MATYE 6

Nadanma yrɛbɛ kanma

1Ye da yè kɔrɔsi. Yò gáa yè srɛʔɛ kakmaʔa hanri ge hɛɛn yɛʔɛ́ na, jango pe da ye nyaʔa. Nàʔa po ban, yòo yà tonro ta yè To ma ŋa wí nyɛ wa namuru ni de.#6:1 ma wèle wa Mat 23:5 ni wè.

2Ki kala na, nà ma da nadanma yrɛbɛ kanʔa fyomo fɛɛ ma be, mò gáa ki jari nɛ pa noyomo syɛn syɛn fɛɛ pé naʔa hanri wa sɛrigoro ni de, ní kàʔà lama kloro ní de, jango hɛɛn pe da pe kpɔʔɔ. Mí biʔi yo ye ma kanyɛmɛ na, pee pé ma pe tonro ta we kɔ. 3Nà ma da nadanma yrɛbɛ kanʔa fyomo fɛɛ ma be, maʔa hanri pomo ma na hɛɛn pe tɔɔ pe ìn biʔi cɛn ga má ma hanri ge, 4jango ga má na kanʔa ge, ki po hrama ni. Nàʔa po ban, ma To ŋa wí na kahraʔa nyaʔa ge, pɔɔ tonro kan má ma.

Jesu wí ma pe ploʔo nyɛrimi ní me

(Luk 11:2-4)

5Nà ma da Nyɛʔɛlɛ nyɛri le, mò gá bo nɛ pa noyomo syɛn syɛn fɛɛ nyɛ be. Mɛjɛn kí na pe glanʔa pe da nyìní, pe da Nyɛʔɛlɛ syeri le wa sɛrigoro ni de, ní koylara nì de, jango hɛɛn pe da pe nyaʔa. Mí biʔi yo ye ma kanyɛmɛ na, pé ma pe tonro ta we kɔ. 6Di mo we, nà ma cori má bi nyɛri, ma je wa ma go pyɔ ni we, ma goyɛʔɛ tón, maa nyɛri ma To ma we ŋa wí nyɛ wa hrama ni me. Nàʔa po ban, ma To ŋa wí na kahraʔa nyaʔa ge, pɔɔ tonro kan má ma.

7Nà ma da Nyɛʔɛlɛ nyɛri le, mò gáa kayofafaʔara nyu nɛ pa basɛriyee pé naʔa hanri ge. Mɛjɛn pé naʔa honri mà yo Nyɛʔɛlɛ lí bi loʔo pé ma ga na pé na nyu fafaʔa ge.

8Ki kala na, yò gáa nyɛri nɛ pa pé naʔa hanri ge. Mɛjɛn, sanni yé bi ga nyɛri yé ma cori ge, àʔa po yè To wí maʔa cɛn kɔ.

9Kí ma yala ye da nyɛrí ki pomo ma miì na, ye yo:

Wò To, mo ŋa wa namuru ni de

hɛɛn pe da ma yegmala kpɔʔɔ le.

10Ma masaʔa ki da ban.

Ma nadanma kaʔa kee bí da hanri naʔa tra na de

nɛ pa ké na hanri wa namuru ni pomo ma na ge.

11Ma bru ŋa kan wo ma alaʔa nî wó ma cori ge.

12Ma wò kapere yaʔa de wo kan

nɛ pa wòó wó na wò nibyee pe woro yari de

pe kân pomo ma na ge.

13Mò gá wo yaʔa wo je wa pomawleʔe ni ge,

di ma wo syɔ Sotanri ma,

ŋa pé na yeri Hɛnpee ge.

[Mɛjɛn klo fɛrɛ ní, fanŋa nì,

ní kpɔʔɔmo mì bɛfu ní

pi klɛ́n mà mo kan nyiŋi kì bɛfu na.

Ki po ban.]

14Mɛjɛn nà ye da hɛɛn pe kapere yari de pe kân da pé ma hanri ye na ge, yè To ŋa wí nyɛ wa namuru ni de, pɔɔ da yè woro yari de ye kan kpo.#6:14-15 ma wèle wa Mar 11:25-26 ni wè. 15Di yèé nà ye ìn da hɛɛn pe kapere yari de pe kân ge, yè To wòo da yè kapere yari de ye kan kpo.

Jesu wí ma pe ploʔo su como kayoʔo ní

16Nà ye su co ge, yò gá yè yɛrɛ pɛn de nɛ pa noyomo syɛn syɛn fɛɛ pé naʔa hanri ge. Pe na pe yɛrɛ wa mà ti krɛʔɛ jango hɛɛn nà pe pé nya, peʔe cɛn pe yo pé nyɛ su ni. Mí biʔi yo ye ma kanyɛmɛ na, bì yo pé ma pe tonro ta we kɔ.

17Di mo nà ma su co ge, ma nudanʔa hùnmù tin wa ma yugu na ge, maʔa jrɛ̀ʔɛ̀, ma ma yɛʔɛ̀ jeʔe ge, 18jango pò gaʔa cɛn bì yo má nyɛ su ni fɔ ma To ŋa wí nyɛ wa hrama ni me. Nàʔa po ban, ma To wí na kahraʔa nyaʔa ge, pɔɔ tonro kan má ma.

