HRƆMU 10
10
1Na woolo, ga mí na ca na dihon wì bɛfu ní náʔa nyɛri Nyɛʔɛlɛ ma le Juwifiyee pe kala na le kí ga: Jango pe syɔ. 2Mɛjɛn pa mi gban bìʔi yo pe namyɛʔɛ na ge bì yo pé na Nyɛʔɛlɛ ca le ceŋge, di kí ma yala pé da li ca pomo ma na ge, pe ìn ki cɛn. 3Nyɛʔɛlɛ lí na hɛɛn cun be sinbee pomo ma na ge, pe ìn ki cɛn. À pe na pè kpanŋi bì grɛʔɛ hɛnsinbee mà kan pe ìn ki ta bì pè kân ga ma kí bi gân Nyɛʔɛlɛ líi pe cùn hɛnsinbee ge. 4Mɛjɛn Krisi wí ma furu kayoro kɔ de, jango bee pé na pa wí na ge Nyɛʔɛlɛ li da pe cùn hɛnsinbee.
Syɔmo mí nyɛ hɛn wì bɛfu womo
5 Mowisi wi daʔa nyoŋó mà yo: Hɛn ŋa wí na furu sinmi kala hanri le, pɔɔ nyuwyeʔe ta ki sinmi miì fanŋa ni.#10:5 ma wèle wa Sraʔa 18:5 ni wè.
6Di Nyɛʔɛlɛ li kayoro tí naʔa nyu hɛɛn bee kan pé ma pa lí na ge, á li na pe cun sinbee ge mà yo: Mò gáa mà yugu bì yo: Han bi gɛri wa namuru ni de?Ki na po pé yo jango bì yà Krisi trigi we.#10:6-8 ma wèle wa Lado 30:12-14 ni wè. 7Mò gáa mà yugu nɛ bì yo: Han bi drigi wa kuu kaʔa ni ge? Ki na po pé yo jango bì yà Krisi nyɛ we bùu yrígi kuu ni be. 8Di ga kí ma yo wo kan ge kí ga: Kayoʔo kí nyɛ mà tanla, wa ma nò nî, ní ma dihon nì we. Ki kayoʔo kí nyɛ pama woʔo ga wó na jari ge.
9Nà maʔa yo ma nò ní ge hɛɛn pe yɛʔɛ̀ na bì yo Jesu wí nyɛ ma fɔlɔ bì nì bì baʔa na wa ma dihon ni we bì yo Nyɛʔɛlɛ li dɔɔ nyɛ́ mòo yrígi kuu ni be, pa ma syɔ. 10Mɛjɛn hɛn wi în baʔa na wa wi dihon na we, Nyɛʔɛlɛ li noó cò sinŋi. Hɛn wi naʔá yo wi nò ní hɛɛn pe yɛʔɛ̀ na ge, li noó syɔ. 11Nyɛʔɛlɛ li kayoro tí naʔa nyu mà yo: Hɛn wì bɛfu ŋa wi pá wí na ge, fɛrɛ ìn bi gà don ki woo na we.#10:11 ma wèle wa Esa 28:16 ni wè.
12Ki pomo na, kanla wò nyɛ wa Juwifiyee ní klòʔo ke tɔɔ hɛɛn pe kpafoʔo ni ge. Mɛjɛn pe fɔlɔ wí nyɛ nigbe mà po hɛɛn pè bɛfu pe yugu na ge. Wiì wi wí na kmaʔa hanri pè bɛfu na, bee pé na wi yele yeri le. 13Nyɛʔɛlɛ li kayoro tí naʔa nyu mà yo: Hɛn wì bɛfu ŋa wí na wò fɔlɔ wi yele yeri le, pɔɔ syɔ.#10:13 ma wèle wa Jow 3:5 ni wè.
14Di paʔa bo mɛlɛ pé da wi yele yeri le, kí po pe ìn ba wí na ge? Hɛɛn pa peʔe po mɛlɛ bi bá wí na nà ki ìn bo pé ma wi kayoʔo loʔo ge?Pé biʔi po mɛlɛ bí wi kayoʔo loʔo ge nà ki ìn bo hɛn wà naʔa jari pé kan ge? 15Nà ki ìn bo pé ma kayoro jarifɛɛ troʔo be wa, pa peʔe po mɛlɛ bí da ti nyu hɛɛn ma be? Nyɛʔɛlɛ li kayoro tí naʔa nyu ban mà yo: Kí nyɛ tanʔa bí hɛɛn bee nya pé na pan kayotanʔa nì ge.#10:15 ma wèle wa Esa 52:7 ni wè.
16Di hɛɛn pè bɛfu ban pé ma pa kayotanʔa na ge. Esayi wɔ̀ɔ yo: Wò fɔlɔ, han ma pa wò kayoʔo na ge?#10:16 ma wèle wa Esa 53:1 ni wè.
17Ki pomo na me hɛɛn pé na pa kayoʔo ga na pé ma loʔo ge. Pé maʔa loʔo hɛn ŋa ma wí na Krisi wi kayoro nyu pe kân ge.
18Di mí na ye yugu, pe ìn dà ki kayoʔo loʔo ge kiì gi yo? Ayo, kiì ban. Pe daʔa loʔó, nɛ pa Nyɛʔɛlɛ li kayoro tí naʔa nyu ge mâ yo:
Leyoo pe dá pe àkpoʔo wa,
à ke no tra dere tì bɛfu na.
Pe kayoro à ti no drunya
kanŋaa kè bɛfu na. # 10:18 ma wèle wa Ŋuʔu 19:5 ni wè.
19Mí na ye yugu nɛ, Israyɛli woo pe ìn daʔa cɛn kiì gi yo? Ayo, kiì ban. Ki kplɛʔɛ na, Nyɛʔɛlɛ li daʔá yo wa Mowisi wi sɛbɛ ni we mà yo:
Bee yoò na pe cun hɛɛn ge,
mí bi pe yejaʔa lege ye ni.
Mí bi ki ticlimi fun fɛɛ
pee kpe bí kayaga le ge ye ni ge. # 10:19 ma wèle wa Lado 32:21 ni wè.
20Esayi wi dá dihon ta mà yo:
Hɛɛn bee pe ìn dà bo na
mì Nyɛʔɛlɛ ca le
ki woo pé ma na nya.
Mí ma nà tyɛʔɛ bee na
pe ìn dà bo na na yugu ge. # 10:20 ma wèle wa Esa 65:1 ni wè.
21Di wɔ̀ɔ kí yo Israyɛli woo pe kala na le mà yo:
Mì Nyɛʔɛlɛ,
mí ma na kyɛʔɛ yrigi ge
lecee ma be fɔ
mà bâ no yaakwɔʔɔ na,
bee pé nyɛ kakara fɛɛ be. # 10:21 ma wèle wa Esa 65:2 ni wè.
Currently Selected:
HRƆMU 10: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire
