HRƆMU 9
9
Nyɛʔɛlɛ ní hɛɛn bee ní lí ma fara ge
1Pa mí nyɛ Krisi wi woo ge, ho na flɛnʔɛ. Na honriʔi ga Nyɛʔɛlɛ li Nyìli lí na sinni ge kí naʔa nyu ná kan mâ yo kanyɛmɛ mi mí na nyu ge. 2Ki kanyɛmɛ mí ma: Kayagbɔʔɔ nyɛ wa na dihon na we na na ya su na hɛɛn pe kala na le. 3Nàʔa po ki dí bì gban bì pe haʔa ge, mi dí bìʔi ta Nyɛʔɛlɛ li na dànŋá, li na làʔá Krisi na we na woo kala na le, bee pé nyɛ na klo woo be.
4Pé nyɛ Israyɛli kluʔu woo pee bɛ. Nyɛʔɛlɛ li da pé krɛʔɛ li pii mà li kpangbanma tyɛʔɛ me pe na ní kaʔala gee ní li da gón ge. À li li furu kayoro kan de pe ma ní li kpɔʔɔmo tunŋu ní, ní li nofegee ní ge.#9:4 ma wèle wa Nyi 4:22 ni wè.
5Tokpɔɔ nyɛ pé ma. Krisi wí ma jɛ wa pee ni wre namyɛlɛ na le. Wiì wi ŋa wí nyɛ yrɛbɛ pì bɛfu yugu na ge mâ po Nyɛʔɛlɛ ge. Wo dɔɔ sonni nyiŋi kì bɛfu na. Ki po ban.
6Ki woʔo ga koò naʔa nyu bì yo Nyɛʔɛlɛ li nofele lí ma ja. Mɛjɛn Israyɛli kluʔu woo pè bɛfu wò nyɛ Israyɛli hɛɛn kanyɛmɛ na. 7Bee pé nyɛ Abrahamu kluʔu pii pè bɛfu poò nyɛ wi pitaala. Mɛjɛn Nyɛʔɛlɛ li daʔá yo wí ma mà yo: Isake pii pee nigbe bi ba bo ma kluʔu pii.#9:7 ma wèle wa Hli 21:12 ni wè.
8Ki na po pé yo pii pè bɛfu bee Abrahamu wi dá he ge pee ban pé nyɛ Nyɛʔɛlɛ li pii be fɔ pii bee pé ma he mâ yala Nyɛʔɛlɛ li nofele ní le. Pee bɛ pé na cun kluʔu picɛnmɛɛ be. 9Li nofele kayoro tí da: Ki nyiŋi nàʔa gá ba no ge, pa mi ban nɛ, Sara pɔɔ ba nabiple he.#9:9 ma wèle wa Hli 18:10 ni wè.
10Kiì nigbe ban, di Hrebɛka wi pii syɛn pe to wi dá bo nigbe, ŋa wí nyɛ wò tokpɔ Isake we. 11-12Nyɛʔɛlɛ à liʔi yo Hrebɛka ma we mà yo: Lagwɔ wí bi ba grɛʔɛ wi conlo wi ŋklo, ki ní wi ìn je pé he kpɛn ki nyiŋi na ge. Pe ìn dà bo pé ma kacɛnlɛ li ná kiì ban kaklolo là hanri. Ki dá hanri ban, jango Nyɛʔɛlɛ li da glú mâ ga kon mâ yaʔa mâ wà fara nigbe pomo ma na ge, li nadanma mi kò be ki pomo miì na. Kò gá bo kahranʔa kala, di ki po ŋa wí na yeri ge wiì kala.#9:12 ma wèle wa Hli 25:23 ni wè.
13Nyɛʔɛlɛ li sɛbɛ wí naʔa nyu ban mà yo: Mí ma Jakɔbe fara we mà Esawu yaʔa we.#9:13 ma wèle wa Mal 1:2-3 ni wè.
14Wó bi nyaʔa yo san? Pa wo gban bì yo Nyɛʔɛlɛ loò nyɛ sinli yo? Ayo dɛ. 15Mɛjɛn li daʔá yo Mowisi ma we mà yo:
Nà mi cori bì kmaʔa hanri
hɛn ŋa kan ge,
pa miʔi hanri wí kan.
Nà mi cori bì nyugara ta
hɛn ŋa na ge,
pa mi ti ta wí na. # 9:15 ma wèle wa Nyi 33:19 ni wè.
16Ki woʔo ga koò na jrɛʔɛ ga ma hɛn wí ma cori ge, ná kiì ban ga ma wí na hanri ge. Di kí na jrɛʔɛ Nyɛʔɛlɛ liì ma, la lí na kmaʔa hanri ge. 17Wa Nyɛʔɛlɛ li sɛbɛ ni we lí maʔa yo Ejipite klo fɔlɔ ma we mà yo:
Mí ma ma tɛnŋɛ klo na le jango,
ma kala na le,
bì na fanŋa tyɛʔɛ ge hɛɛn na be,
na yele li gbàn li nyini
drunya wì bɛfu ni. # 9:17 ma wèle wa Nyi 9:16 ni wè.
