SAKARI 13
13
1Ki wlɛʔɛ na, nyumu wyele là bi ba nyɛʔɛ Dafide go woo ní Jerusalɛmu kaʔa woo kan be, jango pe kapere nì, ní pe kranma kaʔa ní ke yɛli.
Nyɛʔɛlɛ lí bi ba asunmu laʔa be wa ní ní Nyɛʔɛlɛ leyoo akpoflɛɛn ní be
2Bajegɔ Nyɛʔɛlɛ la Sye wì bɛfu fɔlɔ à liʔi yo nɛ mà yo: «Ki wlɛʔɛ na, mí bi ba klo lama asunmu pì bɛfu yegee kɔ ge jango pò gáa honri pí na adi. Nyɛʔɛlɛ leyoo bee akpoflɛɛn be, mí bi ba pee ní kranma plɛn bì pe prɔ naʔa klo ni le. 3Na hɛn wà bi Nyɛʔɛlɛ leyoo tunŋu hli ge, wi toheʔe ní wi noheʔe ní pa peʔe yo wí kan bì yo kí ìn yala wiì li adi, mɛjɛn wí na flɛn Bajegɔ Nyɛʔɛlɛ li yele na le. Nòo yo anyaʔa kà kayoʔo na wlɛʔɛ ga na wi to nì, wi no nì, pa poo sun buu fru buu kpo ki wlɛdege na ge. 4Ki wlɛʔɛ na, Nyɛʔɛlɛ leyoo pè bɛfu pa pe fɛrɛ kpe pe anyaʔama kala na le. Nà pe yo pé bi da anyaʔa kà kayoro nyu nyiŋi ga na, poo mbajoʔo dreʔe le bìi hɛɛn fanla da pe punŋu adi. 5Pè bɛfu pa pe daʔa nyu bì yo: ‹Mì wò nyɛ Nyɛʔɛlɛ leyoo. Mí nyɛ caflaa. Na kafɔlɔ wi da ná syɔ mà kpe na piimi nyiŋi na.› 6Nà hɛn wà buu yugu bì yo: ‹Nyaʔa ma ma kyɛrɛ mlugu banmɛ ge?› Pɔɔ krumahru kan bì yo: ‹Mí ma ki klara namoro ta wa na nagroboo kasyɛnrɛ ma.› »
Bajegɔ Nyɛʔɛlɛ liì li Nyɛʔɛlɛ le
7Bajegɔ Nyɛʔɛlɛ la Sye wì bɛfu fɔlɔ à li yo:
«Mlaʔa kpele ma jɛ
na mbara naʔafɔlɔ krugu
ŋa mí ma krɛʔɛ
na syɛn woo we.
Ma mbara naʔafɔlɔ kpo we,
jango mbara ti craʔa.
Mí bi na kyɛʔɛ nyini mbara
da krugu tí nyɛ
fanŋa fun ge.»#13:7 ma wèle wa Mat 26:31; Mar 14:27 ni wè.
8Bajegɔ Nyɛʔɛlɛ à li yo: «Wlɛʔɛ kà na, klo li konʔo nigbe bi ba gu bì gɔ, pa li konʔo nigbe bi goro.
9Mí bi li konʔo tanri woʔo wa kwɔʔɔ ni. Mí biʔi po bìʔi wele nɛ pa pe hin na wɛrifiʔi pin naʔa wele pomo ma na ge, biʔi po biʔi wele nɛ pa pe hin na tɛ pin noo wele pomo ma na ge. Klo pii pé bi ba na yele yeri le, pa mi da syo pé ma. Mí bi baʔa yo bì yo: Ki woo bee be pé nyɛ na hɛɛn. Pee fanna pa peʔe yo bì yo: Bajegɔ Nyɛʔɛlɛ lí nyɛ wò Nyɛʔɛlɛ.»
Currently Selected:
SAKARI 13: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
