HRƆMU 7
7
Cɛprɔʔɔ lɛgɛ
1Na woolo, mí na nyu yèé bee ní yé ma Nyɛʔɛlɛ li furu kayoro cɛn de. Ye ìn ki cɛn bì yo tí nyɛ hɛn ŋa yugu na wí nyɛ nyuwyeʔe na ge yo? 2Ki lɛgɛ kí ga: Cɛlɛ ŋa wí ma pɔri naŋa ma wi na po wí ma pwɔ wi pɔlɔ na we nyiŋi ga na naŋa wí bi bo nyuwyeʔe na ge. Di wi pɔlɔ nòo ku, ki na po wí ma haʔala mà wa Nyɛʔɛlɛ li furu kayoro ma de da ti dɔɔ́ pwɔ wí na ge. 3Ki kala na wi pɔlɔ nòo po nyuwyeʔe na adi, ki cɔ nòo ko naŋa wà ma nɛ, pa pe dɔɔ yeri najafaʔa fɔlɔ. Wi pɔlɔ noó ku, pɔɔ bo wí ma syɔ ga ma ki da pé pwɔ pè na wiì nì wi pɔlɔ nì we. Nòo ko naŋa wà ma, pòo gban bi dɔɔ́ yeri najafaʔa fɔlɔ adi. 4Na woolo, kiì tege gi ye ma. Krisi wi kùʔù fanŋa ni yé ma ku Nyɛʔɛlɛ li furu kayoro ti namyɛlɛ na jango bì bo hɛn wà woolo, wiì wi ŋa wi da nyɛ́ mâ nyini kuu ni be, jango wo da tunŋu ko, wo da kmaʔa hanri Nyɛʔɛlɛ kan le. 5Mɛjɛn nyiŋi ga na wo da glú ná tanri wre ti nadanma na me, furu kayoro ti dá bo na kapere laa panʔa wo ma. Àʔa na tunŋu ko wa wò awiri ni de na sye wo nì kùʔù ma. 6Di ŋaŋa ni ge wó ma syɔ furu kayoro ti fanŋa ma ge, mɛjɛn wó ma ku ga namyɛlɛ na ki dá wo co mâ wo pwɔ ge. Pa wo gban bì da tunŋu ko Nyɛʔɛlɛ kan le pofonmo na, Nyɛʔɛlɛ li Nyìli li fanŋa ni ge. Woò na tunŋu ko adi polɛmɛ na, Mowisi wi sɛbɛ fanŋa kiì ni.
Furu kayoro ní, kapere nì
7Wó bi nyaʔa yo san? Furu kayoro tí nyɛ kapere di yo? Ayo dɛ. Di nàʔa po furu kayoro ti ìn dà bo naʔa ge, mi ìn dà bí gban bì kapere cɛn de. Nàʔa po furu kayoro ti ìn dàʔa yo bì yo: Mò gá nyɛklonlo hanri, mi ìn dà bíʔì cɛn bì yo ki ìn yala bì da nyɛklonlo hanri.#7:7 ma wèle wa Nyi 20:17; Lado 5:21 ni wè.
8Kapere tí ma pomo mà ta furu kayoʔo fanŋa ni ge mà na kân à mi na nyɛklonlo hanri yrɛbɛ tyɛnʔɛ kè bɛfu na. Mɛjɛn furu kayoro nà ti ìn bo be ge, kapere pa ti bo kuru. 9Fanfan ni, nyiŋi ga na furu kayoro ti ìn dà bo wa ge, à mi po nyuwyeʔe na. Di furu kayoʔo ki gâ ban nyiŋi ga na ge, kapeʔe àʔa nyuwyeʔe ta.#7:9 maʔa tonli Sraʔa 18:5; Ŋuʔu 73:22 ni wè.
