YouVersion Logo
Search Icon

HRƆMU 8

8
Bì bo nyuwyeʔe na Nyɛʔɛlɛ li Nyìli fanŋa ni
1Di ŋaŋa ni ge bee pé ma po teme na Jesu Krisi nì we pe woʔo wò wa kiti ni we.
2Mɛjɛn Nyɛʔɛlɛ li Nyìli la lí na nyuwyeʔe kanʔa hɛɛn bee ma pé ma po teme na Jesu Krisi nì we, ki fanŋa kí ma na syɔ fanŋa ga ma kí na hɛɛn kanʔa á pe na kapere hanri ná kun ge. 3Mɛjɛn Nyɛʔɛlɛ lí ma ga hanri furu kayoro ti ìn dà gban bì hanri wre pomo fanŋa funmu kala na le. Lí ma li kiti hanri, wɔ̀ɔ to kapere da na ti în na tunŋu ko wa wre ni de. À li li Pitaʔa troʔo ge naʔa. Wɔ̀ɔ pan wre da nì tí ma kapere woro lɛ́ de mà bâ wì fara sraʔá hɛɛn pe kapere kala na le.
4Nyɛʔɛlɛ lí maʔa hanri ban, jango sinmi ma furu kayoro tí na ca ge mi fùnŋù wòó bee na woò na tanri bì yala wre pomo ní, fɔ mà laʔa Nyɛʔɛlɛ li Nyìli ní le. 5Mɛjɛn bee pé na tanri ná yala wre klɛnmɛ ní me, ki woo pé naʔa ca bì da mi nadanma miì hanri. Di bee pé na tanri ná yala Nyɛʔɛlɛ li Nyìli ní le ki woo pé naʔa ca bì da li nadanma miì hanri. 6Bì da ga hanri wre klɛnmɛ mí na ca ge ki tanʔahaʔa kí nyɛ kùʔù nì. Di bì da ga hanri Nyɛʔɛlɛ li Nyìli lí na ca ge ki tanʔahaʔa kí nyɛ nyuwyeʔe ní, ní nyimi ní. 7Bee pé na ga hanri wre tí na ca ge pé nyɛ Nyɛʔɛlɛ li bɛnfɛɛ. Mɛjɛn poò na li furu kayoro kpɔʔɔ de. Ali pòo ja gban bìʔi hanri. 8Bee pé na tanri ná yala wre klɛnmɛ ní me, pòo gban bì Nyɛʔɛlɛ glan le.
9Di pa Nyɛʔɛlɛ li Nyɛʔɛlɛ li Nyìli lí na kori wa ye ni ge, yèé yoò na tanri bì yala wre klɛnmɛ ní me. Yé na tanri na yala Nyɛʔɛlɛ li Nyìli ní le. Krisi wi Nyìli loò nyɛ hɛn ŋa ma ge ki woo woò nyɛ Krisi wi woo. 10Nàʔa po Krisi wí na kori wa ye ni, ali nàʔa ja bo yè wre tí na kun kapere kala na le, Nyɛʔɛlɛ li Nyìli pa li gan ye nyuwyeʔe ta ge, mɛjɛn Nyɛʔɛlɛ lí na ye cun hɛnsinbee li yɛʔɛ̀ na ge. 11Nàʔa po Nyɛʔɛlɛ li Nyɛʔɛlɛ li Nyìli la li dá Jesu nyɛ móò yrígi kuu ni be lí na kori wa ye ni ge, Nyɛʔɛdele la li dá Krisi nyɛ móò yrígi kuu ni be lí bi ba nyuwyeʔe kân yè wre da ma tí na kun ge, li Nyɛʔɛlɛ li Nyìli fanŋa ni, la lí na kori wa ye ni ge.#8:11 ma wèle wa 1Kor 3:16 ni wè.
