriʔi na. Yé na pan yrɛbɛ ba nì yé ma yu ge, ní ajobo ba nì pi ceʔe ke cɔʔɔ ní ba nì pí nyɛ yaba be. Yè sraʔa wiì wi ŋa we. Pa miʔi ta bì yè kyɛʔɛ sraʔa syɔ we mɛlɛ?

14Hɛn ŋa wí bi nofele kon Bajegɔ Nyɛʔɛlɛ ma bì ba li fwɔʔɔ ton ajoʔo ga nì kí nyɛ yaŋa ge, kí po ajokmama nyɛ wa wi ma wi ajobo daʔa ni ge. Ki klomo kala hanrifɔlɔ pɔɔ danŋama ta, mɛjɛn Bajegɔ Nyɛʔɛlɛ la Sye wì bɛfu fɔlɔ à li yo: Mí nyɛ masanaŋa kpangbanŋa wi ná ni. Na yele liì la le wa kloʔo ke tɔɔ hɛɛn kpafoʔo ni ge: Fyara akpɔʔɔ.»

Currently Selected:

MALASYI 1: NLK10

Highlight

Copy