10Mì à mi ku. Furu kayoʔo ga ki dá gan wo ma nyuwyeʔe woʔo, ki kayoʔo àʔa krɛʔɛ ná ma kùʔù kala. 11Mɛjɛn kapere tí ma ticlimi mà ta furu kayoʔo ma ge mà na fanla mà na kpo.#7:11 ma wèle wa Hli 3:13 ni wè.
12Ki pomo na furu kayoro tí ma jɛ Nyɛʔɛlɛ ma. Kí ma yala ga bí hanri ge kí nyɛ Nyɛʔɛlɛ woʔo. Àʔa po sinŋi mà po kmaʔa. 13Paʔa gban bì bo ga kí nyɛ kmaʔa ge kí ma krɛʔɛ na kùʔù kala yo? Ayo dɛ. Di kapere tiì di tí ma kapere pomo yrigi me finmi na mà na tunŋu ko ga nì kí nyɛ kmaʔa ge mà na kpo. Ki pomo na me kapere tí ma krɛʔɛ tipere ceŋge furu kayoʔo fanŋa ni.
Kapere tí ma fanŋa ta hɛnwyee na we
14Wó maʔa cɛn mà yo furu kayoro ti dá jɛ Nyɛʔɛlɛ ma. Di mì mí nyɛ hɛnwyee mà po fanŋa fun mà po nɛɛ pé ma na pɛrɛ jango bì bo kapere ŋklo. 15Ga mí na hanri ge ho naʔa cɛnni, mɛjɛn ga mí cori bì hanri ge mi in je gá kiì hanri. Di ga kí na na bɛnʔɛ ge à mi na kiì hanri.#7:15 ma wèle wa Gal 5:17 ni wè. 16Nàʔa po mi ìn jori ga na mí na kiì hanri, mi naʔa cɛ́n kiì na mà yo furu kayoro tí nyɛ kmara. 17Mì ban mí naʔa hanri ban ge, di kapeʔe ga kí na kori wa na nî ge kiì gi. 18Mɛjɛn mí maʔa cɛn mà yo kakmaʔa kà wò wa na nî, ki na po pé yo na wre klɛnmɛ ni me. Mí ma cori bì da kmaʔa hanri ge, di ki fanŋa wò na ma. 19Ho na kmaʔa hanri ga mí ma cori ge, di mí na tipeʔe hanri ga mi ìn jori ge. 20Ga mi ìn jori bì da hanri ge, nà mi da ki woʔo hanri ge, kòo bo mì wi mí na ki woʔo hanri ge. Kapeʔe ga kí na kori wa na nî kiì gi kí naʔa hanri ge.
21Ki pomo na mí ma kalɛʔɛ ga nya nà ma kí ga: Nà mi cori bì kmaʔa hanri, mi naa tipeʔe kiì hanri. 22Wa na lama ni me Nyɛʔɛlɛ li furu kayoro tí na na glanʔa ceŋge. 23Di mí na kalɛʔɛ kà nyaʔa kì yɛ wa na awiri ni de, ga kí na can kalɛʔɛ ga nì kí nyɛ na honriʔi woʔo ge mà na na kanʔa à mi na pin kapere kalɛʔɛ ga ŋklo kí nyɛ wa na awiri ni de. 24Mì mí na teʔe wɛʔɛ dɛ. Han wi ŋa wí bi na syɔ ki wre da ma tí na na kanʔa kùʔù ma ge? 25Mí na Nyɛʔɛlɛ syeri le mà yo Jesu wiì wi wí bi ki woʔo ga hanri ge.
Na ŋaŋa pomo mí ma: Mí na tunŋu ko Nyɛʔɛlɛ kan le na honriʔi namyɛlɛ na le, di mí na tunŋu ko kpo kapere kan de na wre namyɛlɛ na le.
Currently Selected:
HRƆMU 7: NLK10
Highlight
Share
Copy

Want to have your highlights saved across all your devices? Sign up or sign in
Bible Society of Côte d'Ivoire