Krɔʔɔ kayoʔo

(Luk 12:33-34)

19Yò gáa krɔʔɔ kpoʔolo naʔa ye kân tra na de, deʔe ga na donŋo nì, ní kajere nì pí na ka ge, deʔe ga na nikonmoo pé na goro frugu ná yu ge.#6:19 ma wèle wa Jake 5:2-3 ni wè. 20Di ye da krɔʔɔ kpoʔolo yè kân wa namuru ni de, wa deʔe ga na donŋo nì, kajere nì poò na ka ge, deʔe ga na nikonmoo poò na goro frugu bì da yu ge. 21Mɛjɛn ma krɔʔɔ nàʔa po deʔe ga na, ma dihon pɔɔ bo wa kpo.

Wre ti kpɛnmɛ kayoʔo

(Luk 11:34-36)

22Nyɛlɛ lí nyɛ wre ti lamba wi. Ki kala na, ma nyɛlɛ pyɔ nòo po kmaa ge, ma wre tì bɛfu pa ti bo kpɛnmɛ na. 23Di ma nyɛlɛ pyɔ nòo po tipee ge, ma wre tì bɛfu pa ti bo yeblimi ni. Ki kala na, kpɛnmɛ ma mí nyɛ wa ma nî ge, nà mi krɛʔɛ yeblimi ge, ki yeblimi mí nyɛ kpangbanma.

Nyɛʔɛlɛ ní, ní gbejanra nì

(Luk 16:13)

24Hɛn wà wòo gban bì da tunŋu ko kundiʔiyee syɛn kan. Pa wà bí dɔɔ bɛnʔɛ, wà bí dɔɔ glanʔa. Pɔɔ da tunŋu ko wà kan bì da wi tɔ faʔara we. Yòo gban bì bo Nyɛʔɛlɛ li tungɔɔ bì nì bì bo gbejanra ti ŋkloolo.

Ye pà Nyɛʔɛlɛ na le

(Luk 12:22-31)

25Ki kala na, mí biʔi yo ye kan bì yo: Yè lama mò gáa wlele ye na yè nyuwyeʔe kala na le bì yo: Wó bi gà nyaʔa ka bì nyaʔa jɔ? Yè lama mò gáa wlele ye na nɛ yè wre kala na le, yraʔa ga yé bi ba le ge. Mɛjɛn kanyɛmɛ na, nyuwyeʔe kala lí nyɛ kpangbanla mà toro akaba kala na le. Wre kala à li po kpangbanla mà toro alebe kala na le. 26Ye kajɛnʔɛ wele ge. Koò na akaba fali bì da pi kon bì da pi ni bogoo ni. Yè To ŋa wí nyɛ wa namuru ni de, wɔ̀ɔ na ke kanʔa, à ke na li. Yè kala loò nyɛ kpangbanla mà toro kajɛnʔɛ wolo na le yo? 27Di wa yèé ni be, wiwii nyɛ wa ŋa wí bi gban bí kà haʔa wa wi nyuwyeʔe tiklonmo na me wi lama wleleme kala na le?

28Dee di, nyaʔa ma kan yè lama á mi na wlele ye na kpasyoro kala na le? Ye nya wofyɛnbɛ wele be kmaʔa wa sinbriʔi ni ge, pí na lɛʔɛ pomo ma na ge. Poò na teʔe. Poò na jese tîn kpo. 29Di mí biʔi yo ye kan bì yo Salomo wi kmara tì bɛfu ní, wi ìn dà gban bì kpasyokmara le bì wì feri bì bo kmaa nɛ pa ki nya wofyɛnʔɛ kà nigbe nyɛ ge.#6:29 ma wèle wa 1Mas 10:4-7; 2Masa 9:3-6 ni wè.

30Yèé bee yè pama mí nyɛ tatunmu ge, yè wèlé. Nyɛʔɛlɛ nà li sinbriʔi nya feri ga ki hîn bo be alaʔa, di ki kpɛntoʔo na pe naʔa wá kwɔʔɔ nî ge, li ìn bi kpasyokmara kan ye ma bì doro ki woro na de yo? 31Ki kala na, yè lama mò gáa wlele ye na ye yo: ‹Wó bi nyaʔa ka? Ná kiì ban, wó bi nyaʔa jɔ, kana, wó bi nyaʔa le?› 32Mɛjɛn basɛriyee pé na ki yrɛbɛ ba pì bɛfu ca. Ɛɛn di, yè To ŋa wí nyɛ wa namuru ni de wí maʔa cɛn mà yo yé ma cori ki yrɛbɛ ba pì bɛfu na. 33Di ye da Nyɛʔɛlɛ li masaʔa ca ge kpɛn, ye nì ye da ki kasingee kpɔʔɔ ge. Nàʔa po ban, pa li ba ki yrɛbɛ pì bɛfu haʔa wa ye ma kpo. 34Ki kala na, yè lama mò gáa wlele ye na kpɛndo kaʔa na ge. Mɛjɛn kpɛndo wí bi da wì wlele wì yɛ ge. Wlɛʔɛ ga nì ki yɛgbanra ti na yalaʔa ni.

Currently Selected:

MATYE 6: NLK10

Highlight

Copy