12Ki kala na le, na woolo, fwɔʔɔ nyɛ wo na, di koò nyɛ wò wre klɛnmɛ woʔo, kí po nɛɛ wó bi da danri bì yala mí ni. 13Mɛjɛn nà ye da danri bì yala wre klɛnmɛ ní me, pa ye gu. Di ná yé da yè wre klɛnmɛ kahranʔa kpun ge Nyɛʔɛlɛ li Nyìli li fanŋa ni, pa ye ba nyuwyeʔe ta ge. 14Bee Nyɛʔɛlɛ li Nyìli lí na pe sinni ge, pè bɛfu pé nyɛ Nyɛʔɛlɛ li pii. 15Mɛjɛn Nyɛʔɛlɛ li Nyìli la yé ma ta ge loò nyɛ nyìli là li lí bi ye le ŋklomo ni bì fyara le ye ni nɛ ge. Di ki Nyìli lí na ye krɛʔɛ Nyɛʔɛlɛ li pii mà kan à wo naʔa nyu Nyɛʔɛlɛ ma le mà yo: «Wò To.»#8:15-17 ma wèle wa Mar 14:36; Gal 4:5-7 ni wè. 16Nyɛʔɛlɛ li Nyìli lí naʔa nyu wò ma mà yo: Wó nyɛ Nyɛʔɛlɛ li pii. 17Pa wo gâ bo li pii ge, wó nyɛ li krɔʔɔ lifɛɛ. Pa wo nyɛ Nyɛʔɛlɛ li krɔʔɔ lifɛɛ, wó bi ba blɛn bì krɔʔɔ kpe Jesu ní we. Mɛjɛn, nà wo da jɔlɔ wí ni teme na, pa wo ba blɛn bì bo wa wi ní wi kpangbanma ni me.
Wó bi ba kpangbanma ta
18Mí ma paʔa na mà yo ga wó na cɔlɔ ŋaŋa ni ge kòo gban bì donli kpangbanma ma nì Nyɛʔɛlɛ lí gà ba gan wo ma ge. 19Nyɛʔɛlɛ li ahranma pì bɛfu pí na nyiŋi hanni ge ceŋge ga na lí bi ba li pii tyɛʔɛ be pí na ge. 20Mɛjɛn Nyɛʔɛlɛ liì dà yo ban mà yo pi po tonro fun fanŋa noʔo na. Pi nadanma ban. Pi cɛʔɛfɔlɔ wiì nadanma mi. Di honriʔi pahaʔa dá bo wa.#8:20 ma wèle wa Hli 3:17-19 ni wè.
21Kí ga: Wlɛʔɛ kà na ahranma piì tapolo pí gà ba syɔ fonʔomo ŋklomo ma me bì pi woʔo ta wa Nyɛʔɛlɛ pii pe syɔmo kpangbanma ni me. 22Mɛjɛn wó maʔa cɛn mà yo ahranma pì bɛfu pí na cɛn na cɔlɔ teme na fɔ mà bâ no alaʔa na ge, nɛ pa acɛnlɛ fɔlɔ ŋa nyɛ wí na cɛ́n wí bi he ge.
23Di piì nigbe ban. Wòó bee wó ma Nyɛʔɛlɛ li Nyìli ta le á li po wo ma nɛ pa Nyɛʔɛlɛ li akangblɛʔɛ nyɛ ge, wòó wò tala wó na cɛn wa wò lama ni me mà na Nyɛʔɛlɛ hanni fɔ nyiŋi ga na lí bi wò wre syɔ de bì wo tyɛʔɛ hɛɛn na be peʔe cɛn pe yo wó nyɛ li pii.#8:23 ma wèle wa 2Kor 5:2-4 ni wè.
24Pa wó ma syɔ ge, à wo honriʔi pa geʔe na. Mɛjɛn hɛn nòo wi honriʔi pahaʔa nya ge kɔ, wòo daʔá hanni adi. Mɛjɛn pa wiʔi nya kɔ, nyaʔa na wi daʔá hanni nɛ ge? 25Di nà wo da honri bì da ba ga na woò na nyaʔa ge, wo naa ki hanni lagunmu ní.
26Ki podeme na, Nyɛʔɛlɛ li Nyìli lí na wo hari, wòó bee wó nyɛ fanŋa fun wò pama namyɛlɛ na le. Mɛjɛn woò na gbanni bì da nyɛri nɛ pa kí ma yala wó da nyɛrí pomo ma na ge. Di Nyɛʔɛlɛ li Nyìli liì tapolo lí na Nyɛʔɛlɛ nyɛri le wo kan cɛnʔɛ ní, ga hɛn wà wóo gban bìʔi fligi kayoro ní ge. 27Nyɛʔɛlɛ la lí na dihonyee nyaʔa be, lí na Nyɛʔɛlɛ li Nyìli li honriʔi cɛnni ge, mɛjɛn Nyɛʔɛlɛ li Nyìli lí na nyɛri Nyɛʔɛlɛ li woo kan be mà yala Nyɛʔɛlɛ li nadanma ní me.
