Popular Bible Verses from MATYE 6

Share

Di ye da Nyɛʔɛlɛ li masaʔa ca ge kpɛn, ye nì ye da ki kasingee kpɔʔɔ ge. Nàʔa po ban, pa li ba ki yrɛbɛ pì bɛfu haʔa wa ye ma kpo.

Ki kala na, yè lama mò gáa wlele ye na kpɛndo kaʔa na ge. Mɛjɛn kpɛndo wí bi da wì wlele wì yɛ ge. Wlɛʔɛ ga nì ki yɛgbanra ti na yalaʔa ni.

Ki kala na, mí biʔi yo ye kan bì yo: Yè lama mò gáa wlele ye na yè nyuwyeʔe kala na le bì yo: Wó bi gà nyaʔa ka bì nyaʔa jɔ? Yè lama mò gáa wlele ye na nɛ yè wre kala na le, yraʔa ga yé bi ba le ge. Mɛjɛn kanyɛmɛ na, nyuwyeʔe kala lí nyɛ kpangbanla mà toro akaba kala na le. Wre kala à li po kpangbanla mà toro alebe kala na le.

Di mo we, nà ma cori má bi nyɛri, ma je wa ma go pyɔ ni we, ma goyɛʔɛ tón, maa nyɛri ma To ma we ŋa wí nyɛ wa hrama ni me. Nàʔa po ban, ma To ŋa wí na kahraʔa nyaʔa ge, pɔɔ tonro kan má ma.

Kí ma yala ye da nyɛrí ki pomo ma miì na, ye yo: Wò To, mo ŋa wa namuru ni de hɛɛn pe da ma yegmala kpɔʔɔ le. Ma masaʔa ki da ban. Ma nadanma kaʔa kee bí da hanri naʔa tra na de nɛ pa ké na hanri wa namuru ni pomo ma na ge.

Ma bru ŋa kan wo ma alaʔa nî wó ma cori ge.

Ma wò kapere yaʔa de wo kan nɛ pa wòó wó na wò nibyee pe woro yari de pe kân pomo ma na ge.

Mò gá wo yaʔa wo je wa pomawleʔe ni ge, di ma wo syɔ Sotanri ma, ŋa pé na yeri Hɛnpee ge. [Mɛjɛn klo fɛrɛ ní, fanŋa nì, ní kpɔʔɔmo mì bɛfu ní pi klɛ́n mà mo kan nyiŋi kì bɛfu na. Ki po ban.]

Mɛjɛn nà ye da hɛɛn pe kapere yari de pe kân da pé ma hanri ye na ge, yè To ŋa wí nyɛ wa namuru ni de, pɔɔ da yè woro yari de ye kan kpo.

Ye kajɛnʔɛ wele ge. Koò na akaba fali bì da pi kon bì da pi ni bogoo ni. Yè To ŋa wí nyɛ wa namuru ni de, wɔ̀ɔ na ke kanʔa, à ke na li. Yè kala loò nyɛ kpangbanla mà toro kajɛnʔɛ wolo na le yo?

Yò gáa krɔʔɔ kpoʔolo naʔa ye kân tra na de, deʔe ga na donŋo nì, ní kajere nì pí na ka ge, deʔe ga na nikonmoo pé na goro frugu ná yu ge. Di ye da krɔʔɔ kpoʔolo yè kân wa namuru ni de, wa deʔe ga na donŋo nì, kajere nì poò na ka ge, deʔe ga na nikonmoo poò na goro frugu bì da yu ge. Mɛjɛn ma krɔʔɔ nàʔa po deʔe ga na, ma dihon pɔɔ bo wa kpo.

Hɛn wà wòo gban bì da tunŋu ko kundiʔiyee syɛn kan. Pa wà bí dɔɔ bɛnʔɛ, wà bí dɔɔ glanʔa. Pɔɔ da tunŋu ko wà kan bì da wi tɔ faʔara we. Yòo gban bì bo Nyɛʔɛlɛ li tungɔɔ bì nì bì bo gbejanra ti ŋkloolo.

Yèé bee yè pama mí nyɛ tatunmu ge, yè wèlé. Nyɛʔɛlɛ nà li sinbriʔi nya feri ga ki hîn bo be alaʔa, di ki kpɛntoʔo na pe naʔa wá kwɔʔɔ nî ge, li ìn bi kpasyokmara kan ye ma bì doro ki woro na de yo?

Nà ma da nadanma yrɛbɛ kanʔa fyomo fɛɛ ma be, maʔa hanri pomo ma na hɛɛn pe tɔɔ pe ìn biʔi cɛn ga má ma hanri ge, jango ga má na kanʔa ge, ki po hrama ni. Nàʔa po ban, ma To ŋa wí na kahraʔa nyaʔa ge, pɔɔ tonro kan má ma.

Ye da yè kɔrɔsi. Yò gáa yè srɛʔɛ kakmaʔa hanri ge hɛɛn yɛʔɛ́ na, jango pe da ye nyaʔa. Nàʔa po ban, yòo yà tonro ta yè To ma ŋa wí nyɛ wa namuru ni de.

Nà ye su co ge, yò gá yè yɛrɛ pɛn de nɛ pa noyomo syɛn syɛn fɛɛ pé naʔa hanri ge. Pe na pe yɛrɛ wa mà ti krɛʔɛ jango hɛɛn nà pe pé nya, peʔe cɛn pe yo pé nyɛ su ni. Mí biʔi yo ye ma kanyɛmɛ na, bì yo pé ma pe tonro ta we kɔ. Di mo nà ma su co ge, ma nudanʔa hùnmù tin wa ma yugu na ge, maʔa jrɛ̀ʔɛ̀, ma ma yɛʔɛ̀ jeʔe ge, jango pò gaʔa cɛn bì yo má nyɛ su ni fɔ ma To ŋa wí nyɛ wa hrama ni me. Nàʔa po ban, ma To wí na kahraʔa nyaʔa ge, pɔɔ tonro kan má ma.