18Ki kala na, Nyɛʔɛlɛ nà li cori lí bi nyugara ta hɛn ŋa na ge, li na tí ta wí na. Nà li cori lí bi hɛn ŋa dihon syeʔele ge, li noó syeʔele.
Nyɛʔɛlɛ li lagbanma ní li nyugara nì
19Kana, wà bi na yugu bì yo: «Nàʔa po ban, nyaʔa ma po wa á li na na hanʔa adi ge? Mɛjɛn han bi gban bì je ga ma lí ma cori ge?» 20E, mo hɛnwyee we, han wi má ni má da kakara wa Nyɛʔɛlɛ ní le? Cɔlɔ pa li gban bì da li fanfɔlɔ yugu we bì yo: Nyaʔa ma kan á ma ná fan banmɛ ge?#9:20 ma wèle wa Esa 29:16; 45:9 ni wè.
21Coʔo ki fanfɔlɔ pɔɔ gban bì coʔo kà kpe bì pɛgbanra cɔlɔ fan bì nì bì ki cotege kà kpe bì la fan loò nyɛ pɛgbanra wolo ge.
22Kiì tege gi Nyɛʔɛlɛ ní le. Pa li dá jori bì li nafunŋu tyɛʔɛ ge hɛɛn na be pe li fanŋa cɛn ge kpo, bee pé na li bɛnʔɛ mâ po pe kondó mâ yaʔa cɔʔɔmo kan me, à li pé co lagunmu ní ceŋge.
23Li dá jori bìʔi tyɛʔɛ pé na peʔe cɛn pomo ma na li kpangbanma mí ma kpɔʔɔ wòó bee ma lí ma nyugara ta wo na mâ wo kondo mâ yaʔa wó li kpangbanma ta me. 24Mɛjɛn wòó bɛ lí ma yeri ge Juwifiyee pee nigbe ban, di klòʔo ke tɔɔ hɛɛn pé nyɛ waʔa nî kpo. 25Nyɛʔɛlɛ li daʔá yo wa ban kpo Ose sɛbɛ ni we mà yo:
Bee pe ìn dà bo na hɛɛn ge,
mí bi baa pe yeri na hɛɛn.
Klo la li ìn dà bo na na glanʔa ge,
mí bi baa li yeri na tanma fɔlɔ. # 9:25 ma wèle wa Ose 2:25 ni wè.
26 Ali deʔe ga na li daʔá yo
pé ma mâ yo:
Yoò nyɛ na hɛɛn ge,
Nyɛʔɛlɛ wyele lí bi baa pe yeri
li pii wa ki deʔe na ge. # 9:26 ma wèle wa Ose 2:1 ni wè.
27Esayi fanna wi dáa wi àkpolo wa le Israyɛli pii pe kala na le mà yo:
Ali nàʔa ja bo Israyɛli pii
pe dá nyɛʔɛ nɛ pa
kɔ nyugbɔmo kanla tanyrɛʔɛ nyɛ ge,
à pe cɛnri bí ba syɔ kpo. # 9:27-28 ma wèle wa Esa 10:22-23 ni wè.
28 Mɛjɛn wò fɔlɔ wí bi ba
wi kiti kon ticaʔaga hɛɛn na be
naʔa tra na de.
29Kí nyɛ nɛ pa ga nyɛ Esayi wi da glú mâ yo fan ge mâ yo:
Nàʔa po wò fɔlɔ ŋa wí nyɛ
fanŋa kì bɛfu fɔlɔ we,
wi ìn dà kluʔu
pii pèè yaʔa wo kan ge,
wo dí bì bo nɛ pa Sodɔmu kàʔà
nyɛ ge bì Gɔmore woʔo lɛ́ ge. # 9:29 ma wèle wa Esa 1:9 ni wè.
Kayotanʔa ki klɛ́n mà Israyɛli woo kan be kpo
30Wó bi nyaʔa yo san? Mɛjɛn klòʔo ke tɔɔ hɛɛn bee pe ìn dàá sinmi ca Nyɛʔɛlɛ ma le, lí na pe cun hɛnsinbee, pa pe gâ ba lí na ge. 31Àʔa hín bo bee pé nyɛ Israyɛli woo náʔa ca pé po sinbee Nyɛʔɛlɛ li yɛʔɛ̀ na furu kayoro ti fanŋa ni ge, pe ìn dà gban bì ti funŋu.
32Nyaʔa kala na? Mɛjɛn pe ìn dàá ki ca bì da Nyɛʔɛlɛ glanʔa le pama fanŋa ni. Di pe dáa ki honri bìʔi hanri pe kahranʔa kee ni. À pe krugu ŋglɛnʔɛ ga na kí na hɛɛn fanna be. 33Nyɛʔɛlɛ lí naʔa nyu ban wa li kayoro ni de mà yo:
Yè wèlé,
mí ma ŋglɛnʔɛ tyɛʔɛ wa
Sinyo kàʔà ni ge,
ŋglɛngbɔʔɔ ga hɛɛn pé na
krugu ná tun ge.
Hɛn ŋa wí ma pa wí na ge,
fɛrɛ wó je don wí na fyeu. # 9:33 ma wèle wa Esa 28:16 ni wè.
Currently Selected:
HRƆMU 9: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