28Wó maʔa cɛn mà yo Nyɛʔɛlɛ lí na tunŋu ko yrɛbɛ pì bɛfu ní na kmaʔa hanri bee kan Nyɛʔɛlɛ lí na pe glanʔa ge, bee li dá yeri mâ yala li nadanma ní me. 29Mɛjɛn bee Nyɛʔɛlɛ li dá fara kɔ ge, li daʔa honrí mà yaʔa fan mà yo pe li Pyɔ lɛ̀ we, jango li Pyɔ wi po kplɛɛ wa li heme woo fafaʔa ni. 30Li da glú mâ bee kala kon mâ li yaʔa ge, à li ki woo yeri be. Bee lí ma yeri ge, à li pé co sinbee li yɛʔɛ̀ na ge. Bee lí ma co hɛnsinbee ge, à li ní mà li kpangbanma mà kan pé ma kpo.
Nyɛʔɛlɛ li glanʔama mí nyɛ kpangbanma
31Wó bi nyaʔa yo san? Nàʔa po Nyɛʔɛlɛ lí nyɛ wo nì ge, han bi gban bì fanŋa ta wo na?
32Li ìn dà li Pitaʔa syɔ ge cɔlɔʔɔ ma, di li dɔɔ́ fara sraʔá wò bɛfu kala na. Nàʔa po ban, kanyɛmɛ na lí bi ba yrɛbɛ pì bɛfu kan wo ma bì haʔa wí na. 33Han bi baʔa bee na Nyɛʔɛlɛ lí ma fara ge? Hɛn wòo gban, mɛjɛn Nyɛʔɛlɛ liì li lí na pe cun sinbee ge. 34Han bi gan kiti wi to pé na ge? Hɛn wòo gban, mɛjɛn Jesu Krisi wiì wi wi dá gu ge. Kiì nigbe ban, di wi da nyɛ́ mà nyini kuu ni be. Wí nyɛ wa Nyɛʔɛlɛ li kaligi na na nyɛri wo kan. 35Nyaʔa gi kí bi gban bí wo laʔa Krisi wi glanʔama na me? Cɔlɔʔɔ gi yo, dee di yɛgbanʔa gi, dee di kagbanʔa gɛ, funŋu gi yo, fyomo mi yo, fyara kala li yo, dee di kùʔù gi? 36Kí nyɛ nɛ pa ga nyɛ kí nyɛ wa nyoŋoʔo Nyɛʔɛlɛ li sɛbɛ ni we mâ yo:
Ma kala na,
wó ma klɛn mà kùʔù kan
wlɛʔɛ kì bɛfu na.
Pé na wo cun nɛ pa mbara nyɛ
da pé na sye tí ni kpohaʔa na ge. # 8:36 ma wèle wa Ŋuʔu 44:23 ni wè.
37Di wó na fanŋa taʔa kaʔa kè bɛfu na ŋa fanŋa ni wó noo glanʔa ge. 38Mɛjɛn mí ma paʔa na mà yo yraʔa kà wo wa ga kí bi gban bí wo laʔa Nyɛʔɛlɛ li glanʔama na me. Kùʔù gi yoo, nyuwyeʔe gi yoo, mlɛŋɛyee yoo, fanŋa fɛɛ ní sye fɛɛ ní bee pé nyɛ wa namuru ni de pee bɛ yoo, alaʔa kaʔala yoo, kpɛndo kaʔala yoo, 39namuru fanŋa yoo, tra noʔo fanŋa yoo, mà haʔa ahranma pi tɔ na be. Yraʔa kɛ̀ ìn bi gban bì wo laʔa Nyɛʔɛlɛ li glanʔama na me, mɛjɛn wó na li glanʔa wò fɔlɔ Jesu Krisi fanŋa ni.

Currently Selected:

HRƆMU 8: NLK10

Highlight

Share

Copy

None

Want to have your highlights saved across all your devices? Sign up or sign in