HRƆMU 6

Nyuwyefonŋo tama Krisi fanŋa ni ge

1Wó bi nyaʔa yo san? Kí ma yala wo kò wo da kapere hanri de jango Nyɛʔɛlɛ li haʔama mi da nyɛʔɛ mii sye yo? 2Ayo dɛ. Wòó bee wó ma ku kapere namyɛlɛ na le, paʔa bo mɛlɛ wó gbàn wó da ti hanri adi ge? 3Ye ìn ki cɛn bì yo wòó bee wó ma batise mâ po teme na Jesu Krisi nì we, wó ma batise mà po teme na kpo wi kùʔù nì ge yo? 4Nyiŋi ga na wo da gâ batise ge, wo dá bo nɛɛ wó ma ku wi ní. À pe wo le wa wi ní fanʔa ni ge, jango wòó fanna wo da danrí nyuwyefonŋo na nɛ pa To Nyɛʔɛlɛ li dá Krisi nyɛ we móò yrígi kuu ni be li fangbɔʔɔ nî ge.#6:4 ma wèle wa Fili 2:12 ni wè.

5Mɛjɛn pa wo dá gu wi ní teme na ge, ki podeme miì na wó bi ba nyɛ bì nyini pa wiì nyɛ we. 6Wó maʔa cɛn mà yo kplɛʔɛ na wo dá bo pomo ma na mi dá gu Krisi nì we wa tipraʔa na ge, jango wo polɛmɛ mi kapere fanŋa ki kɔ, wò gá bo wa adi kapere ti ŋklomo ni me. 7Mɛjɛn ŋa wí ma ku kɔ wi na po wí ma syɔ kapere ŋklomo ma me. 8Nàʔa po wo ma ku Krisi nì we teme na, wó ma paʔa na mà yo wó bi ba bo wí ni nyuwyeʔe na ge. 9Wó maʔa cɛn mà yo Krisi pɔɔ da nyɛ́ mâ nyini kuu ni be, wi ìn bi gà gu adi. Kùʔù ki fanŋa wò nyɛ wí na adi. 10Wi dá gu kuhaʔa nigbe kapere ti namyɛlɛ na le, di ŋaŋa nyuwyeʔe kí nyɛ wí ma Nyɛʔɛlɛ li namyɛlɛ na le. 11Ki pomo na me yèé fanna ye da yè cun kuulu kapere ti namyɛlɛ na le. Di ye da yè cun nyuwyeʔe hɛɛn Nyɛʔɛlɛ li namyɛlɛ na le ga na yé ma kpoʔolo Jesu Krisi nì we.

12Ki kala na yò gáa kapere yari ti da yè wre sinni de adi, da tí na kun ge, jango yò gáa ti nadanma hanri me. 13Yò gáa yè awiri kanʔa kapere ma de nɛ pa tipeʔe hranma mi tungɔyrɛbɛ nyɛ be. Di ye yè kân Nyɛʔɛlɛ ma le nɛ pa hɛɛn bee nyɛ pé ku mâ nyɛ ge mâ po nyuwyeʔe na ge, ye nì ye yè awiri kan li tunŋu ma ge nɛ pa tungɔyrɛbɛ nyɛ be, jango ye da ga hanri kí nyɛ sinŋi ge. 14Mɛjɛn kapere ti ìn bi fanŋa ta ye na. Yoò nyɛ wa furu kayoro tiì fanŋa ni, di yé nyɛ wa Nyɛʔɛlɛ li haʔama mi fanŋa ni.

Wó nyɛ sinmi mi ŋkloolo

15Wó bi nyaʔa yo san? Paʔa gâ bo woò nyɛ wa Nyɛʔɛlɛ li furu ti fanŋa ni ge adi, di áʔa po wó nyɛ wa Nyɛʔɛlɛ li haʔama mi fanŋa ni ge, pa wo gban bì da kapere hanri yo? Ayo dɛ. 16Yé maʔa cɛn kmaʔa mà yo, nà ye da hɛn wà kpɔʔɔ bì da tunŋu ko wí kan ge, ye na krɛ̀ʔɛ̀ ki kundiʔi wi ŋkloolo ŋa yé na kpɔʔɔ ge. Nàʔa po kapere di yé na kpɔʔɔ ge, ki tanʔahaʔa kí nyɛ kùʔù nì. Nàʔa po Nyɛʔɛlɛ li yé na kpɔʔɔ ge, ki tanʔahaʔa kí nyɛ sinmi ní. 17Wo Nyɛʔɛlɛ syeri le, mɛjɛn ye da glú mà po wa kapere ŋklomo ni me. Di ŋaŋa ni ge krɛʔɛmɛ ma yé ma ta ge yé ma mì kpɔʔɔ yè dihon wì bɛfu ní. 18Yé ma syɔ kapere ŋklomo ma me mà krɛʔɛ Nyɛʔɛlɛ li ŋkloolo jango ye da sinmi hanri. 19Mí na nyu ye nì hɛɛn yomo na yè fanŋa funmu kɔsɔ na. Fanfan ni ye dá yè awiri le de ŋklomo ni jango ye da kakranʔa ní tipere hanri de su. Ki podeme miì na ye yè awiri le de ŋklomo ni jango ye da ga hanri kí nyɛ sinŋi ge, ye nì ye po kmaala Nyɛʔɛlɛ li yɛʔɛ̀ na ge.

20Nyiŋi ga na ye dá bo kapere ŋkloolo ge, ye dá bo yè kân sinmi mi namyɛlɛ na le. 21Ye dá nyaʔa ta wa kaʔa gee ni ye dá bo na hanri, á ke báa fɛrɛ tonni ye na ŋaŋa ni ge? Ki kaʔa ke tanʔahaʔa kí nyɛ kùʔù nì. 22Di ŋaŋa ni ge Nyɛʔɛlɛ lí ma ye syɔ kapere ŋklomo ma me mà ye krɛʔɛ li ŋkloolo. Kiì ma kan á ye po kmaala li yɛʔɛ̀ na ge. Ki woʔo ga ki tanʔahaʔa kí nyɛ nyuwyeʔe bajegɔ ní. 23Mɛjɛn kapere ti tonro wí nyɛ kùʔù nì, di Nyɛʔɛlɛ li nadanma yraʔa kiì gi ga nyuwyeʔe bajegɔ ní we ga wó na taʔa wò fɔlɔ Jesu Krisi wi fanŋa ni ge.

Currently Selected:

HRƆMU 6: NLK10

Highlight

Copy